“მითების დეტექტორის” გავრცელებული ინფორმაციით, ტექნიკური მთავრობის შესახებ პარტია “ფედერალისტების” გაყალბებული პოსტი ვრცელდება.
18-24 სექტემბერს ფეისბუქ ანგარიშებმა, მათ შორის, ანონიმური ანგარიშებმა “მრისხანე ბაბუაწვერა” და “გიგა ჩერგოლეიშვილი” პოლიტიკური პარტია “ფედერალისტების” ფეისბუქ პოსტის სქრინშოტი გამოაქვეყნეს. ფოტოზე პარტიის ლიდერის, თამარ ჩერგოლეიშვილის პირდაპირი ჩართვა ჩანს, რომლის აღწერაშიც ვკითხულობთ: “რეჟიმის ეროზია დავასრულე. კრიზისის დასაძლევად მზად ვარ შევქმნა ტექნიკური მთავრობა და დროებით პრემიერ-მინისტრის სავარძელი დავიკავო”.
გავრცელებული სქრინშოტი ყალბია. რეალური პოსტი, რომელიც ყალბი სქრინშოტის შესაქმნელად გამოიყენეს, პარტია “ფედერალისტების” გვერდზე 18 სექტემბერს გამოქვეყნდა. პოსტს პარტიის ლიდერის, თამარ ჩერგოლეიშვილის პირდაპირი ეთერი აქვს დართული, რომელშიც ჩერგოლეიშვილი თვითმმართველობის არჩევნებისა და სხვა პოლიტიკური თემების შესახებ დასმულ შეკითხვებს პასუხობდა. პოსტის ნამდვილ აღწერაში ვკითხულობთ: “4 ოქტომბრის ფარსში მონაწილეობა ეროვნული ინტერესებისთვის საზიანოა | თამარას ლაივი”.
აღსანიშნავია, რომ “ფედერალისტების” პირდაპირი ეთერი 18 სექტემბერს 21:06-ზე დაიწყო, პირველი გაყალბებული პოსტი კი ამავე დღეს, 21:15-ზე გამოჩნდა, ანუ მაშინ, როცა ეთერი ჯერ კიდევ მიმდინარეობდა.
პოსტი ანონიმურმა ანგარიშებმა, “მრიხანე ბაბუაწვერამ” და “გიგა ჩერგოლეიშვილმა” რამდენიმე წუთის შუალედში გაავრცელეს. სავარაუდოა, რომ გაყალბებული სქრინშოტის პირველწყარო “მრისხანე ბაბუაწვერაა”. “მითების დეტექტორს” მის მიერ გავრცელებული მსგავსი სტილით გაყალბებული სქრინშოტები წარსულშიც არაერთხელ აქვს გადამოწმებული (1;2;3;4). ანგარიში საკუთარ თავს თედო აბაშიძეს უწოდებს და ამ და სხვა სახელებით არაერთი პროფილი აქვს. სავარაუდოა, რომ “მრისხანე ბაბუაწვერასთან” ასევე არის დაკავშირებული ყალბი სქრინშოტის გამავრცელებელი მეორე ანონიმური ანგარიში გიგა ჩერგოლეიშვილი. ის ამავე სტილით გაყალბებულ პოსტებს ასევე სისტემატურად ავრცელებს. ანონიმურ ანგარიშს მითითებული აქვს, რომ პარტია “ფედერალისტებში” მუშაობს, ასევე, იყენებს თამარ ჩერგოლეიშვილის რედაქტირებულ ფოტოსა და “ფედერალისტების” ლოგოს.
