პარლამენტის პლენარული სხდომა დღის წესრიგით გათვალისწინებული საკითხების განხილვით დაიწყო. დეპუტატებმა „სახელმწიფო შესყიდვების შესახებ“ კანონპროექტი მესამე მოსმენით განიხილეს, რომელიც სახელმწიფო შესყიდვების სააგენტოს თავმჯდომარემ, ლევან რაზმაძემ წარადგინა.
მომხსენებელმა განმარტა, რომ ცვლილება ელექტრონული ტენდერის გამოცხადების ვადებს შეეხება და გამარტივებული ელექტრონული ტენდერი, რომლის გამოცხადებისა და მასში წინადადებების წარდგენის ვადა, კანონის მოქმედი რედაქციით, სამი დღით იყო განსაზღვრული, აღარ იარსებებს. ცვლილებების თანახმად, მხოლოდ ელექტრონული ტენდერი დარჩება, რომლის გამოცხადების ვადებიც შესყიდვის ღირებულებაზე იქნება დამოკიდებული. ასევე იცვლება სატენდერო განცხადებისა და სატენდერო დოკუმენტაციაში ცვლილების შეტანის წესიც.
კანონპროექტი „ქალაქ თბილისის საზღვრებში და მიმდებარე ტერიტორიაზე არსებული მწვანე ნარგავებისა და სახელმწიფო ტყის ფონდის განსაკუთრებული დაცვის შესახებ.“ დეპუტატებს პარლამენტის წევრმა, დავით სონღულაშვილმა, მესამე მოსმენისთვის წარუდგინა.
მესამე მოსმენით განიხილეს საქართველოს მთავრობის მიერ წარმოდგენილი „საგადასახადო დავალიანებებისა და სახელმწიფო სესხების რესტრუქტურიზაციის შესახებ“ კანონპროექტი, რომელიც დეპუტატებს საქართველოს ფინანსთა მინისტრის მოადგილემ, ნიკოლოზ გაგუამ წარუდგინა.
მომხსენებელთა განმარტებებით, კანონპროექტების საკომიტეტო მოსმენების დროს რედაქციული და ტექნიკური ხასიათის შენიშვნები არ გამოთქმულა.
სხდომაზე, კანონპროექტთა პაკეტი „დეპოზიტების დაზღვევის სისტემის შესახებ,“ საქართველოს ფინანსთა მინისტრის მოადგილემ, ნიკოლოზ გაგუამ პირველი მოსმენისათვის წარადგინა. მისი თქმით, საკანონმდებლო სიახლე კომერციული ბანკების მიმართ საზოგადოებრივი ნდობის ამაღლებას, საფინანსო სექტორის მდგრადობის ხელშეწყობას, დანაზოგების წახალისებას, ეკონომიკური ზრდის ხელშეწყობას და შიდა და გარე შოკების შემსუბუქებას შეუწყობს ხელს. მინისტრის მოადგილის განმარტებით, კანონპროექტი არის ერთ-ერთი მნიშვნელოვანი რეფორმა, რომელიც საფინანსო სისტემაში არის დაგეგმილი და დღეს მისი განხორციელება მნიშვნელოვანი და დროულია, ვინაიდან დეპოზიტების დაზღვევის სისტემა ფინანსური სტაბილურობის და უსაფრთხოების მნიშვნელოვანი კომპონენტია.
„ეს არის ერთ-ერთი რეფორმა, რომელიც მთავრობის ოთხპუნქტიანი გეგმის ფარგლებში უნდა განხორციელდეს. საქართველოში დეპოზიტების დაზღვევის სისტემის დანერგვის მიზანს კომერციული ბანკების მიმართ საზოგადოებრივი ნდობის ამაღლებით ქვეყნის საფინანსო სისტემის მდგრადობის ხელშეწყობა, დანაზოგების წახალისება, ეკონომიკური ზრდის ხელშეწყობა და შიდა და გარე შოკების შემსუბუქება წარმოადგენს“, – განაცხადა მინისტრის მოადგილემ.
