ოზურგეთის კულტურის და დასვენების პარკში, დიდთოვლობის დროს, ატრაქციონ “ავტოდრომის“, “მხიარული მატარებლის” და “მხიარული კარუსელის“დანგრევის გამო, რაც დიდთოვლობამ გამოიწვია, ქალაქში არაერთგვაროვანი გამოხმაურება მოჰყვა.
ბევრი გამოთქვამდა უკმაყოფილებას, რომ იქ რამდენიმე თვის წინ, ბინა დაიდო ა(ა) იპ “ოზურგეთის თოჯინების თეატრმა“, რომლის დირექტორი ლაშა კუტალაძეა. კუტალაძე ოც წელზე მეტია, ამ სფეროში მუშაობს და ამჯერად ახლად რეაბილიტირებულ ოზურგეთის კულტურის და დასვენების პარკში, თეატრთან ერთად, მრავალი თანამშრომლით გადმოვიდა. ხალხი უფრო ამიტომ საუბრობდა მათ პასუხისმგებლობაზე _ მეტი ყურადღება რომ გამოეჩინათ, ავტოდრომი არ დაინგრეოდაო.
ჩვენ, როგორც მკითხველს შევპირდით, უნდა გაგვერკვია, შეესაბამებოდა თუ არა ეს ყველაფერი სიმართლეს, რადგან ავტოდრომის რეაბილიტაცია ჯერ ვერ მოხერხდება (ზარალი მნიშვნელოვანია). ამავე დროს, დღესვე რომ აღადგინონ, ვინ არის მის მეთვალყურეობაზე პასუხისმგებელი? ეს ხომ ოზურგეთელი ბავშვების უდიდესი ნაწილის უსაყვარლესი ატრაქციონია და ამ პარკის რეაბილიტაციისთვის ახლახან მილიონები დაიხარჯა.
“გურია ნიუსმა” საჯარო რეესტრში გაარკვია, რომ კულტურის და დასვენების პარკის სამი ჰექტარი ფართობი, ა(ა)იპ “თოჯინების თეატრს” უზურფრუქტის უფლებით (უფლება სხვისი ქონებითა და მისი შემოსავლით სარგებლობით იმ პირობით, თუ ამ ქონებას არაფერი დააკლდება) გადაეცა.
ა(ა)იპ “ოზურგეთის თოჯინების თეატრის” დირექტორი, ლაშა კუტალაძე, ჩვენ კულტურის და დასვენების პარკში, სამუშაო პროცესში ვნახეთ.
“შესაძლოა, ვინმეს უცნაურად მოეჩვენოს, როცა პარკის ტერიტორიაზე თოჯინების თეატრის დირექტორი და რამდენიმე თანამშრომელი წიწვოვნებს რგავენ. 25 ძირი ახალი ნერგი დავრგეთ. მობრძანდით, რაც გაინტერესებთ, სიამოვნებით გიპასუხებთ“, _ გვითხრა მან.
_ ჩვენი, ოზურგეთის თოჯინების თეატრი, სულ ოთხი თვეა, რაც გადმოვიდა ამ კულტურის და დასვენების პარკში. პარკის ტერიტორია სამ ჰექტარ ფართობს მოიცავს, რაც გადმოგვეცა უზურფრუქტის უფლებით. ჩვენს განკარგულებაშია შენობა, სადაც განთავსებულია სარეპეტიციო და ადმინისტრაციული ოთახები და საწყობი. ატრაქციონი ანუ ავტოდრომი, რომელიც დიდთოვლობაზე ძალიან დაზიანდა, ასევე კაფე, ჩვენ არ გვეკუთვნის და რა თქმა უნდა, არც პასუხისმგებლობა გვაკისრია მასზე. მე, რაც მევალება, იმას ვაკეთებ, _ თქვა ლაშა კუტალაძემ და აღნიშნა, რომ მას შემდეგ, რაც გამოიდარა და დიდთოვლობის მიერ გამოწვეული შეფერხების გამო, პარკში სხვადასხვა ინვენტარი თუ ნარგავები დაზიანდა, ის და მისი თანამშრომლები, სერიოზულად შეუდგნენ საქმეს.
_ ბატონო ლაშა, თქვენ ამბობთ, რომ ავტოდრომი, რომლის დანგრევასაც ქალაქში სერიოზული უკმაყოფილება მოჰყვა, თქვენ მიერ უზურფრუქტით აღებულ ამხელა ტერიტორიაზეა. ვინ იქნება პასუხისმგებელი, რომ კიდევ უფრო არ დაზიანდება ის?
