“თბილისის სააპელაციო სასამართლომ არ დააკმაყოფილა რესტორან „ურმულის“ პირვანდელი მფლობელის, ბიზნესმენ არსენ კუტალაძის ოჯახის მოთხოვნა მარჩენალდაკარგული არასრულწლოვანების სასარგებლოდ, მათ სრუწლოვანებამდე, პაპა-ბებისა და ბიძას დაკისრებოდათ სარჩოს (ალიმენტის) გადახდა, რითაც არსებული სასამართლო პრაქტიკისგან საგამონაკლისო გადაწყვეტილება შექმნა, რაც პირდაპირ წარმოადგენს ბავშვების საუკეთესო ინტერესების უგულვებელყოფას და დათრგუნვას. ამასთან, სასამართლოს გადაწყვეტილებას არ აქვს არც მორალური გამართლება, აჩენს დასაბუთებულ ეჭვს მოსამართლეთა მიკერძოების თაობაზე და აძლიერებს არსენ კუტალაძის ოჯახის რწმენას, რომ ბიზნესმენ არსენ კუტალაძის ოჯახის სასარჩელო წარმოებებს სასამართლოში კონტროლს უწევს გავლენის ჯგუფი, რომლიც ინტერესშიც არც არსენ კუტალაძის სისხლის სამართლის საქმეზე ჭეშმარიტების დადგენა და არც წართმეული ქონებების/წილების დაბრუნების კანონის საფუძველზე მიღების დაშვებაა”,_ განცხადებას აღნიშნულის შესახებ ორგანიზაცია „ახალგაზრდა ადვოკატები“ ავრცელებს.
„ახალგაზრდა ადვოკატების“ განცხადებით, თბილისის სააპელაციო სასამართლოს სამოქალაქო საქმეთა პალატის 2025 წლის 25 მარტის გადაწყვეტილება კრიტიკას ვერ უძლებს. აღსანიშნავია, რომ თბილისის სააპელაციო სასამართლომ საქმეს დაურთო ახალი მტკიცებულებები, რომლითაც არასრულწლოვანების დედამ წერილობით მიმართა არსენ კუტალაძის ძმას ყოფილი მეუღლის მოქმედ კომპანიებში ნახევარგანაკვეთზე დასაქმების მოთხოვნით, მაგრამ უარი მიიღო. ასევე, რთული ეკონომიური მდგომარეობის გამო, არასრულწლოვანებმა სწავლა გააგრძელეს საჯარო სკოლაში. ამასთან, თბილისის სააპელაციო სასამართლომ დასმულ კითხვაზე, თუ რა მოტივით შეწყვიტა ბიძა მერაბ კუტალაძემ ძმისშვილების რჩენა, მერაბ კუტალაძის წარმომადგენელმა ცალსახად განმარტა, რომ მერაბ კუტალაძემ დაობლებული ძმიშვილების რჩენა არსენ კუტალაძის მეუღლის, მარინე წამალაიძის მხრიდან სისხლის სამართლებრივი დავის აქტუალიზაციის გამო შეწყვიტა. ასეთ ვითარებაშიც კი, თბილისის სააპელაციო სასამართლომ უარი განაცხადა გადაწყვეტილება დაფუძნებოდა ბავშვების საჭიროებებს, მოთხოვნილებებსა და ინტერესებს. მართლმსაჯულება განხორციელდა ღია და აშკარა მიკერძოებით, რაც აჩვენებს, რომ ელემენტარულ მიმდინარე სოციალური საჭიროების მქონე მოთხოვნებზეც კი, არსენ კუტალაძის ოჯახის მიმართ, სასამართლო არ არის ჰუმანური და დამოკიდებულია მხოლოდ გავლენის ჯგუფების კარნახზე, რაც ღიად ჩანს და უკიდურესი სირცხვილია. მით უფრო, როდესაც საქმის განმხილველ შემადგენლობას საჯაროდ გამოხატული და დეკლარირებული პრეტენზია გააჩნიათ, რომ არ გამოხატავენ სასამართლო სისტემაში გავლენიანი ჯგუფის წრის ინტერესებს და არასრულწლოვანთა მართმსაჯულების საკითხებზე გადამზადება მიღებული აქვთ საერთაშორისო ორგანიზაციების დაფინანსებით განხორციელებულ პროექტებით.
