სენაკის საკრებულოში განვითარებულ მოვლენებს სოციალურ ქსელში პარტია „საქართველოსთვის“ აღმასრულებელი მდივანი, ბერდია სიჭინავა ეხმაურება.
“ყველას კარგად გვახსოვს ბათუმისა და სენაკის საკრებულოებში მიმდინარე პოლიტიკური პროცესები. მახინჯი საკანონმდებლო ინიციატივა, რომელიც თავდაპირველად მხოლოდ ბათუმს ეხებოდა, “ოცნების მოწყალების” შედეგად შეეხო სენაკსაც. ყველას გაუჩნდა განცდა, რომ “ოცნებამ” ეს კრიზისი დაასრულა სენაკშიც. მმართველი პარტიის თავმჯდომარე – ირაკლი კობახიძე ინტერვიუებში ამაყად აცხადებდა, რომ კრიზისი გადალახულია და სასამართლოში დავის საგანიც არაფერია. ცუდი კანონის მიღების ნაცვლად, ეს საკითხი პოლიტიკური კონსესუსით რომ უნდა დარეგულირებულიყო, ამაზე არავინ დავობს. დღეს ირკვევა, რომ სენაკში, მმართველი პარტია (მოსარჩელეები) კანონის მიღების მიუხედავად არ წყვეტს სასამართლო დავას, გარდა ამისა, საკრებულოს მაჟორიტარი დეპუტატი “ენმ”-დან არის დაკარგული (ეძებენ), რომელზეც პირდაპირო ფორმით ხორციელდება ზეწოლა, ემუქრებიან შვილებით, რომ უარი თქვას მანდატზე და მხოლოდ ამ ოლქში ახალი არჩევნების ჩატარებით, ისე როგორც ბათუმში, “ოცნებამ” უმრავლესობა აიღოს სენაკშიც. ეს ყველაფერი ხდება ევროკავშირის წევრობის კანდიდატის სტატუსის მოლოდინში, მაშინ, როდესაც გასაჯაროებული კითხვარის მნიშვნელოვანი ნაწილი ეხებოდა თვითმმართველობების დამოუკიდებლობას და დეცენტრალიზაციას. რა ვერ გათვალეს “ქოცებმა”: ამ მაჟორიტარი დეპუტატის უფლებამოსილების 15 ივნისამდე შეწყვეტის შემთხვევაში, არჩევნები ჩატარდება ოქტომბერში, მხოლოდ ამ სამაჟორიტარო ოლქში, თუმცა საკრებულო თუ ოქტომბრამდე ვერ შეიკრიბა, რიგგარეშე არჩევნები საკრებულოს სრულ შემადგენლობას მოუწევს 2023 წლის აპრილში, რადგან 15 ივნისამდე საკრებულოს ამ შემადგენლობის დათხოვა ვერ მოხდება, რადგან არ იქნება 6 თვიანი ვადა გასული ბოლო შეკრებიდან. რას ფაფხურობთ?! ქართული ოცნება / Georgian Dream”,– წერს სიჭინავა.
