ავთანდილ წილოსანი, რომელიც ლანჩხუთში, ჟორდანიას 122 ნომერში, ყოფილი უნივერმაღის უკან, 501 კვადრატული მეტრის მიწის ნაკვეთის მფლობელია, ადგილობრივი ხელისუფლების მიმართ პრეტენზიებს გამოთქვამს.
როგორც წილოსანი ჟურნალისტებთან საუბარში ყვება, სწორედ ადგილობრივი ხელისუფლების გულგრილი და მისთვის გაუგებარი დამოკიდებულების გამო, ქონების ჯეროვნად გამოყენების და იქ შენობა-ნაგებობის დადგმის საშუალება არ ეძლევა, რაც მის კომერციულ საქმიანობას მნიშვნელოვან ზარალს აყენებს.
“რვა წელია, არ მეძლევა საშუალება, ჩემს საკუთრებაში არსებული მიწის ნაკვეთი სათანადოდ გამოვიყენო, რითაც მნიშვნელოვანი ზიანი ადგება ჩემს კომერციულ საქმიანობას”, _ ამბობს ავთანდილ წილოსანი.
მისივე თქმით, თავის საკუთრებაში არსებული მიწის ნაკვეთსა და უნივერმაღს შორის სამი მეტრი სიგანის გზის დაფიქსირებამ გადაკვეთა მისი კუთვნილი მიწის ფართის კოორდინატები, რის გამოც დღის წესრიგში დადგა წილოსანის საკუთრებაში არსებული ქონების ახალი კოორდინატების დადგენა.
“იქედან გამომდინარე, რომ გზა და ჩემი მიწა ერთმანეთთან კვეთაში მოდიოდა, მერიის ქონების მართვის სამსახურმა მომწერა წერილი, რომ შემესწორებინა ჩემი კოორდინატები. მეც, შესაბამისად, საჯარო რეესტრში შევიტანე შესწორებული ნახაზი. ამის შემდეგ კი საჯარო რეესტრმა ეს ნახაზი იდენტობისთვის გადმოაგზავნა, თუმცა, რატომღაც მერიის მხრიდან არ ხდება იდენტობის დადგენა. შესაბამისად, რეესტრმაც უარი განაცხადა ნახაზის ცვლილებაზე და ახალი კოორდინატების დარეგისტრირებაზე.
საქმე ისაა, რომ ერთ-ერთ მეზობელთან სასამართლო დავა მაქვს, შესაბამისად, იგი ხელს არ მომიწერს იდენტობის საბუთზე. მეორე მეზობელმა ხელი კი მოაწერა დოკუმენტს, თუმცა, სანაცვლოდ, ჩემგან მისთვის სასარგებლოდ გარკვეული მიწის ფართის დათმობა ითხოვა, რათა ჩემი საზღვრიდან მისთვის შენობასთან მისასვლელი დავტოვო. ამაზე უარი ვთქვი, რადგან 20 კვ.მ. ისეთი ადგილის დათმობა მიწევდა, რომელიც გზიდან ხედვადია და ამით აქვს კომერციული მნიშვნელობა ჩემს ნაკვეთს. თუ გზა უნდოდა, თავისივე ფართიდან უნდა დაეტოვებინა _ ეს ხომ ძალიან მარტივია?! ჩემი უარის გამო, უკან წაიღო თავისი ხელწერა, სანამ საბუთი რეესტრში გადაიგზავნებოდა. მესამე მეზობელი კი თავად მუნიციპალიტეტია, რომელიც იქვე საკუთრების მფლობელია, თუმცა, რატომღაც არ აწერს ხელს იდენტობის დამადასტურებელ დოკუმენტს. როგორც ჩანს, მუნიციპალიტეტის ხელმძღვანელობა გარკვეულ პირთა გავლენის ქვეშაა და არ სურს, ვიღაცეების განაწყენება. აქედან გამომდინარე, მე ვრჩები ძველ კოორდინატებში, რომელიც რეგისტრირებულია საჯარო რეესტრში”, _ ამბობს ავთანდილ წილოსანი.
მისივე თქმით, კეთილი ნების ქონის შემთხვევაში, არანაირ პრობლემას არ წარმოადგენს კოორდინატების დადგენა და საკუთრების დარეგისტრირება. ამის თაობაზე წერილობითაც მიმართა მუნიციპალიტეტის მერიას მიმდინარე წლის მაისში.
