გურიის სხვა მუნიციპალიტეტების მსგავსად პრო-რუსულმა ორგანიზაცია “ალტ-ინფომ” ოფისი დღეს ლანჩხუთშიც გახსნა.
პრეზენტაციას ორგანიზაციის რამდენიმე მხარდაჭერის გარდა, არავინ დასწრებია და არც ოფისზეა რაიმე მანიშნებელი აბრა ან სტიკერია გამოკრული.
გავრცელებული ინფორმაციით, ზემონახსენებ ორგანიზაციას ლანჩხუთში სათავეში გია გოთუა უდგას. ცნობისთვის, გოთუა გასული საუკუნის 90-იან წლებში ლანჩხუთში მცირე ხნით რაიონის პირველი პირის პოსტს იკავებდა, მას შემდეგ, რაც ჯაბა იოსელიანის მომხრეებმა ადგილზე დროებითი ხელისუფლების წარმომადგენლად დანიშნეს.
ალტ-ინფოს ოფისის გახსნის ამბავს კი ლანჩხუთელთა მხრიდან მკვეთრად უარყოფითი დამოკიდებულება მოჰყვა და ახალფაზრდებმა ამასთან დაკავშირებით ორშაბათისთვის გარკვეული აქტივობაც დაგეგმეს.
“ჩვენ უკვე მზად ვართ ქმედითი ნაბიჯებისთვის, რომ ალტ-ინფო ავლაგმოთ ლანჩხუთიდან (კანონის ფარგლებში, რა თქმა უნდა). 1 კვირის წინ იმხელა აქცია გვქონდა უკრაინის მხარდასაჭერი, ახლა რა გგონიათ? ახალგაზრდების გადამტერებას მართლა არავის არ ვურჩევთ!!
და ბოლოს, სათითაოდ რომ დამჭირდეს ყველა ოჯახის მოვლა, მზად ვარ ხელმოწერების შესაგროვებლადაც. დიდება უკრაინას, დიდება გმირებს! მოდი ორშაბათს, ცენტრალურ პარკში 6 საათზე!”-დაწერა სოციალურ ქსელში ნინია ბარამიძემ.
ნინია ბარამიძის ამ პოსტის პასუხად კომენტარი გოთუამაც დაწერა და პრესკონფერენციის გამართვა დაანონსა, სადაც მისი თქმით, განმარტავს თუ რატომ გადადგა ეს ნაბიჯი.
“ამ სიშტერეს ვინ დაიჯერებს, კი მაინტერესებს. ვინც მე მიცნობს და მეტ-ნაკლები შეხება ჰქონია, იმედია, პატივს დამდებენ და ჩემგან მიიღებენ პასუხს მათ შეკითხვებზე. ხოლო ადგილობრივ “პოლიტიკოსებს”, ყველა ვიცი, ვის რა მუცლის გვრემა სჭირს, ყველას მოტივი ჩემთვის ცნობილია (ნეტავ, არ ვიცოდე). . ამ დღეებში ჩავატარებ პრესკონფერენციას. ის ქაჯობა, რასაც ლანჩხუთში ჰქონდა ადგილი, აღარ გაგრძელდება. ვითომ კრემლის, თეთრისახლის და საერთოთ გეოპოლიტიკის სტრატეგები ხართ და საკუთარ მუნიციპალიტეტში და საკუთარ სოფელში საკითხიც კი არ დაგიყენებიათ სათანადოდ და კიდევ თავს აძლევთ უფლებას, თურმე გია გოთუამ ვერ უნდა დაელაპარაკოს რაიონისთვის საჭირბოროტო საკითხებზე ლანჩხუთლებს.
აბა, ვინც ილანძღებით, გამოდით და თქვით, რა გაგიკეთებია, რომ თავს ამის უფლებას აძლევ. მე რა ვცადე და რა გამომივიდა, მოგახსენებთ. ყველა ჩემს ქმედებაზე (ძველზე და ახალზე) პასუხს ვაგებ…, მაგრამ თქვენ ეს არ გაწყობთ, თქვენ ბურთი გინდა ჩასჩრათ მოწინააღმდეგეს… მავნებლობთ, მხოლოდ იმიტომ, რომ საკუთარ სტომაქზე მეტად არაფერი გაწუხებთ. ნაწილი აზრზე არა ხართ, როგორ მავნებლობთ ქვეყანას… და ესაა თქვენი უბედურებაც…, იმიტომაცა ხართ კაი დღეში. მე თქვენსკენ ვარ, თქვენ ეშმაკებისკენ. ვინც კომეტარების მიხედვით მსჯელობს, არა უშავს, არაფერი იმალება და არაფერი იკარგება და ყველაფერი სახეზეა. სამყარო იცვლება და ეს ცვლილებები იძლევა ახალ შესაძლებლობებს, როგორც ქვეყნისთვის, ისე თითოეული ოჯახისთვის. და ეს მომენტი უნდა გამოვიყენოთ. მათ შორის რატომ გადავდგი ეს ნაბიჯი და იქ ობიქტური ადამიანები გაიგებენ, რა მინდა და რისი სურვილი მაქვს მე და რა “მაღალი” იდეალები აქვთ, იმ ხალხს, ვინც ასე ადვილად ეხება სხვის ღირსებას.” _ დაწერა გოთუამ ოპონენტთა პასუხად.
ავტორი: სოფო წილოსანი