აღსანიშნავია, რომ თბილისის სააპელაციო სასამართლოს 25.03.2025 განჩინების გამოცხადებამდე, მერაბ კუტალაძის წარმომადგენელმა მარინე წამალაიძეს და მის წარმომადგენელს, მხარეთა შორის ამავე დღეს მიმდინარე სხვა სასარჩელო განხილვის ბოლო განუცხადა, რომ თბილისის სააპელაციო სასამართლოში, მიღებული გადაწყვეტილების სარეზოლუციო ნაწილის გამოცხადებაზე, მოსარჩელისგან განსხვავებით, არ აპირებდა დასწრებას, რადგანაც მისთვის მოსალოდნელი იყო შედეგი, რომლითაც მარინე წამალაიძის სააპელაციო საჩივარი (სარჩელი) არ დაკმაყოფილდებოდა. აღსანიშნავია, რომ ასეთი განმარტებები არ არის პირველი შემთხვევა, როდესაც მოწინააღმდეგე მხარის ადვოკატი სასამართლოს გადაწყვეტილებამდე ახმაურებს შედეგებს და შემდგომ თავის განმარტებებს პროფესიულად ხსნის, რომ სარჩელში მითითებული გარემოებები თითქოსდა იურიდიულად არ ამართლებენ სასარჩელო მოთხოვნებს.
საქმის მასალების დგინდება, რომ 2019 წლის 9 იანვარს, ჯერ კიდევ დაუდგენელ ვითარებაში გარდაიცვალა ბიზნესმენი არსენ კუტალაძე. მას დარჩა სამი არასრულწლოვანი შვილი. ისინი მამის გარდაცვალების შემდეგ, სრულიად უმწეო, დაუცველ და სოციალურად რთულ მდგომარეობაში აღმოჩნდნენ. 2023 წლის 27 სექტემბრის სსიპ სოციალური მომსახურების სააგენტოს თბილისის სერვის ცენტრის ცნობის თანახმად, ბავშვები მარჩენალის გარდაცვალების გამო, სოციალური პაკეტის ფარგლებში, ღებულობენ თვეში 300 ლარს. სამწუხაროდ, მოპასუხეების მხრიდან არასრულწლოვანების მიმართ დაიკარგა ემპათია, მხარდაჭერა, ელემენტარული ინტერესი და ზრუნვის ვალდებულება. დედის არჩევანი – ჭეშმარიტება დადგინდეს არსენ კუტალაძის გარდაცვალებისა და ქონებების კუთვნილების საკითხში, დასჯადი აღმოჩნდა, რამაც გამოიწვია მოპასუხე მერაბ კუტალაძისა და სხვა მოპასუხეების, მთლიანად სანათესაო ოჯახის მხრიდან გარიყვა, ნათესაური ურთიერთობების მოშლა, ფინანსური და ადამიანური ზრუნვის შეწყვეტა.
არსენ კუტალაძის გარდაცვალების შემდეგ, ბავშვების სრულწლოვანებამდე სარჩოთი უზრუნველყოფა იკისრა ბიძამ – მერაბ კუტალაძემ. მაგალითად, 2020 წლის 19 მარტს, ერთ-ერთ საპროცესო დოკუმენტში ბიძა თავის დამსახურებებზე აღნიშნავდა – „მერაბ კუტალაძე საკუთარ შვილებად მიიჩნევს და ყველა ღონეს და რესურს ხმარობს, რომ ბავშვები აღიზარდონ სრულფასოვნად, ბავშვთა ჭეშმარიტი ინტერესების დაცვით, სათანადო გარემოში“ (სტილი დაცულია), მაგრამ მას შემდეგ, რაც არსენ კუტალაძის სიკვდილის მოტივებთან დაკავშირებით, მეუღლე მარინე წამალაიძის მიერ მოთხოვნილი იქნა თვითმკლელობამდე მიყვანამდე საქმის მკლელობის მუხლით გადაკვალიფიცირება, მერაბ კუტალაძემ შეწყვიტა ყოველგვარი კონტაქტი, არასრულწლოვნებზე ზრუნვა და ფინანსური დახმარება გაცემა და მხოლოდ საპროცესო დოკუმენტებში ჩაანწერი – „მერაბ კუტალაძე საკუთარ შვილებად მიიჩნევს და ყველა ღონეს და რესურს ხმარობს, რომ ბავშვები აღიზარდონ სრულფასოვნად, ბავშვთა ჭეშმარიტი ინტერესების დაცვით, სათანადო გარემოში“ – იქცა ჩვეულებრივ თვალთმაქცობად და ფიქციად.