“ჩემს საკუთრებაში არსებული მიწის ნაკვეთის დაზუსტებული ფართობი 501 კვადრატული მეტრია, რომელსაც წინა მხრიდან ესაზღვრება ყოფილი უნივერმაღის შენობა, რომლის, ასევე, დაზუსტებული ფართობია 1 118 კვ. მეტრი. საჭიროა ავიღოთ უნივერმაღის შენობის ოთხი წერტილი კოორდინატი ახალი ჯი პი ეს აპარატურით, შემდეგ ამ შენობას მოვარგოთ თავისი 1 118 კვ. მეტრი ფართობი, ამ ფართობის უკანა საზღვრიდან დავსვათ სამმეტრიანი გზის კოორდინატები და ამის შემდეგ აიზომოს ჩემი მიწის ნაკვეთი”, _ ვკითხულობთ წილოსანის მიერ მერიისთვის გაგზავნილ წერილში, რომელიც მიმდინარე წლის 11 მაისითაა დათარიღებული. იქვე წილოსანი მერიას მიმართავს, რომ მის მიერ ამ პრინციპით იყო შეკვეთა მიცემული შპს “გეო პროექტზე”, რომელმაც ჩაატარა ეს აზომვები და დასვა კოორდინატები.
როგორც ავთანდილ წილოსანი ამბობს, აღნიშნული ნახაზები და მასთან ერთად დისკდართული ყოფილი უნივერმაღის შენობის ნახაზიც გადასცა მერიას, რომლის გადამოწმებაც ექსპერტთან შეეძლოთ.
“თუ თქვენ ამ პროცედურების ჩატარება არ გსურთ, მაშინ გთხოვთ მომცეთ თანხმობა, ჩემი კუთვნილი ნაკვეთის ძველი კოორდინატებით შემოღობვაზე, რადგან ამდენი ხნის ლოდინის შემდეგ, ჩემს კომერციულ საქმიანობას ადგება დიდი ზარალი, ჩემს საკუთრებაში არსებულ მიწის ნაკვეთს ვერ ვიყენებ თითქმის რვა წელია”, _ ვკითხულობთ წილოსანის მერიისადმი მიმართვაში.
როგორც წილოსანის ნაამბობიდან ირკვევა, მან მუნიციპალიტეტს არაერთხელ მიმართა, რომ მისთვის კუთვნილი ტერიტორიის შემოღობვის უფლება მიეცათ, თუმცა, მისივე ინფორმაციით, ყოველ ჯერზე მერიისგან უარყოფითი პასუხი მიიღო:
“რამდენჯერმე მივმართე წერილობით მერიას, რომ მსურდა კუთვნილი ტერიტორიის მოსაზღვრე ტერიტორიებიდან გამოყოფა, ანუ შემოღობვა, თუმცა, მერიისგან ყოველ ჯერზე პასუხად მივიღე, რომ მას მიზანშეწონილად არ მიაჩნია შეღობვითი სამუშაოების წარმოება. არადა, რასაც ვითხოვ ისაა, რომ მომეცეს ჩემი საკუთრების ჯეროვნად გამოყენების და იქ შენობა-ნაგებობის აგების საშუალება. თუმცა, ფაქტია, რომ ელემენტარულად ტერიტორიის შეღობვის საშუალებაც კი არ მაძლევენ”, _ ამბობს ავთანდილ წილოსანი.
