“ამ ზაფხულს, იმ ზაფხულს… და ამასობაში გავიდა ცხოვრება!” _ ნინოშვილის ქუჩის მოუგვარებელი პრობლემა

ნინოშვილის ქუჩა დაბა ჩოხატაურის ცენტრთან მდებარე უახლოესი ქუჩაა, მაგრამ მიუხედავად ამისა, როგორც ქუჩის მცხოვრებლები ამბობენ, ვერც ერთ დროში, ვერც ერთი ხელისუფლის ყურადღება ვერ მიიქციეს _ აღნიშნული ქუჩის მცხოვრებლების ძირითადი პრობლემა დაზიანებული და გადასაადგილებლად რთული გზაა. მათი თქმით, ეს პრობლემა რამდენიმე ათეული წელია, აწუხებთ.

“თითქმის, 50 წელია, ამ ქუჩის რეაბილიტაციას ველოდები, ქუჩაზე მცხოვრები უფროსი თაობის ადამიანები კი _ გაცილებით მეტი. ვერც ერთ დროს, ხელისუფლების ვერც ერთი წარმომადგენელი ვერ დავაინტერესეთ ჩვენი პრობლემით. ყოველ წელიწადს გვპირდებიან, ამ ზაფხულს ვერ მოხერხდა და იმ ზაფხულს აუცილებლად გაკეთდებაო. არადა, მგონი, ერთადერთი ქუჩაა მთელ მუნიციპალიტეტში, რომელიც ასეთ მდგომარეობაშია.

ჯერ სანიაღვრე არხების გაკეთებას ძლივს დაადგა საშველი _ სამჯერ გამოცხადდა ტენდერი, სამმა შემსრულებელმა “იმუშავა” და გამოუთხარა ჩვენს ღობეებს ძირი. ბოლოს და ბოლოს, გაკეთდა, ჩაყარეს ცხაურები. არხებით რამდენიმე ადგილას გაჭრეს გზაც, მაგრამ ცხაურზე იმდენად ვიწრო ლითონის ზოლი დააფარეს, ძალიან ყურადღებით უნდა იყო, რომ ფეხი ამ ზოლზე არ დაადგა, თორემ ცხაურში და არც თუ სასიამოვნო მდგომარეობაში აღმოჩნდები. ამ ზაფხულს გადამავიწყდა _ ბავშვი მყავდა ხელში, ჩავვარდი და ფეხი ვიღრძე. მადლობა ღმერთს, ბავშვი არ დაშავებულა.

ჩვენი ქუჩით ხშირად სარგებლობენ ჭავჭავაძის ქუჩისა და სოფელ შუა ფარცხმის მცხოვრებლებიც. ჩემსავით შეემთხვა შუა ფარცხმაში მცხოვრებ ერთ-ერთ ქალბატონს. მან, სამწუხაროდ, ფეხი მოიტეხა და კლინიკაში სასწრაფო დახმარების მანქანამ გადაიყვანა. ამ ფაქტს მე შევესწარი.

მანქანის ყოველ გავლაზე ხომ ამოყირავებულია ეს ზოლი. ზოგი პატიოსანი მძღოლი ჩერდება და ასწორებს ლითონის ზოლს, ზოგი გაივლის და ჩვენი საწვალებელია მერე. თან ისეთი მძიმეა, ძალა სჭირდება, რომ გაასწორო. ამასთან, იმხელა ხმა აქვს, ღამის საათებში თუ გადაიარა მანქანამ ზედ, მთელ უბანს აღვიძებს. პარალელურ ქუჩაზე მცხოვრებმა შემოგვჩივლა, იქნებ, გააკეთონ ბიჭებმა, თორემ ღამე მაგის ხმაური მაღვიძებს, მერე ვეღარ ვიძინებ და მთელი დღე წნევა მაქვსო”, _ მცხოვრებთა სათქმელს გვიზიარებს ნინოშვილის ქუჩის ერთ-ერთი მცხოვრები, რომლის თქმითაც, გზა ისეა დაზიანებული, ფეხით გადაადგილება ძალიან უჭირთ.

“სანიაღვრე არხების კეთების სამუშაოებმა საერთოდ გაანადგურა გზა. ჯერ ისე დავიწროვდა, ორი მანქანა შეუვლის ერთმანეთს გვერდს კი არა, არის მონაკვეთი, სადაც ერთ მანქანასაც უჭირს გავლა.

