გასული 24 საათის განმავლობაში გურიაში კორონავირუსით ინფიცირების 33 შემთხვევა დაფიქსირდა. მათგან 24 ოზურგეთში, 9 კი ლანჩხუთში გამოვლინდა.
ოზურგეთის საზოგადოებრივი ჯანდაცვის ცენტრის დირექტორის, მაია ქუტიძის თქმით, სოფელ შრომაში ვითარება სტაბილურია.
„ინფიცირების 24 შემთხვევიდან, სოფელ შრომაში გამოვლინდა 2 შემთხვევა. შეინიშნება ინფიცირების შემთხვევების კლება. ვითარება სტაბილურია“,_ გვითხრა ქუტიძემ.
სოფელში ისევ არის ბლოკპოსტი და მოსახლეობის თერმოსკრინინგი, საჭიროების შემთხვევაში კი ტესტირება მიმდინარეობს.
ქუტიძის ინფორმაციით, სულ ოზურგეთში აქტიურია ინფიცირების 84 შემთხვევა, საიდანაც სტაციონარში სამკურნალოდ იმყოფება 23, საკარანტინე სივრცეში 15, ბინაზე – 46 .
ლანჩხუთში ბოლო 24 საათში დაფიქსირებული ინფიცირების 9 შემთხვევა სხვადასხვა სოფლებშია გამოვლენილი. ამის შესახებ ლანჩხუთის საზოგადოებრივი ჯანდაცვის ცენტრის დირექტორმა, ნატო მენაღარიშვილმა გვითხრა.
„ახალი არის 9 შემთხვევა. გამოვლინდა სხვადასხვა სოფლებში. სადაც ცხელი წერტილები იყო, ისევ ცხელ წერტილებად რჩება. იქ ჯერ კიდევ არის აქტიური შემთხვევები, გვყავს რამდენიმე გამოჯანმრთელებულიც“,_ გვითხრა მენაღარიშვილმა.
ლანჩხუთის საზოგადოებრივი ჯანდაცვის ცენტრის დირექტორის ინფორმაციით, ამ დროისთვის ლანჩხუთში აქტიურია ინფიცირების 154 შემთხვევა, რომელთაგან რამდენიმე პაციენტის მდგომარეობა საყურადღებოა.
„სულ აქტიურია 154 შემთხვევა. ინფიცირებული პაციენტებიდან რამდენიმე საყურადღებოა, ისინი კლინიკაში მკურნალობენ, მათ შორის ჩვენი მედპერსონალიც. 154 პაციენტიდან კლინიკაში არის 22 პაციენტი, 2 საკარანტინე სივრცეში, დანარჩენები ბინაზე მკურნალობენ“,_ გვითხრა მენაღარიშვილმა.
რაც შეეხება ჩოხატაურს, საზოგადოებრივი ჯანდაცვის ცენტრის დირექტორი, ნატო ჯიბუტი გვეუბნება, რომ ბოლო 24 საათის განმავლობაში ინფიცირების შემთხვევა არ დაფიქსირებულა.
„ჩოხატაურში გასული 24 საათის განმავლობაში კორონავირუსით დაინფიცირების შემთხვევა არ გამოვლენილა.
„ამ დროისთვის აქტიურია ინფიცირების 15 შემთხვევა, მათგან 2 კლინიკაშია მოთავსებული, დანარჩენები ბინაზე მკურნალობენ“,_ გვითხრა ჯიბუტმა.
