ლანჩხუთის მუნიციპალიტეტში, სოფელ აკეთში რამდენიმე საათის განმავლობაში გადაკეტილი იყო სოფლის ცენტრალური გზა. მოსახლეობა ცენტრალური ავტობანის მშენებლობაზე დასაქმებულ მძიმეწონიან მანქანებს, რომელთაც აკეთის ადმინისტრაციული ერთეულიდან ინერტული მასალა გააქვთ, გადაადგილების საშუალებას არ აძლევდნენ.
აქციის მთავარი მონაწილე ლია ჭეიშვილი და მისი ოჯახის წევრები იყვნენ, რომლებიც მიყენებული ზიანის სანაცვლოდ ჩინური კომპანიისგან კომპენსაციას ითხოვდნენ.
„ექვსი თვეა ამ დღეში ვართ. არაერთხელ ჩავაყენე საქმის კურსში შესაბამისი უწყებები, თუმცა, ამ დრომდე შედეგი არაფერია. თვეების წინ უშუალოდ ჩინურ კომპანიაშიც ვიყავი მისული, ავუხსენი დეტალურად ყველაფერი. შემპირდნენ, რომ მოვიდოდნენ და ადგილზე გაეცნობოდნენ მდგომარეობას. თვეზე მეტი გავიდა მაგათ ლოდინში, მერე იძულებული გავხდი, გზა გადამეკეტა და აქცია გამემართა. ამის შემდეგ იყვნენ ამოსულები, გადაიღეს ფოტოები, განცხადებაც დამაწერინეს, მაგრამ აქამდე არაა კონკრეტული პასუხი და ვერავინ მაძლევს გარანტიას, მიიღებს თუ არა ჩემი ოჯახი კომპენსაციას იმ ზიანის სანაცვლოდ, რაც ამ მძიმეწონიანი მანქანების გადაადგილებით მოგვადგა. ყურადღება რომ მომაქციონ იძულებული ვარ, ისევ გზა გადავკეტო.
ამ მანქანების ხშირი მოძრაობის გამო წყალიც აღარ გვაქვს. სოფლის გზაც უვარგისი გახდა. სიცხეში მტვრის ბუღი დგას ირგვლივ, წვიმაში კი ისეთი ტალახია, ვერ გაივლი. გვითხრან, სკოლაში როგორ უნდა იარონ ბავშვებმა?! გასაგებია, ქვეყნისთვის მნიშვნელოვანი საქმე კეთდება ავტომაგისტრალის გაყვანით, მაგრამ ამის სანაცვლოდ სოფელი ხომ არ უნდა გავანადგუროთ?! გაგონილა 21-ე საუკუნეში წყალი და გზა არ ჰქონდეს ადამიანს?! სახლს ბზარები გაუჩნდა, ღობე აღარ დამიტოვეს, სიმინდსაც ვეღარ ვთესავთ ამათი გადამკიდე, ქვიშით გაივსო საყანე ფართობები. კეთილი ინებოს და თავად ჩინური კომპანიის წარმომადგენელი მოვიდეს აქ და მომცეს გარანტია, რომ ჩემი მოთხოვნები დაკმაყოფილდება. წინააღმდეგ შემთხვევაში, ამ მანქანებს არ გავატარებ“, _ თქვა ლია ჭეიშვილმა, რომელსაც ადგილზე მყოფი ლანჩხუთის პოლიციის განყოფილების წარმომადგენლები გზის გახსნასა და მანქანების გატარებას სთხოვდნენ. გარდა სამართალდამცავებისა და სოფლის რწმუნებულის, მანუჩარ ღლონტისა აქციის მონაწილეებთან შესახვედრად მუნიციპალიტეტის გამგებლის მოვალეობის შემსრულებელი ნუგზარ ცინცაძეც იმყოფებოდა. ჭეიშვილები ადგილზე სოფლის მაჟორიტარის, გოგი მორჩილაძის მისვლასაც ითხოვდნენ, დაუკავშირდნენ კიდეც მას ტელეფონით და მისგან აქციაზე მისვლის პირობაც მიიღეს, თუმცა, აქცია ისე დაიშალა მორჩილაძე მოსახლეობასთან არ მისულა.
ადგილზე სიტუაციის გაცნობის შემდეგ ნუგზარ ცინცაძე ტელეფონით ჩინური კომპანიის წარმომადგენელსაც დაუკავშირდა და აქციის მონაწილეებთან შესახვედრად კომპანიისგან ხელმძღვანელი პირის მოსვლა ითხოვა. ცინცაძის ეს რეაქცია ადგილზე ჩინური კომპანიის ერთ-ერთი წარმომადგენლის მისვლას მოჰყვა, რომლის თქმითაც, მოსახლეობის ყველა პრობლემა იქნებოდა დაკმაყოფილებული, გარდა კომპენსაციის გაცემისა, რასაც აქციის მონაწილეების მხრიდან უკმაყოფილება მოჰყვა.
„მე აქ ამოსული ვარ, როგორც მუნიციპალიტეტის ხელმძღვანელი პირი და, შესაბამისად, თქვენი კომპანიის პასუხისმგებელი პირი უნდა შეხვდეს აქციის მონაწილეებს, რომ კომპეტენტური პასუხი მიიღონ მათ მიერ გაჟღერებულ მოთხოვნებზე“, _ მიმართა ცინცაძემ ჩინური კომპანიის წარმომდგენელს სატელეფონო საუბრისას.
კომპანიის წარმომადგენელმა პირობა მისცა ნუგზარ ცინცაძეს, რომ ასეთი პირი აუცილებლად შეხვდებოდა ლია ჭეიშვილსა და მის ოჯახის წევრებს. საბოლოოდ, ჭეიშვილებმა გაითვალისწინეს სამართალდამცველთა თხოვდა და ავტობანზე მომუშავე მანქანებს გადაადგილების საშუალება კომპანიის ხელმძღვანელობასთან შეხვედრამდე მისცეს. თუმცა, იმ პირობით, რომ არაუგვიანეს ერთი კვირისა, მოთხოვნები გათვალისწინებული და დაკმაყოფილებული იქნება. წინააღმდეგ შემთხვევაში, ჭეიშვილები აქციის გაგრძელებას გეგმავენ, თან უფრო მწვავე ფორმით.
