კარგა ხანს ლოდინი დასჭირდა ტრადიციული „ალილოს“ მსვლელობის დაწყებას ოზურგეთში _ ღვთისმშობლის მიძინების სახელობის საკათედრო ტაძრის წინ შეკრებილი სასულიერო პირები და მრევლი, დიდ-პატარა, მოთმინებით ელოდნენ ცხემლისხიდიდან მომავალი ხარის გამოჩენას. და როცა ისიც გამოჩნდა _ საწყალი, მუხლნამტყუნები ნიკორა, რომელიც მტკივან ფეხებს ძლივს ადგამდა, მსვლელობაც დაიწყო.
როგორც კი დრო ვიხელთეთ, ხარის პატრონს, ბადრო გოგეშვილს, რომელიც სახრეს სწორედ მუხლებზე ურტყამდა ხარს , ჩქარა გაიარეო, ვკითხეთ:
_ რა საბრალოდ იყურება და როგორ დასიებია მუხლები. აშკარაა, წყალი ჩადგომია. რატომ ეურჩებით? ხედავ, სტკივა…
_ არაფერია, მარილები აქვს…
_ ასეც რომ იყოს, მარილებიან ფეხზე თქვენ რომ გითავაზონ, კარგია?
_ არ ეტკინება…
_ მერიასთან რომ აღმართია, იქ გაუჭირდება ასვლა… ცოდოა…
_ ნახავ, თუ ვერ ავა _ გვითხრა გოგეშვილმა და კიდევ მოუქნია…
ამასობაში ოზურგეთის მუნიციპალიტეტის მერიამდე კი მიაღწია ხარმა, თავისი ურმით, სადაც ალილოს მსვლელობას მხარის და ადგილობრივი ხელისუფლების წარმომადგენლები შეუერთდნენ. ოზურგეთის მუნიციპალიტეტის მერმა კოტე შარაშენიძემ და და მოადგილემ, ირაკლი სირაძემ საშობო საჩუქრები გადასცეს გაჭირვებული ოჯახების დასახმარებლად.
მალე საწყალ ხარს სიარული ისე გაუჭირდა, პატრონის სახრემაც ძვრა ვერ უყო და საცოდავად მომზირალი ნიკორა , „ნივამ“ ჩაანაცვლა _ შემოწირულობებს მანქანაში ალაგებდნენ.
_ ეჰ, მაგ ხარის დაქირავებაში 300 ლარი გადაიხადეს, – მსვლელობისას სიმართლე ჩაიხუმრა ვიღაცამ.
_ კაია, ახლა, პატრონმა შინ თუ აიყვანა ცოცხალი და ხვალ დილას სამიათასისთვის არ მოადგა ტაძარს, – ხუმრობითვე გასცეს პასუხი და ხარის გარეშე გაგრძელებული ტრადიციული მსვლელობა, ანსამბლ „შემოქმედის“ მაღალი კლასით შესრულებულმა „მრავალჟამიერმა“ და „ალილომ“ გაალამაზა.
