პოლიტიკის ექსპერტი გია ხუხაშვილი ,,გურია ნიუსთან“ საუბრისას აცხადებს, რომ მმართველ გუნდში ურთიერთობების დალაგება მხოლოდ ბიძინა ივანიშვილს შეუძლია. მისი თქმით, დღეს მმართველი გუნდის წევრებმა სისხლიანი 9 წლის მონაწილეები მოკავშირეებად გაიხადეს, რაც, მისი განცხადებით, საზოგადოებისთვის თვალში ნაცრის შეყრას ნიშნავს.
,,ქართული ოცნების“ პრობლემა ის არის, რომ კოლექტიური მურუსიძის სიმბიოზი შექმნეს. მიშა სააკაშვილის გუშინდელი მომსახურე პერსონალი, რომლის ხელითაც ძალადობდა წინა რეჟიმი, დღეს არა თუ ემსახურება ამ ხელისუფლებას, არამედ მათ პარტნიორებად მოგვევლინნენ. უკვე ვინ სად არის, ამის გარჩევა შეუძლებელია. საქმე იქამდეც მივიდა, რომ ის პოლიტიკური ქილერები, რომლებიც პოლიტიკური მკვლელობებით იყვნენ დაკავებულნი, დღეს სისხლიან 9 წელზე გველაპარაკებიან. მათ, ალბათ, ჰგონიათ, რომ ამნეზია გვაქვს. მე აბსოლუტურად მესმის მმართველი გუნდის წევრის დავით ჭიჭინაძის ბოლოდროინდელი განცხადებების. სჯობდა, ამ საკითხებზე მასთან ერთად სხვებსაც ელაპარაკათ. დღეს ,,ქართულ ოცნებაში“ არეულობა არავის აწყობს, ამიტომ ისინი შეეცდებიან, შუღლი კალთის ქვეშ დამალონ. რეალურად კი ურთიერთობების დალაგება მხოლოდ ბიძინა ივანიშვილს შეუძლია. დღეს ,,ქართული ოცენებაში“ მიმდინარე პროცესები, დაახლოებით, ჰგავს სიტუაციას, როცა დაწყებითი კლასის მასწავლებელი გავა საკლასო ოთახიდან და გაკვეთილის დროს ერთი ალიაქოთი ატყდება“, _ განაცხადა ხუხაშვილმა.
