დღეს, სოფელ ქვემო აკეთის ცენტრში მდებარე მაცხოვრის სახელობის ტაძართან ადგილობრივმა მოსახლეობამ კიდევ ერთხელ გამართა აქცია და იმ პრობლემებზე ისაუბრა, რაც მათ სოფელში კარიერის არსებობით შეექმნათ.
აქციის დასაწყისში სოფლის მაჟრიტარმა, გოგი მორჩილაძემ შეხვედრაზე მოსულ მუნიციპალიტეტის გამგებლის მოადგილეს, ნუგზარ ცინცაძეს გააცნო, რას ისახავდა მიზნად მათი ეს თავშეყრა. მორჩილაძის თქმით, მთლიანი სოფელი შეწუხებულია იმ საშიშროებით, რაც მათ სოფელში კარიერის ამოქმედების შემთხვევაში ემუქრებათ, ამიტომაც თვლიან, რომ ხელისუფლებამაც და სამუშაოების მწარმოებელმა კომპანიამ მაქსიმალურად უნდა გაითვალისწინონ მოსახლეობის ინტერესები.
მორჩილაძემ კომპანიას, რომელსაც ლიცენზია აქვს მოპოვებული აკეთში ინერტული მასალის წარმოებაზე, რომელიც ავტობანის მშენებლობისთვისაა გათვალისწინებული, ტყუილშიც დაადანაშაულა.
„დაგვპირდენ, რომ ბეტონის გზას დააგებდნენ 500 მეტრზე, რომ ტაძრისთვის საფრთხე არ შეექმნათ, თუმცა, ამის ნაცვლად, მხოლოდ ორი „მიქსერი“ ბეტონი დააგეს.
წარმოდგენა არ გვაქვს, რომელ ფირმას აქვს ლიცენზია მიღებული, მიუხედავად არაერთი მცდელობისა, ამის გაგება ვერავისგან ვერ შევძელით, რატომღაც გასაიდუმლოებულია. იყო კიდეც მოსული მოსახლეობასთან შეხვედრაზე მისი წარმომადგენელი, ვინმე ზურაბ მეგრელაძე, რომელიც აქეთ დაემუქრა ხალხს, რომ თუ სამუშაოების გაგრძელების საშუალებას არ მისცემდა, ნიღბიანებით დაარბევდა.
არაფერს უკანონოს ჩვენ არ მოვითხოვთ, არც მე და არც აქაურ მოსახლეობას ამგვარი მუქარებით ვერ დაგვაშინებენ. ჩვენ არ ვეწინააღმდეგებით ავტობანის მშენებლობას, მაგრამ ისე არ უნდა მოხდეს, რომ ერთი საქმის გაკეთების სანაცვლოდ სოფელი დავანგრიოთ. არადა, თუ ასე გაგრძელდა, ამ სოფელს მართლაც დიდი პრობლემები შეექმნება. აქ არც თხილის მოსავალი იქნება, არც სიმინდის, ეს ეკლესიაც დაიშლება.
-sofos-masalistvis1.jpg)
ადრე, როცა აქცია გავმართეთ, გვითხრეს, რომ კომპანიისთვის ჩვენი მოთხოვნები წარგვედგინა. გავუგზავნეთ გამგეობის მეშვეობით, თუმცა, ამ დრომდე სრული იგნორია მათი მხრიდან. პირობას ვდებთ, სანამ არ მოგვისმენენ და ჩვენს აზრს არ გაითვალისწინებენ, აქედან ერთი მანქანაც ვერ გავა ინერტული მასალით დატვირთული“, _ ამბობს სოფლის მაჟორიტარი, რომლის თქმითაც, გარკვეული სახის მუქარები მისი მისამართითაც იყო, თუმცა, მიუხედავად ამისა, ის ბოლომდე აპირებს იდგეს იქ, სადაც მისი ამომრჩეველია.