მომხსენებლის განმარტებით, დეპოზიტების დაზღვევის სისტემა მსოფლიოში აპრობირებული მეთოდია, რომელიც დეპოზიტების დაცულობას უზრუნველყოფს და დეპოზიტების ანაზღაურების პრობლემის შემთხვევაში მათ გარანტირებულად ანაზღაურებას უზრუნველყოფს. ნიკოლოზ გაგუას თქმით, არსებული საკანონმდებლო შემოთავაზება, სრულად ეყრდნობა დეპოზიტების დაზღვევის მხრივ არსებულ ყველა საერთაშორისო პრინციპს და აღნიშნული კანონმდებლობა საერთაშორისო პრაქტიკასთან სრულ შესაბამისობაშია.
„მრავალი საერთაშორისო საფინანსო ორგანიზაცია აღნიშნავს, რომ საფინანსო ზედამხედველობა საქართველოში ძალიან წარმატებულია. მათი შეფასებით, ზოგადად, საქართველოს საბანკო სისტემა საკმაოდ წარმატებულად ფასდება არა მარტო რეგიონის მასშტაბით, არამედ, უფრო ფართო არეალში. თუმცა ვთვლით, რომ დეპოზიტების დაზღვევის სისტემა ეს არის ახალი, დამატებითი ელემენტი, რომელიც კიდევ მეტად შეამცირებს დღეს საქართველოში არსებულ დაბალ რისკებს, რომელიც ამ სექტორში არსებობს,“ – განაცხადა მინისტრის მოდგილემ.
მისი განმარტებით, დეპოზიტების დაზღვევის პრაქტიკა მსოფლიოს 125 ქვეყანაში წარმატებით არსებობს. 35 ქვეყანა, მათ შორის საქართველო, ახლა მუშაობს ამ სისტემის დანერგვაზე.
წარმოდგენილი კანონპროექტით, დამოუკიდებელი სსიპ „დეპოზიტების დაზღვევის სააგენტო“ იქმნება. სააგენტოს უფროსს თანამდებობაზე 5 წლის ვადით ნიშნავს ხუთი წევრისგან შემდგარი საბჭო.
ფინანსთა მინისტრის მოადგილემ, კანონპროექტთან დაკავშირებით დეპუტატების შეკითხვებს უპასუხა და მათ მიერ სააგენტოს ფუნქციონირების, დაფინანსების, მიზნობრიობის თაობაზე გამოთქმულ მოსაზრებებთან დაკავშირებით დეტალური განმარტებები გააკეთა.
„ვიცით, რომ კანონპროექტის მიღება ევროკავშირთან ასოცირების ერთ-ერთი მოთხოვნაა და მივესალმებით იმას, რომ კანონს დროულად ვიღებთ. მით უფრო, რომ ამ ტიპის კანონი პოსტსაბჭოთა სივრცეში უკვე მოქმედებს და შესაბამისად, მხარს ვუჭერთ მის წარდგენას,“ – განაცხადა კანონპროექტთან დაკავშირებით, ფრაქცია „ნაციონალური მოძრაობის“ წევრმა თინათინ ბოკუჩავამ.
კანონპროექტთან დაკავშირებით მოსაზრება გამოთქვა განათლების, მეცნიერებისა და კულტურის კომიტეტის თავმჯდომარემ, მარიამ ჯაშმა.
„მინდა მივესალმო აღნიშნულ ინიციატივას, დეპოზიტების დაზღვევის შესახებ კანონპროექტი ნამდვილად იქნება წინ გადაგმული ნაბიჯი. ჩვენ ამით რეალურად ვქმნით საფინანსო ბაზრის უსაფრთხოების და გრძელვადიანი სტაბილურობის ძალიან მნიშვნელოვან გარანტებს, დიდი მადლობა ჩვენს საფინანსო ბლოკს ამ ძალიან მნიშვნელოვანი ინიციატივისთვის“ – განაცხადა მარიამ ჯაშმა.
სხდომაზე „დეპოზიტების დაზღვევის სისტემის შესახებ“ კანონპროექტთან დაკავშირებით პოზიცია საფინანსო-საბიუჯეტო კომიტეტის თავმჯდომარემ, ირაკლი კოვზანაძემ წარმოადგინა.
