,,ქართული ოცნება – დემოკრატიული საქართველოს“ სამდივნოს გადაწყვეტილებით, დმანისის რაიონული ორგანიზაციის თავმჯდომარე გიორგი ტატუაშვილი, რომელიც ამავე დროს იკავებს დმანისის მერის თანამდებობას, პარტიის რიგებიდან გარიცხეს. ამის შესახებ ცნობილი რამდენიმე დღის წინ გახდა.
გარიცხვის მიზეზად კი, პარტიული დისციპლინის უხეში დარღვევა დასახელდა, რაც მის მიერ ,,ქართული ოცნების“ კონკურენტი“ კანდიდატების საარჩევნო კამპანიის მხარდაჭერაში გამოიხატა.
როგორც გიორგი ტატუაშვილის ფეისბუქგვერდიდან ირკვევა, ის მხარს მაჟორიტარი დეპუტატობის კანდიდატს დმანისში, კახაბერ ოქრიაშვილს უჭერს. დმანისის მერის ფეისბუქ გვერდზე 19 ივნისიდან ოქრიაშვილის არაერთი პოსტი აქვს გაზიარებული, თუმცა გიორგი ტატუაშვილი აღნიშნულ ინფორმაციას უარყოფს და მისთვის უცნობია რას გულისხმობდა პარტიის სამდივნო.
აღნიშნულ საკითხს ,,ქართული ოცნება-დემოკრატიული საქართველოს“ ყოფილი პოლიტსაბჭოს წევრი ალი ბაბაევი გამოხმაურა, მან ,,გურია ნიუსთან“ საუბრის განაცხადა, რომ გიორგი ტატუაშვილი არის პარტიის თავმჯდომარე დმანისის რაიონში, ამიტომ პარტიის პოლიტსაბჭომ მას უნდა კითხოს, რატომ წავიდა პარტიის წინააღმდეგ და მას უნდა მისცენ უფლება დაწეროს განცხადება და გადადგეს თანამდებობიდან.
,,პარტიის წესდების მიხედვით, პოლიტსაბჭომ და არა სამდივნომ, უნდა გამოიძახოს, ეს ადამიანი საბჭოში და აუცილებლად უნდა მოისმინონ მისი აზრი. ის აირჩიეს, ქართული ოცნების მხარდამჭერებმა და ამომრჩევლებმა და ამ ადამიანმა უნდა გამოთქვას თავისი აზრი. მას პოლიტსაბჭომ უნდა მოუსმინოს და ამის მერე უნდა მიიღოს შესაბამისი გადაწყვეტილება. ადამიანი, რომ იძახის ჩემთვის არაფერი უთქვამთ, ეს ნამდვილად არ არის სწორი. ბატონი გიორგი არის პარტიის თავმჯდომარე დმანისის რაიონის, ამიტომ პარტიის პოლიტსაბჭომ მას უნდა კითხოს, რატომ წავიდა პარტიის წინააღმდეგ და მას უნდა მისცენ უფლება დაწეროს განცხადება და გადადგეს თანამდებობიდან. ასეთი მდგომარეობაა სხვაგანაც არის, ეს ადამიანები უცინიან ოცნებას, სხვა პარტიებზე კი მუშაობენ. ბევრი არის 2012 წლის მომპოვებელი ადამიანები, რომლებიც არიან „ქართული ოცნების“ ერთგულნი. ისინი იმუშავებენ, რომ რაიონული ორგანიზაციები ფეხზე დააყენონ. ამ ადამიანებს აუცილებლად უნდა დაუძახონ “, – განაცხადა ბაბაევმა.
,,გურია ნიუსთან“ ალი ბაბაევმა, დმანისის რაიონში, „ქართული ოცნების“ წევრების კახაბერ ოქრიაშვილთან გადასვლაზეც ისაუბრა. მისი თქმით, რაიონული ორგანიზაციის წევრების 70-80 პროცენტი არის ოქრიაშვილთან გადასული. მან ასევე აღნიშნა, რომ დმანისის საკრებულოს წევრი არის ოქრიაშვილის მხარდამჭერი, რომელიც არის მისი ბიძაშვილი.
,,როგორც იცით, კახა ოქრიაშვილი იყო „ნაციონალური მოძრაობის“ აქტიური წარმომადგენელი, რომელიც 2012 წლის საპარლამენტო არჩევნებში „ნაციონალების“ სახელით მონაწილეობდა, „ქართული ოცნების“ წინააღმდეგ. მაშინ, დმანისში, არჩევნები „ნაციონალურმა მოძრაობამ“ გაიმარჯვა. შემდეგში ოქრიაშვილმა გადაწყვიტა თავისი პარტიიდან გადასულიყო „ქართულ ოცნებაში“, საიდანაც 2016 წელს მმართველი პარტიის მხარდაჭერით დმანისის მაჟორიტარი დეპუტატი გახდა. აი მაშინ ოქრიაშვილმა მთლიანად შეცვალა საკადრო პოლიტიკა თავის სასარგებლოდ. ოქრიაშვილმა, მერის თანამდებობაზე, თავისი კომპანიის თანამშრომელი, გიორგი ტატუაშვილი, „ქართული ოცნების“ სახელით წარადგინა. მე, მერის წინააღმდეგ პრეტენზიები არ მაქვს, ნამდვილად მშრომელი კაცია, მაგრამ გუნდი, გუნდია. საკრებულოს თავმჯდომარე კი, ოქრიაშვილის ბიძაშვილია, რომელიც „ოცნების“ სახელით გახდა თავმჯდომარე. დმანისის საკრებულოს და მერიის თანამშრომლების 70-80 % დაკომპლექტებულია ოქრიაშვილის კადრით.
