რამდენად სწორად ხდებოდა ა(ა)იპ საფეხბურთო კლუბ ლანჩხუთის “გურიაში” თანხების კანონთან შესაბამისობაში განკარგვა, ეს საკრებულოს წევრთათვის მსჯელობის ერთ-ერთი მთავარი საკითხია.
საქმე ისაა, რომ, დაახლოებით, ერთი თვის წინ, ლანჩხუთის საკრებულოს წევრმა რომან ბიწაძემ სკანდალური განცხადება გააკეთა და აღნიშნა, რომ საქმე სისხლის სამართლის დანაშაულთან გვქონდა.
“საფეხბურთო კლუბ “გურიას” ა(ა)იპ-ებიდან სესხად აქვს აღებული თანხები. ეს არის პირდაპირ სისხლის სამართლის დანაშაული. აუდიტის დასკვნიდან გავიგე, რომ კლუბს “ბავშვთა საფეხბურთო სკოლიდან” _ 2 000 ლარი, ხოლო “გურია 2 000”-დან 3 000 ათასი ლარი უსესხებია თავის დროზე. მერე ვიგებ, რომ ბაღებიდან 10 000 ლარი გამოუთხოვია, უპოვართა სასადილოდან და სხვა სამსახურებიდანაც არის იგივე შემთხვევები. თუ ვინმე ფიქრობს, ა(ა)იპ-ების ხელმძღვანელებმა ერთ დღეს სიზმარი ნახეს და გაღვიძებულებმა გადაწყვიტეს, “გურიას” უჭირს და ფული ვასესხოთო, ძალიან ცდება. ეს რომ გამგებლის ნებართვის გარეშე არ იქნებოდა, ამას წყალი არ გაუვა”, _ ამბობდა მაშინ ბიწაძე.
მას შემდეგ ამ თემას აქტუალობა არ დაუკარგავს და იქედან მოყოლებული, საკრებულოს წევრები აღმასრულებელი რგოლის მიმართ ხშირად აჟღერებენ კითხვას, რამდენად კანონთან შესაბამისობაშია ამგვარი ქმედება. გარდა ამისა, დეპუტატები იმის გარკვევასაც ცდილობენ, რეალურად რა რაოდენობის ვალი ერიცხება საფეხბურთო კლუბ ლანჩხუთის “გურიას”. მათი კითხვების ადრესატი გამგეობის აუდიტის სამსახურია.
როგორც საკრებულოს სხდომაზე სამსახურის უფროსმა გია ნაჭყებიამ თქვა, მან ეს ფაქტები საკრებულოს აპარატის უფროსის, ნინო ძიძიგურის მიერ მიწოდებული ოქმის საფუძველზე შეისწავლა.
“აპარატის უფროსმა გადმომცა სხდომის ოქმი. გეტყვით, რომ ა(ა)იპ ისეთი სამსახურია, რომელსაც დავალიანება არ უნდა ჰქონდეს _ უნდა იმოქმედოს წინასწარ შედგენილი ხარჯთაღრიცხვის ფარგლებში. კლუბის ხელმძღვანელობას ვაცნობე, რომ თუ არ მოხდება შტატების ოპტიმიზაცია, ისევ ვალი დარჩება.
რაც შეეხება მეორე საკითხს, აუცილებლად დავწერდი დასკვნაში, რომ ა(ა)იპ-ებს შორის ფულის სესხად გაცემა მიზანშეწონილი არაა. შეიძლება ერთ ა(ა)იპ-ის გამოუჩნდა თავისუფალი თანხა და ასესხა მეორეს, მაგრამ თუ მაინცდამაინც, ეს უნდა ხდებოდეს წლის შიგნით. ისე მექანიზმსაც ვერ ვხედავ როგორ უნდა დაბრუნდეს ეს თანხა”, _ განმარტავს აუდიტის სამსახურის უფროსი.
რომან ბიწაძის თქმით, ამ შემთხვევაში ერთადერთი მექანიზმი საქმისადმი მართალი მიდგომაა: “ყველამ ვიცით, რომ “გურია” ბანკროტია და ბაღების გაერთიანებიდან ფული როგორ უნდა ასესხო?! საკრებულოს სხდომაზე რომ არ გაჟღერებულიყო ეს ფაქტი, ის ფული უკან არ დაბრუნდებოდა. მთავარი პრობლემა ისაა, რომ ა(ა)იპ-ები არღვევენ მთავარ წესს და გამგებელი ამას ან არ ხედავს, ან არ უნდა დაინახოს”.
დეპუტატ კახა ასკურავას თქმით კი, ბაღების გაერთიანების ხელმძღვანელს დავით წულაძეს “გურიასთვის” ფულის სესხების ნებართვა გამგებლისა და გამგეობის იურისტისგან მიუღია:
“ჩვენი ფრაქციის სხდომაზე დავით წულაძემ თქვა, რომ ფულის გასესხების ნებართვა ზაზა ურუშაძისგან და შოთა ჩაგუნავასგან ჰქონდა”, _ განმარტა ასკურავამ და აქვე გამგებელს ის განცხადებაც შეახსენა, რომელიც მან ორი წლის წინ, ბაღების ცენტრში გახორციელებული დაკავების შემდეგ გააკეთა: “თქვენ მაშინ თქვით, რომ “ვირთხები” უნდა დაისაჯონო. ძალიან არ მომეწონა ეს “ვირთხები”. ისე, ისინი თუ “ვირთხები” იყვნენ, ესენი რით არიან “კატები”?!”
გამგებელმა ზაზა ურუშაძემ ძველი ამბავი გაიხსენა და “ვირთხების” თემა “გურია ნიუსის” ჟურნალისტს გადააბრალა:
“შენ ფულის სესხებასა და ქრთამის აღებას შორის სხვაობას ვერ ხედავ?! ბავშვებს მოპარეს და რა მექნა, თავზე ხელი გადამესვა?! რაც შეეხება “ვირთხებს”, გეტყვით, როგორც იყო საქმე: ჟურნალისტმა დამირეკა და ახსენა ვირთხები, თან დაამატა, “ვირთხებს” როგორ უნდა მოექცნენო, მე ვუპასუხე, უნდა დაისაჯონ,-მეთქი. ეს იყო, მეტი არაფერი”, _ საქმის არსი ასე “განმარტა” ურუშაძემ.
ურუშაძის თქმით, რამდენიმე დღის წინ მან დაწერა ბრძანება და აუდიტის სამსახური საფეხბურთო კლუბსაც შეამოწმებს:
“ვნახავთ რა მდგომარეობაა. არავითარ “ბომბს” არ დავიტოვებ _ თუ სადმე რამე დარღვევა იქნება, ყველა აგებს პასუხს. არავის წინაშე არანაირი ვალდებულება არ მაქვს, ხელს არავის დავაფარებ, თავადაც სტრუქტურაში ნამუშევარი ვარ.
ბავშვთა ფეხბურთში იყო დარღვევა, მივეცით დრო და გამოსწორდა. კულტურის ცენტრში იყო დარღვევა და ახლა რეგიონის პროკურატურა იძიებს საქმეს. თუ აუდიტის დასკვნაში იქნება მითითებული რომ ფაქტის მოკვლევა აღემატება ჩვენს კომპეტენციას და სამართალდამცავი ორგანოებისთვისაა გადასაცემი, გადავცემთ კიდეც”, _ დასძინა გამგებელმა.
