დღეს სკოლებში ახალი სასწავლო წელი დაიწყო.
როგორც “გურია ნიუსს” ლანჩხუთის საგანმანათლებლო რესურსცენტრის ხელმძღვანელმა ნინო ჩიტაძემ განუცხადა, წელს ლანჩხუთის მუნიციპალიტეტის სკოლებს 237 პირველკლასელი ჰყავს.
_ რა სიახლეებით ხვდება საჯარო სკოლები ახალ სასწავლო წელს?
_ ლანჩხუთის მუნიციპალიტეტი ხვდება ორი ახალი ავტორიზებული სკოლით. ესენია ხაჯალიის და ლანჩხუთის პირველი საჯარო სკოლები. ამ სკოლებმა გაიარეს სრული ავტორიზაცია დათქმის, ანუ მონიტორინგის გარეშე. სრული 9 წლიანი ავტორიზაცია აქვს ორივე სკოლას. მიმდინარეობს შუხუთის საჯარო სკოლის რეაბილიტაცია. 2026 წელს უკვე სკოლა უნდა გადავიდეს თავის შენობაში და ველოდებით, რომ 2026 წელს კიდევ რამდენიმე სკოლის რეაბილიტაცია დაიწყება. ყველა სკოლა გახსნილია, ყველა სკოლა შეხვდა ახალ სასწავლო წელს, ზოგი თავის შენობაში და ვინც გადაყვანილია, იმ სკოლის შენობებში, სადაც გადაყვანილია.
_ რომელი სკოლებია გადაყვანილი?
_ ჯურუყვეთის პირველი სკოლაა გადაყვანილი ლესის სკოლაში. ველოდებით მშენებლობის დაწყებას. შუხუთის საჯარო სკოლა გადაყვანილია ნიგოითში, ნიგოითის დაწყებითი კორპუსი ნიგოითის ძირითად კორპუსშია გადაყვანილი, იქაც მშენებლობა უნდა დაიწყოს და ნინოშვილის საჯარო სკოლა გვყავს გადაყვანილი გულიანის საჯარო სკოლაში.
ინფორმაციისთვის, 2025-2026 სასწავლო წლის პირველი სემესტრი სკოლებში 29 დეკემბერს დასრულდება და 30 დეკემბრიდან 14 იანვრის ჩათვლის საახალწლო დასვენებები იქნება.
ავტორი