მისი განცხადებით, წარმოდგენილი კანონპროექტით საქართველოში ახალი ინსტიტუციის დანერგვა იწყება.
„ეს არის ახალი ინსტიტუცია, რომელიც ახალ ფუნდამენტს ჩაყრის ქართული საფინანსო სისტემის მდგრადობის მიმართულებით. წარმოდგენილი სისტემა, ქართული საბანკო სისტემის მეანაბრეს დაცულობის მაღალ ხარისხს აძლევს და ამასთან გარანტირებულია საბანკო სექტორის მდგრადობა. შედეგად, ქართული საბანკო დაწესებულებები დაცულია რყევებისგან და შესაბამისად იზრდება ეკონომიკური ეფექტები,“ – განაცხადა საფინანსო-საბიუჯეტო კომიტეტის თავმჯდომარემ.
მისივე განმარტებით, მარტო დეპოზიტების დაზღვევის სისტემის ამოქმედება საბანკო სისტემის განვითარების გარანტი ვერ იქნება და ამისთვის აუცილებელია სამი მნიშვნელოვანი კომპონენტის ამუშავება.
„ეს არის ეფექტური ფულად-საკრედიტო პოლიტიკა, მოქნილი და მკაცრი საბანკო ზედამხედველობა და ქმედითი დეპოზიტების დაზღვევის სისტემა. თუ ეს სამი მდგენელი ერთად მუშაობს, სწორედ ამ შემთხვევაში გვაქვს საშუალება საბანკო სექტორი განვავითაროთ. დღეს, ჩვენ, საფინანსო სექტორის სწორედ ამ ერთი მნიშვნელოვანი მდგენელის, დეპოზიტების დაზღვევის სისტემის შექმნას ვუყრით საფუძველს,“ – განაცხადა საფინანსო-საბიუჯეტო კომიტეტის თავმჯდომარემ, ირაკლი კოვზანაძემ.
პლენარულმა სხდომამ საქართველოს კანონის პროექტი „გადახდისუუნარობის საქმის წარმოების შესახებ“ საქართველოს კანონში ცვლილების შეტანის თაობაზე“ პირველი მოსმენისთვის განიხილა.
საქართველოს მთავრობის ინიციატივა დეპუტატებს საქართველოს ეკონომიკისა და მდგრადი განვითარების მინისტრის მოადგილემ, ირმა ქავთარაძემ წარუდგინა. კანონპროექტით ფართოვდება იმ კრედიტორთა წრე, რომელთაც უფლება აქვთ მოითხოვონ გადახდისუუნარობის საქმის წარმოების გახსნა.
კანონს ემატება ახალი მუხლი, რომლის თანახმად, ყველა კრედიტორს, რომელთა მოთხოვნები აღიარებულია სასამართლოს მიერ, უფლება აქვს, მეურვისგან მოვალის მიმართ წარმოებული გადახდისუუნარობის საქმის წარმოების მიმდინარეობის შესახებ არსებული ნებისმიერი ინფორმაცია და მასთან დაკავშირებული დოკუმენტაცია მოითხოვოს.
პროექტის თანახმად, მოვალეს უფლება ეძლევა განცხადებით მოითხოვოს არა მარტო გაკოტრება, არამედ – რეაბილიტაციაც. ამ უკანასკნელ შემთხვევაში, მან განცხადებას უნდა დაურთოს რეაბილიტაციის გეგმის პროექტიც. ამასთან, მოვალეს აღნიშნული განცხადების წარდგენის საშუალება მიეცემა იმის მიუხედავად, თუ რა გადაწყვეტილებას მიიღებს მომრიგებელი საბჭო. ამ შემთხვევაში, რეაბილიტაციის დაწყების საკითხს სასამართლო გადაწყვეტს.
მინისტრის მოადგილემ ასევე განმარტა, რომ საკომიტეტო განხილვებისას კანონპროექტთან დაკავშირებული შენიშვნები და მოსაზრებები პროექტის წარმოდგენილ ვარიანტში უკვე ასახულია.
