ოზურგეთის #60 საოლქო საარჩევნო კომისიის #45 საუბნო საარჩევნო კომისიის (სოფელი შემოქმედი) წევრს ვლადიმერ ერქომაიშვილს, რომელიც „ევროპული საქართველოს“ წარმომადგენელია, 2000-ლარიანი ჯარიმა ელის.
ამის მიზეზი მისი ფეისბუქია, რომლის საშუალებით ერქომაიშვილი გაერთიანებული ოპოზიციის საპრეზიდენტო კანდიდატის გრიგოლ ვაშაძის აგიტაციას ეწევა და საზოგადოებას ვაშაძის მხარდაჭერისკენ მოუწოდებს.
ერქომაიშვილის მიერ კანონდარღვევის ფაქტი „გურია ნიუსმა“ აღმოაჩინა და შესაბამისი მტკიცებულებები „ახალგაზრდა იურისტთა ასოციაციას“ გაუგზავნა.
თავად ერქომაიშვილი მიიჩნევს, რომ კანონი არ დაურღვევია და თითქმის ყოველდღე გრიგოლ ვაშაძის მხარდამჭერი პოსტების გაზიარება აგიტაციას არ ნიშნავს:
_ აგიტაცია არ გამიწევია. უბრალოდ, გრიგოლ ვაშაძის მხარდამჭერი პოსტები მომეწონა და გავაზიარე. არ ვფიქრობ, რომ კანონი დავარღვიე, _ ამბობს ერქომაიშვილი ჩვენთან საუბრისას.
თუმცა, ასე არ მიიჩნევენ იურისტები და განმარტავენ, რომ ერქომაიშვილის ქმედება 2000-ლარიანი ჯარიმით ისჯება.
_ საქართველოს საარჩევნო კოდექსის 45 მუხლის მე-4 პუნქტის, „ა“ ქვეპუნქტის თანახმად: წინასაარჩევნო აგიტაციის გაწევის და აგიტაციაში მონაწილეობის უფლება აქვს ნებისმიერ პირს, გარდა: ა) საარჩევნო კომისიის წევრისა . საარჩევნო კოდექსის მე-2 მუხლის „ჰ.1 ქვეპუნქტის მიხედვით წინასაარჩევნო აგიტაცია არის – ამომრჩეველთა მოწოდება საარჩევნო სუბიექტის/საარჩევნო სუბიექტობის კანდიდატის მხარდასაჭერად ან საწინააღმდეგოდ, აგრეთვე ნებისმიერი საჯარო მოქმედება, რომელიც ხელს უწყობს ან ხელს უშლის მის არჩევას, ან/და რომელიც შეიცავს წინასაარჩევნო კამპანიის ნიშნებს, მათ შორის, წინასაარჩევნო ღონისძიების ორგანიზებაში/ჩატარებაში მონაწილეობა, საარჩევნო მასალების შენახვა ან გავრცელება, მხარდამჭერთა სიებზე მუშაობა, პოლიტიკური პარტიების წარმომადგენლობებში ყოფნა;
საარჩევნო ადმინისტრაციის მოხელეთა ეთიკის კოდექსის მე-5 მუხლის მე-2 პუნქტის, „ბ“ ქვეპუნქტი ავალდებულებს საარჩევნო ადმინისტრაციის მოხელეებს, რომ „თავი აარიდონ ისეთ მოქმედებებს, რომლებიც შეიძლება აღქმულ იქნეს, რომელიმე პარტიისა თუ საარჩევნო სუბიექტის მხარდამჭერად /წინააღმდეგ ქმედებად“; აქედან გამომდინარე, ოზურგეთის #45 საარჩევნო უბნის კომისიის წევრის, ვლადიმერ ერქომაიშვილის მიერ „ფეისბუქის“ პირად გვერდზე „გაერთიანებული ოპოზიციის“ საპრეზიდენტო კანდიდატის გრიგოლ ვაშაძის მხარდამჭერი პოსტების გაზიარება შეიძლება ჩავთვალოთ, როგორც მის მიერ წინასაარჩევნო აგიტაციაში უკანონო მონაწილეობა, _ აღნიშნა ჩვენთან საუბრისას ახალგაზრდა იურისტთა ასოციაციის ოზურგეთის ოფისის თავმჯდომარემ თამაზ ტრაპაიძემ, რომლის განმარტებით, ეს დარღვევა 2 000 ლარის ჯარიმას ითვალისწინებს.
კომისიის წევრს რომ აგიტაცია აკრძალული აქვს, „გურია ნიუსთან“ საუბრისას ადასტურებს ოზურგეთის საოლქო საარჩევნო კომისიის თავმჯდომარე ზვიად თენიეშვილიც. მისივე თქმით, ამ კონკრეტულ საქმეზე გადაწყვეტილებას მას შემდეგ მიიღებს, რაც ოლქში საჩივარი შევა.
როგორც გავიგეთ, ამ თემაზე საჩივარს ახალგაზრდა იურისტთა ასოციაცია ამზადებს.
