„ახალი სკოლის მოდელის“ ირგვლივ მასწავლებლებს უამრავი შენიშვნა თუ პრეტენზია გააჩნიათ; აქედან გამომდინარე, მეცნიერთა და პედაგოგთა თავისუფალი პროფკავშირების ხელმძღვანელმა, მაია კობახიძემ, სკოლის ადმინისტრატორთა ასოციაციასთან ერთად, ახალი სამოქმედო გეგმა შეიმუშავა, გაიმართა შეხვედრა და მაია კობახიძემ, კრიტიკული მოსაზრებებიც გამოთქვა, რომელთაც უცვლელად გთავაზობთ:
- „ახალი სკოლის“ მოდელი დაიწყო მოუმზადებლად, ისე რომ არ არსებობს ნორმატიული აქტები და მეთოდური მასალები. შეუსაბამობაა სახელმძღვანელოებსა და ახალი თაობის ეროვნული სასწავლო გეგმის მოთხოვნებს შორის;
- მოუმზადებელია სკოლების მატერიალურ-ტექნიკური ბაზა, რაც არ შეესაბამება „ახალი სკოლის“ მოდელით გათვალისწინებული ვალდებულებების შესრულებას;
- ახალი სკოლის მოდელის განხორციელება დაიწყო ფართო საზოგადოებრივი განხილვების, პედაგოგთა ჩართულობისა და მათთან მსჯელობის გარეშე;
- პედაგოგთა მომზადების სისტემაში ხარვეზებია;
- წარმოდგენილი მოდელი რამდენჯერმე ზრდის პედაგოგის დატვირთვას, რაც პირდაპირ კავშირშია მათი შრომითი უფლებების დარღვევასთან.
იმედს გამოვთქვამთ, ახალი სკოლის მოდელის ავტორები გაითვალისწინებენ შეხვედრაზე გამოთქმულ კრიტიკულ შენიშვნებს. ძვირფასო კოლეგებო, ამ ეტაპზე თქვენი ჩართულობა შემოიფარგლება კრიტიკული შენიშვნებით, ვინაიდან, ყველა სიახლე ხორციელდება მასწავლებლის მიერ საკლასო ოთახში და არათანმიმდევრული, ნაჩქარევი რეფორმის წარუმატებლობა გადაბრალდება მასწავლებელს. აქედან გამომდინარე, სპმთპ გეგმავს „ახალი სკოლის“ მოდელის განხილვას მასწავლებლების მონაწილეობითაც.
წყარო: etaloni.ge