თუ რომელ კომპანიას აქვს უფლება ავტობანის მშენებლობისთვის აკეთის ადმინისტრაციიდან გაიტანოს ინერტული მასალა, ამის გარკვევას “გურია ნიუსი” გამგებლის მოადგილისგან შეეცადა, თუმცა, პასუხი ვერ მივიღეთ. აღნიშნულის შესახებ ინფორმაცია ვერც სოფელში რწმუნებულის თანაშემწისგან მივიღეთ.
აქციაზე შეკრებილებმა ნუგზარ ცინცაძეს გარდა კარიერის თემისა, იმ სხვა პრობლემების შესახებაც ესაუბრნენ, რაც მათ ძალიან აწუხებთ.
„აქცია რომ გვქონდა ადრე, იქ მოსულმა გამგებელმა გვისაყვედურა, ქვედა აკეთელებს რა გინდათო?! არ იცის, ერთი თემი რომ არის აკეთი?! ჩვენ ყველა ერთნაირი ადამიანები ვართ, უბრალოდ, თქვენ თანამდებობები გაქვთ მაღალი და ამიტომაც ვითხოვთ თქვენგან პასუხს. თქვენი პირდაპირი ვალია, რომ ეს თანამდებობები მოსახლეობას სასიკეთო საქმის კეთებაში მოახმაროთ. ვინმეს გაუგია აკეთში რამე გაკეთდაო?! გამგებელმა მოგვამადლა საბავშვო ბაღი გაგიკეთეთო. რაა მერე ორი ოთახი თუ გააკეთეს, ესაა სოფლის აშენება?! გაზი ჩვენ არ გვაქვს, გზა და წყალი ნორმალურად. აქციაზე, რომ მოვიდა გამგებელი, ბრძანა, აცანიდან ამოვედიო. რატომ არ ამოვიდა აკეთის გზით?! იმიტომ, რომ ისეთ დღეშია გზა, ჯიპებიც ძლივს დადიან. თოვლში გზა ვერ გაწმიდეს, სწვავი არ ეყო ტრაქტორსო. ტრაქტორს რომ უშვებდნენ, არ იცოდნენ, საწვავი რომ უნდოდა. მეზობლის სახლში ხანძარი რომ გაჩნდა, სახანძრო მანქანა ჩარჩა დანგრეულ ხიდში. გამგებელმა კი თავი იმართლა, სახანძროს მძღილი ნასვამი იყოო. კიდევ რომელი ერთი ჩამოვთვალოთ. უნდა გაითვალისწონოს გამგებელმა, რომ ადგილობრივი ხელისუფლება იმისთვის გვყავს, რომ პრობლემების მოგვარებაში დაგვეხმაროს.
ისე, არც ჩვენ ვართ შუხუთელებზე ნაკლები. იმათმა, გაზი რომ გაეყვანათ, თუ გზა გადაკეტეს და ლელოს ჩაშლით დაიმუქრნენ. რა, ჩვენ ვერ ჩავშლით ლელოს თუ რა?! მალე იქნება არჩევნები და დავანახებთ ხელისუფლებას, რა ძალაა აკეთი“, _ ისმოდა აქციის მონაწილეთა მხრიდან.
მათი თქმით, ისინი ლიცენზიის მქონე კომპანიას სთავაზობენ ალტერნატიულ გზას, რომლითაც გვერდს აუვლიდნან მაცხოვრის სახელობის ტაძარს და იმ ხუთ ოჯახსაც, რომელიც მიმდებარედ, მეწყერსაშიშ ზონაში ცხოვრობს.
„შევთავაზეთ, ეს როგორც ზემო აკეთში გააკეთეს, გაიყვანონ ალტერნატიული გზა, არის ამის საშუალება, თუმცა რატომღაც ამ წინადადებას არ ითვალისწინებენ“, _ ითქვა აქციაზე.
