ლანჩხუთის მუნიციპალიტეტის მომავალი წლის ბიუჯეტის პროექტი განხილვის სტადიაშია. დოკუმენტს, რომელსაც ხელს მუნიციპალიტეტის პირველი პირი აწერს, 10 030 600 ლარითაა განსაზღვრული და საჯარო განხილვის შემდეგ პროექტი ადგილობრივ საკანონმდებლო ორგანოში გადაინაცვლებს სამსჯელოდ.
საბოლოო სახის ჩამოყალიბებამდე წინასწარ შეუძლებელია იმის გათვლა, თუ რა სახის შესწორებები შევა დოკუმენტში. თუმცა, ფაქტია, რომ წინა წლების მსგავსად, ადგილობრივ ბიუჯეტში მთავარ პრიორიტეტად ამჯერადაც ინფრასტრუქტურა, განათლება, კულტურულ-სპორტული ღონისძიებები და სოციალური კუთხით გასახორციელებელი პროგრამები მიიჩნევა.
როგორც წარმოდგენილი პროექტიდან ირკვევა, პრიორიტეტულ დარგებს შორის ადგილობრივი ბიუჯეტიდან ყველაზე მეტი თანხა განათლების სფეროს დასაფინანსებლადაა გათვალისწინებული. ბიუჯეტის პროექტის მიხედვით, მისი დაფინანსების წილი ორი მილიონ 518 ათასი ლარითაა წარმოდგენილი, საიდანაც 18 ათასი ლარი სხვადასხვა ღონისძიების დასაფინანსებლადაა, დარჩენილი ორ მილიონ ნახევარი კი მთლიანად ა(ა)იპ სკოლამდელი სააღმზრდელო ცენტრის ფუნქციონირებისთვისაა გათვალისწინებული. სპორტის, ახალგაზრდობისა და კულტურის სფეროს დასაფინანსებლად პროექტის მიხედვით, ჯამში, ორი მილიონ 225,2 ათასი ლარი დაგეგმილი. აქედან, სპორტის წილი მილიონ 53 ათასი ლარია, კულტურის _ მილიონ 162,2 ათასი ლარი, ახალგაზრდობის წილი კი 10 ათას ლარითაა განსაზღვრული.
როგორც აღნიშნული პროექტიდან ირკვევა, ადგილობრივი ბიუჯეტის ხარჯზე მუნიციპალიტეტის მასშტაბით სხვადასხვა ინფრასტრუქტურული ღონისძიებების გასატარებლად 988.6 ათასი ლარის გახარჯვაა გათვალისწინებული. ამ თანხიდან, თუ არ ჩავთვლით საპროექტო დოკუმენტაციისა და საექსპერტო მომსახურების შესყიდვისთვის გათვალისწინებულ 350 ათას ლარს, ყველაზე მეტი თანხა 345 ათასი ლარის ოდენობით გარე განათებისთვისაა გათვალისწინებული, საგზაო ინფრასტრუქტურის მოსაწყობად ადგილობრივი ბიუჯეტი 100 ათასი ლარის გახარჯვას ითვალისწინებს. წყლის სისტემების განვითარებისთვის კი _ 63 ათასი ლარია გათვალისწინებული. დანარჩენი თანხა სასაფლაოების მოვლა-პატრონობაზე, მუნიციპალური ტრანსპორტის განვითარებასა და ინფრასტრუქტურულ პროექტებს უნდა მოხმარდეს.
პრიორიტეტთა შორისაა დასუფთავება და გარემოს დაცვა, რისთვისაც, ჯამში, მილიონ 150 500 ითვალისწინებს პროექტი. ამ თანხიდან მცირედი, ხუთი ათასი ლარის ოდენობით, მიუსაფარი ცხოველების მოვლითი ღონისძიებებისთვის არის დაგეგმილი; 145,5 ათასი ლარი მწვანე ნარგავების მოვლა-პატრონობას უნდა მოხმარდეს; დარჩენილი მილიონი ლარით დასუფთავებისა და ნარჩენების გატანის ღონისძიებებზეა დასახარჯი.
რაც შეეხება, ასევე, პრიორიტეტად მიჩნეულ ჯანმრთელობის დაცვისა და სოციალური უზრუნველყოფის პროგრამის დაფინანსებას, წარმოდგენილ პროექტში მისი წილი დაფინანსება 701,8 ათასი ლარითაა განსაზღვრული.
