მე თქვენ კითხვის ფორმით გეტყვით, რომ ყოველ ღამით შემჩნეული ხართ, რომ სახლის სახურავზე საცვლებით მოძრაობთ… როცა შეურაცხყოფას ბოლოში კითხვის ნიშანი აქვს, ეს კითხვა არ არის, – ამის შესახებ ჟურნალისტებს “ქართული ოცნების” დეპუტატმა ალუდა ღუდუშაურმა განუცხადა.
აქვე ღუდუშაურმა აღნიშნა, რომ თუკი მას და მისი ოჯახის რომელიმე წევრს შეურაცხყოფას მიაყენებენ, ეს ყოველგვარ წითელ ხაზს მიღმაა და ამაზე პასუხი იქნება.
“ის, რაც გუშინ მოხდა და რაც კონკრეტული პარტიული ტელევიზიის წარმომადგენელმა იკადრა, მიჭირს თქმა, რომ ეს მოქმედება ჟურნალისტმა განახორციელა. ეს იყო ყველაზე რადიკალური პარტაქტივის წარმომადგენელი, რომლის ქმედებას ჟურნალისტიკასთან და ეთიკასთან საერთო არ ჰქონდა.
არაფერი ღირს იმად, რომ ადამიანმა სახე და ღირსება დაკარგო.
როდესაც პოლიტიკოსებს მიგვითითებთ, რომ თმენის ვალდებულება გვჭირდება, დიახ, ეს ასეა, მაგრამ თქვენ თქვენი წილი პასუხისმგებლობა სად წაიღეთ?!
ირაკლი კობახიძე არის ღირსეული ქართველი, ღირსეული პოლიტიკოსი, ჩემი და ჩემი თითოეული კოლეგის მეგობარი და გვერდში მდგომი ადამიანი”, – განუცხადა ჟურნალისტებს ღუდუშაურმა.
ინფორმაციისთვის, “ქართული ოცნების” თავმჯდომარე ირაკლი კობახიძემ გუშინ “მთავარის“ ჟურნალისტს შეურაცხმყოფელი რეპლიკებით მიმართა. კობახიძის გაღიზიანება ჟურნალისტის მიერ, უკრაინის რადას ფრაქცია „ხალხის მსახურის“ თავმჯდომარის, დავით არახამიას განცხადების კონტექსტში დასმულ შემდეგ კითხვას მოჰყვა: „კაგებეს აგენტის შვილი არ ხართ, ბატონო ირაკლი?“.
„კაგებეშნიკი არის მამათქვენი, ეს შემიძლია გითხრათ… სირცხვილია, სახე დაკარგეთ… ნუ კანკალებ, სახე დაკარგე. შენც ხარ დავით არახამია, როგორც არახამია არ არის კაცი, ისე შენც არ ხარ ქალი. სახე დაკარგე, თავი დაკარგე, პოლიტიკა ამად გიღირს? სირცხვილია…. “ნაცმოძრაობის” გულისთვის სახე დაკარგე. ქალი აღარ ხარ რა… ქალის სახე დაკარგე… რომ ლაპარაკობ, პირი მოიწმინდე… სააკაშვილივით გაქვს პირი, დაემსგავსე ყველაფრით შენს ბელადს. სააკაშვილს ჰგავხარ პირითაც… სამარცხვინო შენ… გულისამრევია“, – მიმართა კობახიძემ „მთავარი არხის“ ჟურნალისტს.
წყარო: ipn