_ ნამდვილად არ შედის ეს ავტოდრომი ჩვენს საკუთრებაში. თუმცა კულტურის და დასვენების პარკს ჰყავს სამი დარაჯი. მორიგეობა სადღეღამისოა და აქ ვერავინ ვერაფერს დააშავებს.
_ დიდთოვლობაზე ამ ატრაქციონის და კარუსელების დანგრევას უკმაყოფილება მაინც მოჰყვა და თქვენი მისამართითაც ისმოდა საყვედურები, რომ შესაძლებელი იყო მეტი ყურადღების გამოჩენა…
_ ხომ ხედავთ, რამხელა ფართობია ამ პარკის ტერიტორია? დიდთოვლობისას მე და ჩემმა თანამშრომლებმა, ოთხი მიმართულებით პარკის საფეხმავლო ბილიკები მთლიანად გავწმინდეთ. ამით თავს კი არ ვიწონებთ, უბრალოდ, ხალხს, ბავშვებს, ახალგაზრდებს, მივეცით საშუალება იმ დღეებში აქ ემოძრავათ. არა მარტო ერთ დღეს, დიდთოვლობისას აქ მოძრაობა არ შეფერხებულა. სასიარულო გზა მეტი არც იყო _ ცენტრალურ გზაზე ხომ ვერ ივლიდნენ?! ტროტუარები ორ მეტრამდე თოვლით დაფარული. ფაქტიურად მთელი დატვირთვა ამ პარკზე მოდიოდა. რატომ უნდა თქვან, რომ არაფერი გავაკეთეთ?
_ რამდენი თანამშრომელი გყავთ სულ?
_ ჩვენთან სულ 32 თანამშრომელია. აქედან ორი მებაღეა, სამი დარაჯი და ორი დამლაგებელი. დღეისთვის, დაწყებული გვაქვს საგაზაფხულო სამუშაოები. კერძოდ, ნერგები უკვე დავრგეთ. ყვავილებისა და ნათესებისთვის მოვიტანეთ ქვიშა, ვამზადებთ შესაბამის ნიადაგს. დაგვიჯერეთ, რომ ძალიან მონდომებული ვართ. რაკი მოგვცეს უზურუფუქტის უფლებით ეს სივრცე, მაქსიმალურად კარგად უნდა მივხედოთ.
_ ახლა ყველაზე მთავარზე, შემოქმედებით მუშაობაზე გვიამბეთ. პატარა მაყურებელი ხომ სიახლეს და მრავალ სპექტაკლს ელოდება თქვენგან…
_ ამ წუთშიც რეპეტიცია გვაქვს. 12 აპრილიდან უკვე ორი სპექტაკლი უნდა გავიტანოთ. ეს არის “პატარა წერო” და “მუჭანახევარა“. აქვე, პარკის ღია სივრცეში მოვახდენთ ჩვენებას. ისე კი სამთვიანი განრიგი უკვე მზად გვაქვს. ჩვენი მაყურებლებია დაწყებითი კლასების მოსწავლეები, ასევე სკოლამდელი აღზრდის დაწესებულებების, საბავშვო ბაღების მოსწავლეები. წელს” ასევე თურქეთში დაგეგმილი გვაქვს გასტროლი _ კონკრეტულად, ტრაპზონში.
_ ბატონო ლაშა, ბილეთები ფასიანი იქნება?
_ ვფიქრობთ, რომ სპექტაკლებზე დასწრება ფასიანი გახდეს. თუმცა, ეს ღირებულება , ალბათ, ორ ლარამდე თუ იქნება. ოღონდ აუცილებლად შესათანხმებელია _ ჩვენ ამას მარტო ვერ გადავწყვეტთ. იმედი მაქვს, რომ ყველაფერი ისე მოგვარდება, ჩვენს პატარებს საუკეთესო სივრცე და სანახაობა ექნებათ ამ პარკის სივრცეში.
ლაშა კუტალაძე ამბობს, რომ წელიწადში, სულ ცოტა, 4-5 პრემიერას აკეთებდა და იმედოვნებს, რომ მომავალშიც ასე იქნება. ასევე, უახლოეს მომავალში, ისევე როგორც შარშან, მონაწილეობას მიიღებენ ფესტივალში “მზიანი საქართველო”. ეს ქვეყნის მასშტაბით ტარდება და მისი ორგანიზატორი ასოციაცია “რევერანსია”.
_ ჩვენი თეატრი არაერთხელ იყო ამ კონკურსის გამარჯვებული. ამ წლის სექტემბერში თეატრს დაარსებიდან 45 წელი უსრულდება. ვაპირებთ, მოკრძალებული ღონისძიება ჩავატაროთ და ჩვენი პატარები გავახაროთ. იმედია, გვესტუმრებით, _ გვითხრა ლაშა კუტალაძემ.
ავტორი
