„ალტ-ინფო“ ოზურგეთელებს  თბილისში წასასვლელად ეპატიჟება: „დამირეკეს, რომ ორ ივლისს აქციაზე წავიდეთ“

„გურია ნიუსს“ ოზურგეთიდან და ასევე მუნიციპალიტეტის სხვადასხვა სოფლებიდან შეატყობინეს, რომ „ალტ- ინფოს“ ადგილობრივი ორგნიზაციის წარმომადგენლები, აქტიურად ურეკვენ და ატყობინებენ, რომ 2 ივლისს, თბილისში, პრაიდის საწინააღმდეგო აქციაზე წავიდნენ.

_ დამირეკეს და მითხრეს, რომ აქციაზე წავიდე.  გზის თანხით და კვებით უზრუნველყოფილი იქნებითო. თუმცა, წასვლას არ ვაპირებ, – შეგვატყობინეს ოზურგეთის ერთ-ერთი სოფლიდან. ასევე დაგვირეკეს სხვადავა სოფლებიდან, ქალქ ოზურგეთიდან   და გვითხრეს, რომ მათ თბილისში, აქციაზე წასასვლელად ეზადებიან.

_ვკითხე, რა ხდება -თქო. რაო და ქათმების საწინააღმდეგო აქცია უნდა ჩავატაროთო. რა ქათმების-მეთქი, რომ ვკითხე, არ იციო? ვინც ატარებს ფერად აქციებსო. საწინააღმდეგო უნდა ჩავატაროთ,  ჩვენ არ უნდა დავუშვათ ერთსქესიანთა  ქორწინება, ასევე მამათმავლობა,  თორემ საკუთარ სახლში, რაც უნდათ, ის ქნანო, – გვითხრეს მოქალაქეებმა.

თუ რამდენად შეესაბამებოდა სინამდვილეს ეს ინფორმაცია, „გურია ნიუსი“   „ალტ-ინფოს“ ოზურგეთის წარმომადგენლებს დაუკავშირდა.

აღნიშნული პარტიის ხელმძღვანლმა ოზურგეთში, მამუკა ანდღულაძემ განაცხადა:

_მობრძანდით, თუ გსურთ უფრო დეტალურად გესაუბრებით. დიახ, ჩვენ ვაპირებთ წასვლას. არავის არ ვებრძვით და არავის არ ვკლავთ. ჩვენ ვიცავთ ქართულ, ეროვნულ ტრადიცებს,  ჩვენს ეკლესიას და იდენტობას და არ გვსურს ერთსქესიანთა ქორწინების და მამათმავლობის გიტაცია და დაკანონებაზე პიარი. ეს არ შეიძლება. ჩვენ მართლმადიდებელი ერი ვართ. თავიანთ პირად ცხოვრებას, როგორც სურთ, ისე მიხედონ. ვინ ეუბნება რაიმეს? ოღონდ არ უნდა ხდებოდეს ამ ყველაფრის პროპაგანდა. ევროპას არ ვებრძვით ჩვენ. მე ევროპამ სიცოცხლე მაჩუქა. ოპერაცია იქ გავიკეთე. ონკოლოგიური ავადყოფი ვარ. ჩვენ გვსურს ყველა ევროპული ღირებულება, განათლება, ჯანდაცვა, სოფლის მეურნეობა…ოღონდ არავინ არ უნდა დაგვაძალოს ერთსქესიანთა  ქორწინება. ამისთვის გეიპარადები და პრაიდები და მსგავსი ღონისძიებების  ჩატარების   წინააღმდეგი ვართ.

კითხვაზე, ვინ აფინანსებს აღნიშნულ აქციაზე ხალხის წაასვლას, მან გვითხრა, რომ ემიგრანტები ურიცხავენ თანხას.

_საკუთარ თანხასაც გავიღებთ, ასე რომ არ იყოს. ჩვენ წინა პლანზე ეროვნულ ღირებულეებებს  ვწევთ და არ გვენანება ამისთვის გზის ფულის დახარჯვა, – თქვა მან.

ჩვენ ასევე ვკითხეთ, ვინ დიცავს მოსალოდნელი საფრთხისაგან, ან ერთ ან მეორე მხარეს, თუ დაპირისპირება მოხდა.

_ჩვენ თავად დავიცავთ წესრიგს, არავის არ ვცემთ და არც ვუპირისპირდებით. ჩვენ, ჩვენი ხალხის უმეტესობა, გამოვხატავთ   ჩვენს ნებას, – გვითხრა მამუკა ანდღულაძემ.