დეკანოზ გიორგი მამალაძისგან ჩავიბარე აღსარება, თუმცა, ზიარება ჩემი პრეროგატივა ვერ იქნება, რადგან მას სინოდზე მღვდელმსახურება აქვს შეჩერებული, – ამის შესახებ ე.წ. მატროსოვის ციხიდან გამოსვლის შემდეგ მამა რევაზ სიხარულიძემ ჟურნალისტებს განუცხადა.
მისი თქმით მამა გიორგიმ ყველაფერი უთხრა, რაც აწუხებდა. მისი მდგომარეობა ახლა დამაკმაყოფილებელია და იგი ნორმალურად იკვებება:
”ვისთვის ეს შიმშილობა იყო, ვისთვის – მკაცრი მარხვა, თვითონ იფიქრონ. აღსარება ჩავიბარე. რაც შეეხება ზიარებას, ეს ჩემი პრეროგატივა ვერ იქნება, რადგან სინოდზე მას შეჩერებული აქვს მღვდელმსახურება. ზიარება გამოძიების დასრულების შემდეგ უნდა მოხდეს”, _ აცხადებს მამა რევაზ სიხარულიძე. მისივე თქმით, დეკანოზის ზიარების საკითხი სინოდმა უნდა გადაწყვიტოს.
რაც შეეხება გიორგი მამალაძის 6-დღიან შიმშილობას, სასულიერო პირის შეფასებით, ეს დიდი ცოდვა იყო: “შიმშილობა – ესაა პროტესტის აქტი, რომელიც თვითმკვლელობით უნდა დამთავრდეს და ესაა ყველაზე
დიდი ცოდვა. ასე რომ, ეს, რა თქმა უნდა, არასწორი იყო.“
მამა რევაზ სიხარულიძე ადასტურებს, რომ დეკანოზი სრულიად საქართველოს კათოლიკოს-პატრიარქთან შეხვედრას კვლავ ითხოვს, თუმცა მამა რევაზის განცხადებით, გამოძიების დასრულებამდე ეს რამდენად მოხერხდება, ამის თქმა ძნელია.
„ის ცდილობს, რომ თავი გაიმართლოს და ეს გამოძიების დასრულების შემდეგ გამოჩნდება“, – განაცხადა მან.
შეგახსენებთ, რომ დეკანოზი გიორგი მამალაძე მკვლელობის მომზადების ბრალდებით თბილისის საერთაშორისო აეროპორტში 10 თებერვალს დააკავეს. ის ბერლინში პატრიარქთან მიფრინავდა. ილია მეორეს HELIOS Klinikum Berlin-Buch-ში ოპერაციისთვის ამზადებდნენ. ჟურნალისტმა ირაკლი მამალაძემ პროკურატურას აცნობა, რომ მამა გიორგიმ ციანიდის მოძიებაში დახმარება სთხოვა, რითაც მაღალი იერარქიის სასულიერო პირი უნდა მოეწამლა. პროკურატურა მას განზრახ მკვლელობის მცდელობაზე ედავება.