როცა 2020 წლის საარჩევნო კამპანიის დროს ოქრიაშვილმა გადაწყვიტა, რომ ჩოჩელებთან ერთად შეექმნა პარტია და დამოუკიდებლად ეყარა კენჭი ბოლნისი-დმანისი-თეთრიწყარო-წალკის საარჩევნო ოლქში, ,,ქართული ოცნება- დემოკრატიული საქართველომ“ – არჩევანი, გოგიტა მეშველიანზე გააკეთა.
მიუხედავად იმისა, რომ „ქართულ ოცნებას“ ვაკრიტიკებ, მე ვარ ,,ქართული ოცნება-დემოკრატიული საქართველოს“ ერთერთი დამფუძნებელი, ვიყავი პარტიის პოლიტ საბჭოს წევრი, მე ამ პარტიის მხარდამჭერი და მომხრე ვარ. ჩემი მიზანია, პარტიის იმიჯი იყოს წარმატებული.
ოქრიაშვილმა ამ გადაწყვეტილებით მთლიანად შეცვალა პოლიტიკური ამინდი დმანისის რაიონში. საკრებულოებიდან, გამგეობებიდან მასობრივად გადადიან, ოქრიაშვილის ბანაკში. ამიტომაც ვფიქრობ, რომ ,,ქართული ოცნება-დემოკრატიული საქართველოს“ ხელმძღვანელობამ ქმედითი ღონისძიება უნდა გაატაროს. იმ ხალხმა, რომელიც პორტირებულები არიან ქართულ ოცნებაში, ყველამ უნდა დატოვოს პარტია. სასწრაფოდ, უნდა დაბრუნდეს პარტიაში ძველი, 2012 წლის 1 ოქტომბრის მომპოვებლები. მათ სრულიად კონტროლის ქვეშ უნდა აიყვანონ რაიონში საარჩევნო სტრუქტურები, წინააღმდეგ შემთხვევაში, მე არ გამოვრიცხავ, რომ ოქრიაშვილმა, დმანისში დიდ წარმატებას მიაღწიოს.
ადამიანები, რომელებიც სხვა პარტიაზე მუშაობენ, რომელმაც უღალატეს პარტიას, როგორც ოქრიაშვილმა უღალატა ისე მერმა. მსგავსი ადამიანები ყველა უნდა პარტიიდან გაირიცხოს, თანამდებობები უნდა დატოვონ, მათ ადგილას კი, უნდა მოვიდეს ”ქართული ოცნების“ ერთგული ადამიანები, ამის საშუალება ჯერ კიდევ გვაქვს, რადგან თვენახევარზე მეტია არჩევნებამდე დარჩენილი, რათა 31 ოქტომბრისთვის დმანისელი ხალხი მივიდეს და თავისუფალი არჩევანი გააკეთოს „ქართული ოცნების“ მხარეს.
თითქმის საარჩევნო უბნები, ადგილობრივი დეპუტატები და გამგებლები დაკომპლექტებულია ოქრიაშვილის კადრებით, მათ შორის მასწავლებლები“,_ განაცხადა ალი ბაბაევმა.
მისივე თქმით რაიონში უნდა დასრულდეს მაჟორიტარების მონოპოლია, რადგან ოქრიაშვილის კლანის ხელშია რაიონში არსებული სასოფლო სამეურნეო მიწები, რომლის გამო ხალხს მიწები არ აქვთ დასამუშავებლად.
,,რაიონში უნდა დასრულდეს მაჟორიტარების მონოპოლია, რაიონში მიწათმოქმედება, სოფლის მეურნებისთვის გამოსაყენებადი მიწები მთლიანად ოქრიაშვილის, მისი მამის, სიმამრის, მთელი მისი ნათესავების ხელშია. დმანისში მისი სერიოზული კლანია. უნდა დამთავრდეს საქართველოში მიწათმფლობელთა მონოპოლია. ადგილობრივი ხალხი ვერ სარგებლობს მიწით, ხალხს უნდა მიწა დაამუშავოს, მაგრამ მაგათი კლანის გამო იძულებული არიან რაიონიდან წავიდნენ“,_ განაცხადა „ქართული ოცნება-დემოკრატიული საქართველოს“ ყოფილმა პოლიტსაბჭოს წევრმა ალი ბაბაევმა.
