„გადამწყვეტი ბრძოლა სუფსის ხეობის გადარჩენისთვის _ ჩოხატაურის მუნიციპალიტეტის სოფელ ზემოსურების ცენტრში 17 ივლისს 3 საათზე დანიშნულია “სკოპინგი”!
#სუფსა — მდინარე დასავლეთ საქართველოში, სათავე აქვს მესხეთ რაის ქედის ჩრდილოეთ კალთაზე მწვერვალ მეფისწყაროსთან, ზღვის დონიდან 2800 მეტრ სიმაღლეზე. ერთვის შავ ზღვას სოფელ გრიგოლეთთან. სიგრძე 108 კილომეტრი, აუზის ფართობი 1130 კვ.კმ. მთავარი შენაკადებია გუბაზეული, ბახვისწყალი, შუთი.
სახელწოდება სუფსას თავდაპირველი ფორმაა სურ-ფსა. მდინარე სათავეს სურების მთებში იღებს. მისი სახელი სურების წყალს უნდა ნიშნავდეს.
გთხოვთ ყველას დავდგეთ ერთად და გადავარჩინოთ მდინარე სუფსა და ხეობა,ძალა ერთობაშია.“ აღნიშნულია ჯონი ტრაპაიძის ფეისბუქპოსტში.
„გურია ნიუსი“ „სურების ჰესის“ ფეისბუქგვერდის მეშვეობით შეეცადა დეტალების გარკვევას. ამ ეტაპზე, ჩვენ მიერ მიწერილ კითხვებზე პასუხი არ მიგვიღია.
2025 წლის 26 ივნისს ფეისბუქგვერდი „სურები ჰესი“ ავრცელებს ინფორმაციას: „ადგილობრივი მოსახლეობის მიერ დაფუძნებულ ააიპ ,,ზემო სურების განვითარების ფონდსა“ და კომპანია ,,სურები ჰესს“ შორის მჭიდრო და ნაყოფიერი თანამშრომლობის შედეგად, ურთიერთგაგების მემორანდუმი გაფორმდა”, _ აღნიშნულია მათ მიერ გავრცელებულ ინფორმაციაში.
ამავე გვერდზე ვიგებთ, რომ კომპანია სურებში მხოლოდ ერთი ჰესის მშენებლობას გეგმავს.
“სსიპ გარემოსდაცვითი ინფორმაციისა და განათლების ცენტრის ვებ-გვერდიდან ვიგებთ, რომ ხვალ, 17 ივლისს 15:00 საათზე, ჩოხატაურის მუნიციპალიტეტის სოფ. ზემო სურების ადმინისტრაციული ერთეულის შენობაში დაგეგმილია სკოპინგის ანგარიშის საჯარო განხილვა – შპს „ენერჯი დეველოფმენტ ჯორჯიას“ მიერ მდ. სუფსაზე 15 მგვტ დადგმული სიმძლავრის „სურები 2 ჰესის“ მშენებლობა-ექსპლუატაციის შესახებ”.
ინფორმაციისთვის: 2024 წლის 6 სექტემბერს გარემოს დაცვის და სოფლის მეურნეობის სამინისტროს საიტზე გავრცელდა ინფორმაცია, რომ „სურები 2 ჰესის“ სკოპინგის განხილვა გაუქმდა, რადგან “სუფსა 2 ჰესის” შესახებ ადმინისტრაციული წარმოება შეწყდა.
ამავე თემაზე: https://gurianews.com/suphsa2-hesis-shesakheb-administratsiuli-tsarmoeba-shetsqhda/
ავტორი
