“ახლის გაკეთებას ვინ ამბობს _ რაცაა, იმასაც არ უვლიან!”

დაზიანებული სკამები და საფეხბურთო კარი, მოშლილი ინფრასტრუქტურა, ბალახსა და ნაგავში ჩაფლული სპორტული მოედანი _ ეს ის რეალობაა, რომელიც დაბა ჩოხატაურში, ბენდელიანის ქუჩაზე შესულებს თვალში აუცილებლად მოგხვდებათ.

ადგილობრივები ამბობენ, რომ ამ პრობლემის მოგვარების თხოვნით, ადგილობრივ ხელისუფლებას არაერთხელ მიმართეს, თუმცა, უშედეგოდ:

_ ამ ქუჩაზე უამრავი ბავშვი ცხოვრობს, რომლებიც ხელისუფლების უყურადღებობის გამო, სპორტული მოედნით სარგებლობას ვერ ახერხებს. 10 წლის წინ გააკეთეს და მას შემდეგ განახლებაზე არავის უფიქრია. იყო დრო, როცა აქ ჩემპიონატებსაც კი ატარებდნენ, მაგრამ რამდენიმე წელია, მოუვლელი და პრაქტიკულად განადგურებულია. არც სკამია, არც საფეხბურთო კარის ბადე, არც განათება. ირგვლივ ბალახები და სამშენებლო ნაგავი ყრია. არაერთხელ მივმართეთ ხელისუფლებას, რომელსაც ჯანსაღი ცხოვრების წესის პოპულარიზაცია, სკვერებისა და ბაღების მოწყობა საარჩევნოდ ახსენდებათ, მაგრამ შედეგი ვერა და ვერ მივიღეთ. ახლის გაკეთებას ვინ ამბობს, რაცაა იმასაც არ უვლიან! _ ამბობენ ადგილობრივები.

ჩოხატაურის მუნიციპალიტეტის მერის, ირაკლი კუჭავას თქმით, სპორტული მოედნის რეაბილიტაცია გეგმაში აქვთ:

_ ეს მოედანი, თუ სწორად მახსოვს, თითქმის 10 წლის წინ მოეწყო. რეაბილიტაციას ნამდვილად საჭიროებს და ვგეგმავთ კიდეც მომავალ წელს, თუმცა, მცირე სარემონტო სამუშაოებს არც წელს გამოვრიცხავთ. პრობლემას ადგილზე გაეცნობიან მერიის ინფრასტრუქტურის თანამშრომლები და მივიღებთ გადაწყვეტილებას, _ აღნიშნა ჩვენთან საუბრისას მერმა.

_ ბატონო ირაკლი, ადგილობრივი მოსახლეობა ამბობს, რომ ამ პრობლემის მოგვარება ბევრჯერ გთხოვეს…

_ რაც შეეხება ამ ქუჩის მოსახლეობის პრეტენზიებს, მინდა ვთქვა, რომ ამ ადგილიდან 500-600 მეტრის რადიუსში არის ორი სპორტული მოედანი. ასე, რომ, სპორტით დაინტერესებულ ახალგაზრდებს ხელი არ ეშლებათ. თუმცა, ეს არ ნიშნავს, რომ ამ ადგილის რეაბილიტაციას არ გავახორციელებთ, _ გვითხრა კუჭავამ.