მისი თქმით, რამდენიმე დღის წინ, ადგილობრივი ხელისუფლების თანხმობით, ტერიტორიაზე, რომელიც მის საკუთრებას წარმოადგენს, სამუშაოების საწარმოებლად ერთ-ერთი კომპანია შევიდა:
“ჩემი ტერიტორიის საზღვრებში, ერთ-ერთი მოსაზღვრის შენობისთვის კანალიზაციის სისტემის გასაყვანად შემოვიდა ერთ-ერთი კომპანია. როგორც გავარკვიე, თანხმობა ამასთან დაკავშირებით მერიისგან მიიღო. 112-ში გადავრეკე და შევძელი სამუშაოების მიმდინარეობის შეჩერება. თუ ახალ კოორდინატებზე უარს მეუბნებიან, ძველი კოორდინატების მიხედვით ის ნაკვეთი მე მეკუთვნის, სადაც სამუშაოებს აპირებდნენ. არადა, იდენტობა რომ მომცეს ან მერიამ, ან მოსაზღვრემ, ამ უკანასკნელს თავისუფლად შეეძლება სამუშაოს ჩატარება, რადგან ამ ადამიანებს მარტივად ვეუბნები _ უნივერმაღის კოორდინატების აღება მარტივია, შენობაა და მას ვერსად წაიღებ. იქიდან გადაიზომოს 3 მეტრი გზისთვის და ამის შემდეგ დაფიქსირდეს ჩემი კოორდინატები. მიუხედავად იმისა, რომ უკან დაწევა მე კომერციულად მაზიანებს, ამაზე თანახმა ვარ! თუმცა, გზაც უნდათ, კოორდინატებსაც არ ასწორებენ და რაც საჯარო რეესტრში ჩემს სახელზეა, იქ სამუშაოების ჩატარება სურთ! გასაგებად ვამბობ, მომცენ იდენტობა და გზაც დარჩება და კანალიზაციასაც გაიყვანენ. ახლა მეუბნებიან, თურმე, ვალდებული ვარ, მოსაზღვრეს დავუთმო აუცილებელი მნიშვნელობის გაყვანილობისთვის გზა, ამ შემთხვევაში კანალიზაციისთვის! სამწუხაროდ, კანონს სწორად ვერ და არ კითხულობენ _ ეს ვალდებულება მაშინ მაქვს, თუ მოსაზღვრეს სხვა გზა არ აქვს, თორემ შენი საზღვრის პირამდე 10 სანტიმეტრი არ დატოვო და შენობა ააშენო იმ გეგმით, რომ მერე მეზობელი ვალდებული იყოს, დაგითმოს თავის გზა, ასე სად არის?” _ ამბობს ავთანდილ წილოსანი, რომელიც საკუთარი უფლებების დასაცავად დავის გაგრძელებას სასამართლოში აპირებს.
წილოსანის მხრიდან მერიის მისამართით გაჟღერებული პრეტენზიების საპასუხოდ “გურია ნიუსი” მუნიციპალიტეტის მერს, ალექსანდრე სარიშვილს დაუკავშირდა, რომელმაც გვითხრა, რომ აღნიშნულ საკითხთან დაკავშირებით საქმის კურსში იყო, თუმცა, კონკრეტული ინფორმაციის მისაღებად მერიის ქონების მართვის სამსახურში გადაგვამისამართა. მანამდე გვითხრა, რომ წილოსანის მეზობლის როლში მუნიციპალიტეტი ვერ გამოდგებოდა და შესაბამისად, ვერც ხელს მოუწერდა იდენტობის დასადგენად:
“მუნიციპალიტეტი ვერ იქნება წილოსანის მეზობელი და ხელს ვერ მოუწერს, თუმცა, ჩემთვის გაუგებარია, თუ ყველა ის დოკუმენტი, რომელიც ავთანდილ წილოსანმა წარმოგვიდგინა, მართლაც სწორია, რატომ ვერ მოძებნა იმხელა სამეზობლოში ერთი ხელის მომწერი?!” _ თქვა ალექსანდრე სარიშვილმა.
რაც შეეხება მერიის ქონების მართვის სამსახურის პოზიციას, მისი ხელმძღვანელი გია ნაჭყებია ამბობს, ავთანდილ წილოსანს პრობლემები აქვს ნახაზთან დაკავშირებით და ამის გამო ვერ ხდება მისთვის ქონების რეგისტრირება ახალი კოორდინატებით:
“ნახაზთან დაკავშირებით პრობლემებია _ ორი ნახაზი აქვს, ხან ერთს წარმოგვიდგენს, ხან _ მეორეს. ჩვენ არაერთხელ მივმართეთ მას, წარმოედგინა სწორი ნახაზი, თუმცა, არ მოხერხდა”, _ ამბობს ნაჭყებია.
მისივე ინფორმაციით, მერიამ შპს “კოოპუნივერმაღის” თანამესაკუთრეებს მიმართა წერილობით, რომ დასვან ზუსტი კოორდინატები ჯი პი ეს აპარატურით და მიაწოდონ განახლებული ამონაწერი საჯარო რეესტრიდან, სიტუაციური ნახაზი დასმული კოორდინატებით.