ერთ-ერთი მოსახლე, რომელიც სწორედ ამ მეწყერსაშიშ ზონაში ცხოვრობს, მამუკა გვარჯალაძეა, რომელიც თანასოფლელებთან ერთად აქციაზე იმყოფებოდა და გამგებლის მოადგილეს საკუთარი პრობლემის შესახებაც უამბო: „ექვს მარტს იყვნენ აქ მოსული,მხარის გუბერნატორი, გამგებელი, საგზაო დეპარტამენტის წარმომადგენლები და ვინმე მეგრელაძე, რომელმაც პირდაპირ დამადანაშაულა, რომ, თითქოსდა, ქრთამს ვითხოვდი. ქრთამს კი არა,
კომპენსაციას ვითხოვ. ჩემი სახლი მეწყერულ ზონაში მდებარეობს, კედლები დამსკდარია და ხუთი წელი რომ ამ გზაზე მძიმეწონიანი მანქანები ივლიან, ხომ მთლად დაინგრევა სახლი. იყო მოსული კომპანიის წარმომადგენელი, რომელმაც ჯერ შემომთავაზა ხუთი ათასი ლარი, ასე მევეჭრა და ავიდა ათი ათასზე. მერე დაშინება დაიწყო, მე თქვენი საუბარი ჩაწერილი მაქვსო. ყველა იქ იყო, გუბერნატორიც და გამგებელიც, რომ მემუქრებოდა.
კი გვეუბნებიან, დააზღვიეთ თქვენი სახლებიო, მაგრამ კარგად ვიცით, ეს დაზღვევა არ გინაზღაურებს რეალურ ზარალს. მარტო სახლი ხომ არაა, თხილის ფართობები გვაქვს, რომლითაც ოჯახებს ვარჩენთ.
რაზეა საუბარი, როცა გამგეობის ერთ-ერთი სამსახური გეტყვის, რას ითხოვ, ეს სახლი ხომ მაინც დაინგრევაო. წყალი თუ ჩამომდის სახლში და სახურავი არ მივარგა, ეს ნამდვილად ჩემი მოსაგვარებელი პრობლემაა, მაგრამ მიწა რომ იშლება, მე ეს როგორ გავაჩერო?! აქეთ გვაღიზიანებენ და დაგვცინიან, არავის აინტერესებს რეალურად ჩვენი პრობლემა“.
აქციაზე მყოფმა ამირან მორჩილაძემ “გურია ნიუსთან” საუბარში აქცენტი მაცხოვრის სახელობის ტაძარზე გააკეთა და ითხოვა, უშუალოდ საპატრიარქოდან მოიწვიონ სპეციალიტები, რომლებიც დადებენ დასკვნას, თუ რამდენად დასაშვებია, აქ დიდი სიმძიმის მქონე მანქანებმა იარონ, ისე რომ ტაძრის არსებობას საფრთხე არ შეექმნას.
„ამ ტაძრის ფუნდამენტმა არაერთხელ დაიწია, როგორც იქნა დასრულდა მისი აღდგენა და ახლა, ფაქტობრივად, მზად არის გასახსნელად. საპატრიარქოში არიან სათანადო სპეციალისტები, რომლებიც დადებენ რეალურ დასკვნას რამდენად დასაშვებია აქ დიდი სიმძიმის მქონე მანქანების ინტენსიური მოძრაობა. სოფელი ვერ დაუშვებს, რომ ეს ტაძარი განადგურდეს. არის საშუალება, რომ ალტერნატიული გზა გაიყვანონ, კეთილი ინებონ და ასე მოიქცნენ“, _ ამბობს მორჩილაძე.
აქციაზე მყოფთა არგუმენტების მოსმენის შემდეგ ნუგზარ ცინცაძემ შეკრებილებს აღუთქვა, რომ მათ დასმულ საკითხებს მიიტანდა ადრესატამდე და გამგებლის წარმომადგენელთან ერთად ადგილობრივი ხელისუფლება იმსჯელებდა ამ საკითხთან დაკავშირებით. აკეთელებმა კი დაანონსეს, რომ თუ მათი მოსაზრებები არ იქნებოდა გათვალისწინებული, მაშინ ისინი აქციას ლანჩხუთში, გამგეობის წინ გამართავენ.
