ჩოხატაურის მუნიციპალიტეტის სოფელ საჭამიასერის საჯარო სკოლის მოსწავლეები სასწავლო პროცესს ამავე სოფელში მდებარე ყოფილი საავადმყოფოს შენობაში გადიან. სკოლის ძველი შენობა, სადაც 55 მოსწავლე სწავლობდა, ავარიული მდგომარეობის გამო დემონტაჟს ექვემდებარება.
ჩოხატაურის საგანმანათლებლო რესურსცენტრის დირექტორის, შორენა სიხარულიძის ინფორმაციით, სკოლის შენობა 1973 წელს აშენდა და მისი დემონტაჟი უახლოეს პერიოდში დაიწყება:
“სსიპ ჩოხატაურის მუნიციპალიტეტის სოფელ საჭამიასერის საჯარო სკოლის შენობა 1973 წელს არის აშენებული. მისი დემონტაჟი მალე დაიწყება“, _ უთხრა შორენა სიხარულიძემ “გურია ნიუსს”.
“გურია ნიუსი” სოფელ საჭამიასერში იმყოფებოდა. ერთ-ერთი მშობლის თქმით, ადგილობრივებს ზუსტი ინფორმაცია არ აქვთ, როდის დაიწყება ძველი სკოლის დემონტაჟი და ახალი შენობის მშენებლობა. ადგილობრივების ნაწილი საკითხზე საჯაროდ საუბარს ერიდება.
ძველი სკოლის შენობაში იატაკი რამდენიმე ადგილას აყრილია, შესასვლელში, კედელზე კი გაკრულია საქართველოს სახელმწიფო ჰიმნის ტექსტი. მეორე სართულზე კედელთან დგას ბანერი, რომელზეც სულხან-საბა ორბელიანის ციტატაა დატანილი: “ავს კაცს ყოველი კაცი თავისი მსგავსი ჰგონია”. ერთ-ერთ ოთახში კი საახალწლო კედლის გაზეთია შემორჩენილი.
პარტია “ახალის” ჩოხატაურის ორგანიზაციის ლიდერის, ბაჩო ახალაძის თქმით, არსებული მდგომარეობა განსაკუთრებით მძიმე გავლენას მოსწავლეებზე ახდენს _ ბავშვებს განათლების მიღება სასწავლო პროცესისთვის შეუსაბამო გარემოში უწევთ:
“სოფელს დღემდე არ აქვს საკუთარი სკოლა და მოსწავლეებს განათლების მიღება ძველი საავადმყოფოს შენობაში უწევთ, რომელიც სასწავლო პროცესისთვის სრულიად შეუფერებელია. ბავშვებს უნდა ჰქონდეთ შესაძლებლობა, უსაფრთხო, თანამედროვე და ღირსეულ გარემოში ისწავლონ“, _ გვითხრა ბაჩო ახალაძემ.
მისივე თქმით, გარემო, რომელშიც ბავშვი სწავლობს, გავლენას ახდენს მის მოტივაციაზე, თვითშეფასებასა და განვითარების შესაძლებლობებზე.
ერთ-ერთი მშობლის განცხადებით, მოსწავლეები ყოფილი საავადმყოფოს შენობაში უკვე ოთხი წელია სწავლობენ და შენობაში მცირე სარემონტო სამუშაოებს მასწავლებლები, ძირითადად, საკუთარი ძალებით ასრულებენ.
“ოთხი წელია, ჩვენი შვილები ყოფილი საავადმყოფოს შენობაში სწავლობენ. შენობის მოწესრიგებაში ძირითადად მასწავლებლები მონაწილეობენ. ახლა გავიგეთ, რომ წელს ძველ სკოლის შენობას დაანგრევენ და დაახლოებით ორ წელში ახალს ააშენებენ“, _ თქვა მშობელმა.
“გურია ნიუსი” სხვა მშობლებთან გასაუბრებასაც შეეცადა, თუმცა, მათ კომენტარის გაკეთება არ ისურვეს.
ჩოხატაურის საგანმანათლებლო რესურსცენტრის ხელმძღვანელის განმარტებით, სკოლის ძველი შენობის სხვადასხვა ნაწილში გაჩნდა მრავალრიცხოვანი და ღრმა ბზარები, რომლებიც დროთა განმავლობაში გაიზარდა და შენობის მდგრადობასა და უსაფრთხოებას საფრთხე შეუქმნა.
შორენა სიხარულიძის თქმით, სკოლის ადმინისტრაციამ მოსწავლეებისა და პედაგოგების უსაფრთხოების უზრუნველსაყოფად შესაბამის უწყებებს მიმართა. ადგილზე იმყოფებოდნენ საგანმანათლებლო და სამეცნიერო ინფრასტრუქტურის განვითარების სააგენტოსა და ლევან სამხარაულის სახელობის სასამართლო ექსპერტიზის ეროვნული ბიუროს წარმომადგენლები.
“პირველადი შეფასების საფუძველზე, მიზანშეწონილად იქნა მიჩნეული სასწავლო პროცესის შეჩერება, ვინაიდან არსებული დაზიანებები რეალურ საფრთხეს ქმნიდა. შესაბამისად, მივიღეთ გადაწყვეტილება, სასწავლო პროცესი დროებით ალტერნატიულ სივრცეში გადაგვეტანა“, _ თქვა სიხარულიძემ.
მისივე ინფორმაციით, მოსწავლეების, მშობლებისა და სკოლის ადმინისტრაციის ერთობლივი გადაწყვეტილებით შეირჩა ყოფილი საავადმყოფოს შენობა, რომელიც ჩოხატაურის მუნიციპალიტეტის საკუთრებაშია.
შენობის ტექნიკური მდგომარეობა ექსპერტებმა შეისწავლეს და გასცეს რეკომენდაცია, რომლის საფუძველზეც სკოლას მიეცა უფლება, სწავლა დროებით აღნიშნულ სივრცეში გაეგრძელებინა.
შორენა სიხარულიძის თქმით, ახალი სკოლის მშენებლობა მომავალი წლის სამოქმედო გეგმაშია გათვალისწინებული და ამის შესახებ სკოლის ადმინისტრაციას ოფიციალურად ეცნობა.
რესურსცენტრის ხელმძღვანელის თქმითვე, სკოლის ადმინისტრაციას ასევე შესთავაზეს, სასწავლო პროცესი მეორე ცვლაში კოხნარის საჯარო სკოლაში გაეგრძელებინა, თუმცა, აღნიშნული ვარიანტი ადგილობრივი მოსახლეობისთვის მიუღებელი აღმოჩნდა.
ავტორი
