რუსეთის საგარეო საქმეთა სამინისტროს ოფიციალურმა წარმოამდგენელმა მარია ზახაროვამ რუსეთ-საქართველოს 2008 წლის ომთან დაკავშირებით სოციალურ ქსელში განცხადება გააკეთა.
„2008 წლის 7-8 აგვისტოს ღამეს, სააკაშვილის რეჟიმმა, საქართველო-სამხრეთ ოსეთის კონფლიქტის მოგვარების შესახებ ყველა საერთაშორისო შეთანხმების დარღვევით, სამხრეთ ოსეთზე შეიარაღებული თავდასხმა განახორციელა.
ამავდროულად, თავდასხმა გახორციელდა შერეული სამშვიდობო ძალების რუსი სამშვიდობოების ადგილმდებარეობებზე.
ქართული აგრესიის განზრახვა, რამაც გამოიწვია მრავალი მსხვერპლი მშვიდობიანი სამხრეთ ოსეთისა და რუსეთის მოქალაქეებს შორის, მოგვიანებით ოფიციალურად დადასტურდა, კერძოდ, კავკასიაში კონფლიქტის მიზეზების გამოძიების საერთაშორისო კომისიის ანგარიშში, რომელიც მოქმედებდა ევროკავშირის ეგიდით და რომელსაც ხელმძღვანელობდა შვეიცარიელი დიპლომატი ჰ. ტალიავინი.
იმ სიტუაციაში, როდესაც საერთაშორისო საზოგადოებამ თავი დაანება აგრესორის დამშვიდების მცდელობებს, რუსეთი აღმოჩნდა ერთადერთი ქვეყანა, რომელმაც დროული და ადეკვატური რეაგირება მოახდინა ამ მზაკვრულ თავდასხმაზე. მოსკოვმა ჯერ ოპერაცია ჩაატარა, რითაც აიძულა საქართველო შეეწყვიტა ომი, მოგვიანებით კი სამხრეთ ოსეთი და აფხაზეთი სუვერენულ დამოუკიდებელ სახელმწიფოებად აღიარა.
შეიარაღებული აგრესიის მოგერიების კიდევ ერთი შედეგი იყო ახალი მოლაპარაკების მექანიზმის – კავკასიაში უსაფრთხოებისა და სტაბილურობის შესახებ საერთაშორისო მოლაპარაკებების ამოქმედება, რომლის მთავარი ამოცანაა აფხაზეთისა და სამხრეთ ოსეთის საიმედო უსაფრთხოების უზრუნველყოფა ორივე რესპუბლიკასა და ქართულ მხარეს შორის პირდაპირი დიალოგის შენარჩუნებით.
ძირითადად, ამ ფორმატისა და მისი ეგიდით მოქმედი მხარეების ურთიერთქმედების მექანიზმების წყალობით, ბოლო წლებში შესაძლებელი გახდა შედარებითი სიმშვიდის შენარჩუნება ქართულ-აფხაზურ და ქართულ-სამხრეთ ოსურ სასაზღვრო ზოლებში, რაც მინიმუმამდე ამცირებს დაძაბულობის ესკალაციის რისკებს.
არსებობს შესაძლებლობა, იმედი გვქონდეს მოლაპარაკებებში პროგრესზე _ ბოლო ერთი წლის განმავლობაში საქართველოს ხელისუფლების მიერ სამხრეთ ოსეთის წინააღმდეგ სააკაშვილის აგრესიის ფაქტის საჯარო აღიარების, ასევე, აფხაზებთან და სამხრეთ ოსებთან შერიგების აუცილებლობის შესახებ განცხადებების ფონზე.
მნიშვნელოვანია, რომ საქართველოს ხელმძღვანელობის ეს მიდგომები გადამწყვეტი გახდეს თბილისის სოხუმთან და ცხინვალთან ურთიერთობების დამყარების საქმეში და ეს მიდგომები გადაიქცეს კონკრეტულ პრაქტიკულ ქმედებებად.
პრიორიტეტულ ამოცანებს შორისაა საქართველოს მიერ აფხაზეთისა და სამხრეთ ოსეთის წინააღმდეგ ძალის გამოუყენებლობის შესახებ იურიდიულად სავალდებულო შეთანხმების დადება, რაც არა მხოლოდ 2008 წლის აგვისტოს ტრაგიკული მოვლენების განმეორების საიმედო გარანტიას წარმოადგენს, არამედ თბილის-სოხუმ-ცხინვალის სამკუთხედში ნორმალიზაციისკენ სვლის საწყის წერტილიცაა.
სამი სახელმწიფოს სასაზღვრო რაიონებში სიტუაციის სტაბილიზაციას ხელს შეუწყობს საქართველო-აფხაზეთის და საქართველო-სამხრეთ ოსეთის საზღვრების დელიმიტაციის დაწყება და შემდგომი დემარკაცია. რუსეთი, როგორც აფხაზეთის, საქართველოსა და სამხრეთ ოსეთის უახლოესი მეზობელი, მზადაა სრულად შეუწყოს ხელი ამ პროცესებს“, _ წერს მარია ზახაროვა.
