არაერთი წელია, რაც ლანჩხუთის მუნიციპალიტეტის აკეთის ადმინისტრაციული ერთეულის მოსახლეობას გზის პრობლემა აწუხებს. მათი თქმით, გზის აღნიშნულ მონაკვეთზე ტრანსპორტით გადაადგილება სირთულეს წარმოადგენს. მოსახლეობა კი, ხშირ შემთხვევაში, სოფელ აცანიდან შემოვლითი გზით სარგებლობს, რომ გადაუდებელი აუცილებლობის გამო, მუნიციპალიტეტის ცენტრამდე ჩავიდეს.
მიუხედავად ადგილობრივი ხელისუფლების მხრიდან არაერთხელ გაცემული პირობისა, რომ გზა გაკეთდებოდა, პრობლემა კვლავაც მოუგვარებელია. ადგილობრივთა თქმით, ჰქონდათ იმედი, რომ სოფლის მთავარი გზის მოწესრიგება მიმდინარე წლის გაზაფხულზე დაიწყებოდა, თუმცა, სამწუხაროდ, მათი ეს მოლოდინი არ გამართლდა.
“ეს უმოკლესი გზაა, რომელიც ლანჩხუთს მეზობელ ჩოხატაურთან და კურორტ ბახმაროსთან აკავშირებს, ამიტომ განსაკუთრებული დატვირთვა ზაფხულობით აქვს. დიდი იმედი და მოლოდინები გვქონდა, რომ გზის რეაბილიტაცია გაზაფხულზე დაიწყებოდა. რამდენიმე თვის წინ, სოფელ გაგურში მუნიციპალიტეტის მერი ალექსანდრე სარიშვილი როცა შეგვხვდა ადგილობრივებს, გვითხრა, რომ გზის მშენებლობა დღის წესრიგში იყო და გაზაფხულისთვის აუცილებლად დაიწყებოდა. დაიმედებულები ვიყავით, ზაფხულის დადგომისთანავე მოწესრიგებული გზა გვექნებოდა, მაგრამ გაზაფხული კი არა, ნახევარი ზაფხული გავიდა და ჯერაც არაფერია გაკეთებული”, _ ამბობს აკეთის მოსახლეობა.
მათი ინფორმაციით, სოფლის მთავარ გზაზე ავტოტრანსპორტით გადაადგილება კვლავინდებურად პრობლემას წარმოადგენს. საუბარია, დაახლოებით, თხუთმეტ კილომეტრიან მონაკვეთზე, რომელიც იწყება, ე. წ. “ინწრუას” ხევიდან და მთავრდება სოფელ ზომლეთის გადასახვევთან. მოსახლეობის თქმითვე, ამ ეტაპზე, მათი მხრიდან მთავარი აქცენტი გზის იმ შვიდკილომეტრიან ნაწილზე კეთდება, რომელიც სოფელ შუხუთიდან გაგურის ცენტრამდე მონაკვეთს მოიცავს: “უკვე აღარაფერს ვამბობთ სოფლის შიდა გზებზე, რომელიც, ასევე, მოუწყობელია და ავდარში ფეხით გადაადგილებაც კი ჭირს”, _ ამბობენ ადგილობრივები.
“მთელ აკეთს ერთი მიკროავტობუსი ემსახურება და ისიც დღეში ერთხელ აკეთებს რეისს რაიონული ცენტრის მიმართულებით. ამ პანდემიის პირობებში, საბედნიეროდ, მოსახლეობის რაოდენობა აკეთის ადმინისტრაციის ოთხივე სოფელში გაიზარდა. ბევრი დაუბრუნდა მამაპაპისეულ კარ-მიდამოს და ყველა მათგანის საწუხარი ახლა ერთია _ სოფელს არ აქვს არა თუ კეთილმოწყობილი, არამედ ელემენტარულად მოწესრიგებული გზა და არც სასმელი წყალი, რომელიც ყველასთვის მთავარ საჭიროებას წარმოადგენს. სასმელ წყალს წყაროებიდან ვეზიდებით, გზაზე კი ისეთი მდგომარეობაა, მსუბუქი მანქანები გაჭირვებით დადიან. გზის უვარგისობის გამო, ტაქსიც ძნელად ამოდის სოფელში. სურსათისა და აუცილებელი ნივთების შესაძენად ლანჩხუთში, ოზურგეთსა და ჩოხატაურში გვიხდება ჩასვლა, რაც წამების ტოლფასია ჩვენთვის.
მოხრეშავენ ამ გზას, მოვა ნიაღვარი, წაიღებს, მერე ისევ მოიხრეშება და წლებია, ასე გრძელდება დაუსრულებლად. ადგილობრივი ხელისუფლებისგან ზამთარში მივიღეთ პირობა, რომ სოფლის გზა კაპიტალურად მოწესრიგდებოდა და დიდი იმედი გვქონდა, სიტყვა შესრულდებოდა, მაგრამ, ჯერჯერობით, არაფერი შესრულებულა. ეს უკვე ბოლო წვეთი იყო მოთმინების”, _ ამბობს აკეთის მოსახლეობა და თუ უახლოეს პერიოდში აკეთის გზაზე ინფრასტრუქტურული სამუშაოების გახორციელება არ დაიწყება, პროტესტის მწვავე ფორმით იმუქრებიან.
“თუ მოკლე ხანში ამ გზის მშენებლობა არ დაიწყება, ან არჩევნებს ბოიკოტს გამოვუცხადებთ, ან სოფელ შუხუთთან ცენტრალურ მაგისტრალს გადავკეტავთ. როცა ცოტანი ვიყავით, დაგვჩაგრეს, ახლა უკვე ბევრი დაბრუნდა სოფელში და ყველა რომ სათითაოდ დავდგეთ გზის სავალ ნაწილზე და ტრანსპორტი არ გავატაროთ, ვნახავთ, თუ არ მოგვხედავენ. ყელში ამოვიდა ამდენი დაპირება. წლებია, სოფელს არ აქვს ცენტრალური გზა,
შიდა გზებზე ჯერ კიდევ არაფერი გვითქვამს და მთავარი გზა მაინც გაგვიკეთონ _ სოფელში ცხოვრება გვინდა, ოჯახები გვყავს”, _ ამბობენ ადგილობრივები.
იმის გასარკვევად, თუ რატომ არ შესრულდა დათქმულ ვადებში აკეთის მოსახლეობისთვის მუნიციპალიტეტის ხელმძღვანელობის მხრიდან გაცემული პირობა, “გურია ნიუსი” ლანჩხუთის მერიის ინფრასტრუქტურის სამსახურს დაუკავშირდა.
როგორც სამსახურის უფროსმა ლევან ჩხაიძემ გვითხრა, აკეთის მთავარ გზაზე სარეაბილიტაციო სამუშაოების კონკრეტულ ვადებში დაწყების პირობა მერიას არ გაუცია:
“ჩვენ სოფლის მოსახლეობას ვუთხარით, რომ დაპროექტება და გზის მშენებლობა 2020 წელს მოხდებოდა, თუმცა, არ თქმულა კონკრეტული ვადები. სამუშაო საავტომობილო გზების დეპარტამენტმა უნდა განახორციელოს, რაც და ის მიმდინარე წლისთვისაა გათვალისწინებული”.