ქუჩა რომ გადათხარეს, მერე მოიტანეს რამდენიმე მანქანა ერთმანეთში არეული ქვა და ტალახი, დაყარეს და მიგვატოვეს. ტალახი გადარეცხა წვიმამ, ქვა დარჩა. მძღოლები კიდევ სიფრთხილეს იჩენენ მოძრაობისას, მაგრამ ამხელა ლოდებზე ფეხით გადაადგილება საერთოდ შეუძლებელია. ამას გარდა, გზა რამდენიმე ადგილას ჩაზნექილია, რომლის გასწორებას, რამდენიმე წელია, ჩვენ, ადგილობრივები ვცდილობთ. ხელისუფლების წარმომადგენლები კი, რატომღაც, არ ინტერესდებიან. იქნებ, თქვენი მეშვეობით გაგვცენ პასუხი, როდის დაადგება საშველი ნინოშვილის ქუჩის რეაბილიტაციას და თუ არ იქნება, ისიც გვითხრან, რომ ტყუილი მოლოდინი არ გვქონდეს”, _ ამბობს ჩვენი რესპონდენტი.

ქუჩის მცხოვრებთა თქმით, მათ პრობლემას კარგად იცნობს მერის წარმომადგენელი დაბაში გოჩა ჯინჭარაძე. როგორც ადგილობრივები ამბობენ, ჯინჭარაძე წლის განმავლობაში რამდენჯერმე იყო მათ უბანში და მდგომარეობას გაეცნო. შესაბამისად, ადგილობრივთა კითხვაზე პასუხის მისაღებად ჯერ მას დავუკავშირდით, შემდეგ კი მუნიციპალიტეტის პირველ პირებს.

მერის წარმომადგენელმა გოჩა ჯინჭარაძემ ჩვენთან საუბრისას დაადასტურა, რომ გზა გასაკეთებელია, მერიც საქმის კურსში ჰყავს ჩაყენებული და კითხვაზე პასუხის მისაღებად, თუ როდის მოხდება ნინოშვილის ქუჩის რეაბილიტაცია, ირაკლი კუჭავასთან გადაგვამისამართა:

“ფაქტია, რომ გასაკეთებელია. რეაბილიტაცია როდის მოხდება ამაზე ვერ გაგცემთ პასუხს. ჩემი მოვალეობაა მერს გავაგებინო პრობლემის შესახებ. მერი აღნიშნული საკითხის შესახებ საქმის კურსშია და შეგიძლიათ, მას დაუკავშირდეთ ამ თემასთან დაკავშირებით”, _ გვითხრა ჯინჭარაძემ.

ჯინჭარაძის შემდეგ მერთან დაკავშირება ვცადეთ, მაგრამ ირაკლი კუჭავამ ჩვენს სატელეფონო ზარს არ უპასუხა. მერიის პრესსამსახურში კი გვითხრეს, რომ ნინოშვილის ქუჩა ასფალტირებულია:

“სრულად ასფალტირებული და რეაბილიტირებულია ნინოშვილის ქუჩა. ალბათ, ასეა, რადგან შესაბამის სამსახურს ქუჩა არ შეეშლებოდა”, _ გვითხრეს პრესსამსახურში.

მერიის პრესსამსახურიდან მიღებული პასუხის შემდეგ მუნიციპალიტეტის მერიის ინფრასტრუქტურის სამსახურის უფროსს, გოგი ბოლქვაძეს დავუკავშირდით _ მისი თქმით, ნინოშვილის ქუჩა ასფალტირებულია, თუმცა, ჩიხები გაკეთებული არ არის.

კითხვაზე _ როდის მოხდება ამ ჩიხების რეაბილიტაცია, ინფრასტრუქტურის სამსახურის უფროსს პასუხი არ აქვს.

ბოლქვაძე ამბობს, რომ აღნიშნული საკითხი, სავარაუდოდ, მომავალი წლის ბიუჯეტის მომზადების დროს განიხილება:

“თვითონ ნინოშვილის ქუჩა მოასფალტებულია, თუმცა ჩიხები არ არის მოასფალტებული. სავარაუდოდ, მომავალი წლის ბიუჯეტში დაიგეგმება”, _ ამბობს ინფრასტრუქტურის სამსახურის უფროსი.

უფრო კონკრეტული პასუხისთვის ჩოხატაურის საკრებულოს თავმჯდომარეს, ზაალ მამალაძესაც დავუკავშირდით _ საკრებულოს თავმჯდომარის თქმით, ნინოშვილის ქუჩის რეაბილიტაციის შესახებ საკითხს საკრებულო მას შემდეგ განიხილავს, რაც ახალი პროექტების განხილვა დაიწყება:

“ცენტრალური ქუჩა ასფალტირებულია, თუმცა, ნინოშვილის ქუჩას აქვს 2 შესახვევი და ისინი ასფალტირებული არაა. არაა ასფალტირებული, ასევე, ნინოშვილის და ბურჭულაძის ქუჩების დამაკავშირებელი პატარა მონაკვეთი. შარშან დავიწყეთ შესახვევების მოასფალტება. სხვა გზებთან ერთად რამდენიმე შესახვევი გავაკეთეთ და იმედია, წელსაც გავაგრძელებთ. ჯერ ახალი პროექტირება არ დაწყებულა. ვიცით, რომ ეგ საკითხი დგას და აუცილებლად დავაყენებთ საკრებულოზე”, _ გვითხრა ზაალ მამალაძემ.