„ახალგაზრდა ადვოკატები“ აღნიშნავს, რომ მერაბ კუტალაძე ამჟამად დაუფლებულია არსენ კუტალაძის იმ ბიზნეს-აქტივებს, რომელიც ცალკე სამართალწარმოების წესით სადავო კაპიტალს წარმოადგენს, მათ შორის რესტორან „ურმულს“, რომლის კუთვნილებისა და რეალური მეწილეების შესახებ არაერთი ღია კითხვა არსებობს. ასევე, პაპა-ბებიას აქვთ შესაბამისი სოციალური და ფინანსური გარემო, რათა გადაიხადონ სარჩო (ალიმენტი) და გააგრძელონ ზნეობრივი მოვალეობის შესრულება. პაპა-ბებია ცხოვრობს ჩოხატაურის მუნიციპალიტეტში და აქტიურად ეწევიან სოფლის მეურნეობის განხორციელებას. კერძოდ, 2017 წელს, შვილების დახმარებით, პაპა-ბებიამ შეიძინეს 5000 ჰა მიწის ნაკვეთი, საცხოვრებელი სახლის შორი-ახლოს, რომელზედაც გაშენებულია თხილის პლანტაცია. ისინი აქტიურად ამუშავებენ თხილის პლანტაციას და ყოველწლიურად, მათი ინდივიდუალური შემოსავალი 30,000 ათასს ლარს აღემატება. ამასთან, ბებია პირადად უვლის და მნიშვნელოვანი შემოსავალს იღებს ჟოლოს ბაღისგან. დამატებით შემოსავალი მიიღება ვენახებიდანაც. სახლის პირობებში მზადდება ღვინო და ჭაჭა, რომელის რეალიზებაც ხდება. პაპა-ბებია უვლის ფუტკრის სკასაც და ნატურალური თაფლის გასხვისებით დამატებითი შემოსავალიც მიიღება. ისინი იღებენ ასაკით პენსიას და მუდმივი ფინანსური ხელშეწყობა აქვთ მერაბ კუტალაძის მხრიდან. აღნიშნული სამეურნეო საქმიანობის განხორციელება სარჩელზე წარმოდგენილი შესაგებლით უარყოფილი არ აქვს არც მოპასუხე მხარეს.
განსახილველ შემთხვევაში, ერთის მხრივ კანონი შვილების რჩენის ვალდებულებას აკისრებს მშობლებს, პაპა-ბებიას, რომლებსაც ამ მოვალეობის შესრულებისთვის მობლების მსგავსად თანაბარი ვალდებულებები გააჩნიათ, მაგრამ კანონი სახელდობრ არ მიუთითებს ბიძის ნათესაური სტატუსის ქვეშ რჩენის ვალდებულების წარმოშობის საკითხზე. მიუხედავად ამისა, კანონი განსაზღვრავს პირობას, რომლის თანახმადაც, თუ ოჯახის რჩენა ერთდროულად რამდენიმე პირის მოვალეობაა, სასამართლო მათი მატერიალური და ოჯახური მდგომარეობის გათვალისწინებით განსაზღვრავს თითოეულის წილის ოდენობას ამ მოვალეობის შესრულებაში. ამასთან, სასამართლო მხედველობაში იღებს ალიმენტის გადამხდელ ყველა პირს, იმისდა მიუხედავად, ალიმენტს სთხოვენ ყველა ამ პირს, თუ მხოლოდ ერთ ან რამდენიმე მათგანს.
ცნობისთვის: ბიზნესმენის ოჯახის ინტერესებს „ახალგაზრდა ადვოკატები“, ადვოკატები: არჩილ კაიკაციშვილი და ნიკა სადრაძე წარმოადგენენ. წინამდებარე საქმე თბილისის სააპელაციო სასამართლოში მოსამართლეებმა: თეა სოხაშვილი-ნიკოლაიშვილმა (თავმჯდომარე), შორენა წიქარიძემ და სიმონ ჩხაიძემ განხილეს, ხოლო თბილისის საქალაქო სასამართლოში – მანანა მესხიშვილმა.
„ახალგაზრდა ადვოკატები“ ქართველ და უცხოელ სპეციალისტებთან ერთად, ბიზნესმენ არსენ კუტალაძის თვითმკვლელობამდე მიყვანის საქმის შესწავლას აგრძელებს, რომელიც საგამოძიებო პროცესში არსებული შედეგების ანალიზს და საერთო სასამართლოების გადაწყვეტილებების შეფასებას შეეხება. საქმის მასალებით დგინდება, რომ არსენ კუტალაძე ბიზნესიდან რეგისტრირებული და არარეგისტრირებული წილებიდან გასვლას და სამშენებლო სფეროში საქმიანობის გაგრძელებას აპირებდა. პარტნიორების წინაშე იდგა კუთვნილი წილის კომპენსაციის გადახდის საკითხი, რაც მილიონს აღემატებოდა, რა დროსაც, ბიზნესმენი იღუპება.
თბილისის სააპელაციო სასამართლოს განჩინება გასაჩივრდება საკასაციო წესით. ამასთან, ორგანიზაცია სასამართლოს გადაწყვეტილებას გააცნობს ბავშვის უფლებების დაცვის საერთაშორისო და დომორ ორგანიზაციებს, მათ შორის ჯერ კიდევ სასამართლო სისტემასთან კავშირში მყოფ ორგანიზაციებს.
