ოფიციალური ინფორმაციით, ოთხშაბათს, დილით, ყაზახეთის ქალაქ აქტაუში კატასტროფა განიცადა „აზერბაიჯანის ავიახაზების“ თვითმფრინავმა, რის შედეგადაც ბორტზე მყოფი 67 ადამიანიდან 38 დაიღუპა.
Euronews-ის ინფორმაციით, ჩეჩნეთის დედაქალაქ გროზნოსთან მიახლოებისას, რომლისკენაც ბაქოდან მიფრინავდა თვითმფრინავი, მგზავრებმა გაიგონეს აფეთქების ხმა, რასაც მოყვა ლაინერის ფუზელაჟზე რკინის ნამსხვრევების დაცემის ხმები.
საინფორმაციო სააგენტო AnewZ ციტირებს რუს სამხედრო ბლოგერს, რომელიც ამტკიცებს, რომ თვითმფრინავის დაზიანება შეეძლო გამოეწვია საზენიტო-სარაკეტო გასროლას _ როგორც ცნობილია, ქალაქი გროზნო რუსეთის არტილერიის გაძლიერებული დაცვის ქვეშ იმყოფება, რადგან კადიროვის ჩეჩენი „ბოევიკები“ უკრაინის არმიისთვის მნიშვნელოვანი სამიზნეა. ამიტომ რუსეთის ჰაერსაწინააღმდეგო ძალებმა „აზერბაიჯანის ავიახაზების“ თვითმფრინავი საეჭვოდ მიიჩნიეს და რაკეტა ესროლეს, _ ამტკიცებს რუსი ბლოგერი.
ამის შემდეგ რეისი 8432 იძულებული გახდა 500 კილომეტრამდე ეფრინა დაზიანებული ფუზელაჟით და ავარიულად დამჯდარიყო ქალაქ აქტაუდან სამი კილომეტრის დაშორებით.
„აზერბაიჯანის ავიახაზების“ ინფორმაციით, თვითმფრინავში მყოფი მგზავრებიდან 37 აზერბაიჯანის მოქალაქეები იყვნენ, 16 – რუსეთის, 6 _ ყაზახეთის და 3 _ ყირგიზეთის.
FlightRadar24-ის მონაცემებით, ლაინერმა აქტაუს აეროპორტთან მიახლოებისას ჰაერში რვიანი მოხაზა, მისი ფრენის სიმაღლე ხან იზრდებოდა, ხან კი მცირდებოდა, ბოლოს კი მიწაზე დაჯდა ან დაეცა.
თავიდან აზერბაიჯანის პროკურატურა იუწყებოდა, რომ სიკვდილს 32 ადამიანი გადაურჩა, თუმცა, ბოლო მონაცემებით, გადარჩენილთა რიცხვი 29-მდე შემცირდა.
აზერბაიჯანის პრეზიდენტმა ილჰამ ალიევმა განაცხადა, რომ ავარიის მიზეზებზე საუბარი ჯერ ნაადრევია, თუმცა, აღნიშნა, რომ ცუდი ამინდის გამო, თვითმფრინავი იძულებული გახდა კურსი შეეცვალა.
სამგზავრო თვითმფრინავი ჩამოვარდა _ ბორტზე 67 ადამიანი იმყოფებოდა
