აშშ-ის სპეციალურმა წარმომადგენელმა სტივ ვიტკოფმა, რომელსაც დიპლომატიური გამოცდილება არ აქვს, სტანდარტული პროტოკოლი დაარღვია, როდესაც მოსკოვში შეხვედრაზე სახელმწიფო მდივნის გარეშე მივიდა და საბოლოოდ რუსი დიქტატორის, ვლადიმერ პუტინის ზუსტი წინადადებების ჩანაწერის გარეშე დარჩა, _ ამის შესახებ Reuters ინფორმირებულ წყაროზე დაყრდნობით იუწყება.
6 აგვისტოს მოსკოვში ვიზიტის შემდეგ, ვიტკოფმა აშშ-ის პრეზიდენტს დონალდ ტრამპს, განუცხადა, რომ პუტინი მზად იყო მნიშვნელოვანი ტერიტორიული დათმობებისთვის უკრაინაში ომის დასასრულებლად. ტრამპმა მიესალმა ვიტკოფის „დიდ პროგრესს“ და დათანხმდა პუტინთან შეხვედრას ალასკაში, რითაც ნათლად აჩვენა, რომ ტერიტორიებია გაცვლაზე საუბარი შესაძლებელი იყო.
თუმცა, Reuters ცნობით, დიპლომატიური ძალისხმევა მალევე ქაოსში გადაიზარდა _ 7 აგვისტოს, რამდენიმე ევროპელ ლიდერთან სატელეფონო საუბრისას, აშშ-ის სპეცწარმომადგენელმა განაცხადა, რომ რუსი დიქტატორი დონეცკისა და ლუგანსკის რეგიონების სანაცვლოდ თავის ჯარებს ზაპოროჟიესა და ხერსონის რეგიონებიდან გაიყვანდა.
Reuters-ს დისკუსიებთან ახლოს მყოფმა ოთხმა პირმა განუცხადა, რომ ამ წინადადებამ სატელეფონო საუბრის ბევრი მონაწილე გააკვირვა, რადგან ის მკვეთრად ეწინააღმდეგებოდა კრემლის პოზიციის შესახებ მათ მიერ გაკეთებულ შეფასებებს.
თუმცა, მეორე დღეს, სტივ ვიტკოფმა შეცვალა თავისი ვერსია _ აშშ-ის სახელმწიფო მდივნის, მარკო რუბიოს მიერ ევროპელი ეროვნული უსაფრთხოების მრჩევლებთან ორგანიზებულ სატელეფონო საუბრისას, ვიტკოფმა განაცხადა, რომ პუტინს რეალურად არ შეუთავაზებია ჯარების გაყვანა ორი რეგიონიდან და იგი მზად იყო ნაკლებად მნიშვნელოვანი დათმობებისთვის _ დონეცკისა და ლუგანსკის რეგიონების სანაცვლოდ პუტინი არ მოითხოვდა ზაპოროჟიესა და ხერსონის რეგიონების რუსულ მიწებად ოფიციალურად აღიარებას.
Reuters ხაზს უსვამს, რომ რუსეთის-უკრაინის ომის დასრულების საქმეში ტრამპის ადმინისტრაციის ბოლო მცდელობების კულმინაცია გახდა ალასკაში წარუმატებელი და ჩავარდნილი სამიტი, რომლის დროსაც ტრამპი და პუტინი ერთმანეთს კეთილგანწყობით შეხვდნენ, თუმცა, სამშვიდობო შეთანხმებას ვერ მიაღწიეს.
ამერიკელმა ოფიციალურმა პირებმა, მათ შორის უკრაინაში სპეციალურმა წარმომადგენელმა კიტ კელოგმა, გამოთქვეს იმედგაცრუება იმის გამო, რომ იმ დროს, როდესაც შეერთებულმა შტატებმა „საბოლოოდ უფრო მკაცრი პოზიცია დაიკავა რუსეთთან მიმართებაში“, თეთრმა სახლმა ურთიერთგამომრიცხავი ინფორმაცია მიიღო.
9 აგვისტოს, უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინელები არ დაუთმობენ თავიანთ მიწას ოკუპანტებს და რომ ტერიტორიული საკითხი უკრაინის კონსტიტუციაში დევს, რომელსაც არავინ დაარღვევს. ხოლო თავდაცვის ძალები არ დატოვებენ დონბასის არაოკუპირებულ ნაწილს ცეცხლის შეწყვეტის სანაცვლოდ.
18 აგვისტოს, დონალდ ტრამპმა, ვაშინგტონში უკრაინის პრეზიდენტთან და ევროპელ ლიდერებთან შეხვედრის დროს განაცხადა, რომ ომის შესაძლო მისაღწევად, აუცილებელი იქნება „ტერიტორიების შესაძლო გაცვლის განხილვა“.
19 აგვისტოს აშშ-ს პრეზიდენტმა განაცხადა, რომ მისი პროგნოზით, რუსეთთან სამშვიდობო შეთანხმების შედეგად უკრაინა თავისი ტერიტორიის მნიშვნელოვან ნაწილს დაიბრუნებს. მან აღნიშნა, რომ სამშვიდობო შეთანხმება უკრაინას საშუალებას მისცემს, შეაჩეროს რუსეთის მიერ შვიდობიანი მოსახლეობის მკვლელობა და დააბრუნოს „ბევრი ტერიტორია“.
