ჩოხატაურის მუნიციპალიტეტის სოფელ ჭაჭიეთში ჯერ არც მოსახლეობის მიერ არჩეული ამბულატორიის შენობის მშენებლობა დასრულებულა და არც გზის გაკეთების სამუშაოები დაწყებულა.
სოფლის ამბულატორიის აშენება სოფლის მხარდაჭერის პროგრამის ფარგლებში, ჯერ კიდევ გასულ წელს გადაწყდა. სამშენებლო სამუშაოები ინდმეწარმე ჰამლეტ ბერიძემ განახორციელა.
ჩოხატაურის მერის წარმომადგენელი ხიდისთავის თემში ზურაბ მათითაიშვილი ჯერ კიდევ მშენებლობის დაწყებამდე ამბობდა, რომ პროგრამით გამოყოფილი 10 000 ლარი შენობის ბოლომდე დასასრულებლად სამყოფი არ იქნებოდა, თუმცა, წელს, როცა სამუშაოები გაჩერებულია, ჩვენს კითხვაზე, თუ როდის დასრულდება სოფელში ამბულატორიის მშენებლობა, ამბობს, რომ ტენდერში გამარჯვებული კომპანიის გამოვლენას ელოდებიან, რის შემდეგაც მშენებლობა დასრულდება, მაგრამ ფინანსური სახსრების გამო ბოლომდე ვერა.
_ სამშენებლო სამუშაოები დაიწყება უახლოეს მომავალში. დადებულია ტენდერზე, გამოვლინდება გამარჯვებული და ამბულატორიაც დასრულდება, მაგრამ ბოლომდე ვერ სრულდება, იქედან გამომდინარე, რომ ის თანხა აღარ ჰყოფნის, მაგრამ ექთნის ოთახი აუცილებლად გაკეთდება და გარედან მოპირკეთდება, შენობის სახეს მიიღებს.
_ რატომ არ ჰყოფნის თანხა ამბულატორიის დასრულებას?
_ ჭაჭიეთისთვის არის გამოყოფილი 10 000 ლარი. შარშან, უფრო მეტი სამუშაოები ჩატარდა 10 000 ლარის ფარგლებში, ვიდრე წელს უნდა ჩატარდეს. მასალების გაძვირების გამო, თანხა აღარ ჰყოფნის.
ცნობისთვის, ჭაჭიეთში ამბულატორია იმ ადგილას შენდება, სადაც წლების წინ სოფლის ადმინისტრაციული შენობა იდგა; ასევე, სკოლა ფუნქციონირებდა. თუმცა, ახლა, სოფელს არც სკოლა აქვს და არც ადმინისტრაციული შენობა, რადგან დაშალეს. სოფელში არ არის არც საბავშვო ბაღი და არც მაღაზია. მოსახლეობას პროდუქტის შესაძენად წასვლა ხიდისთავში ან ჩოხატაურში უწევს.
რაც შეეხება გზას, 200 მეტრზე ბეტონის საფარის დაგებას ითვალისწინებს. ზურა მათითაიშვილის თქმით, სამუშაოების დასაწყებად ტენდერში გამარჯვებული კომპანიის გამოვლენას ელოდება:
_ გზას რაც შეეხება, მდინარიდან ამოვა 200 მეტრი და წამოვა გზისკენ, გაკეთდება ბეტონი, კაპიტალურად თავისი არხებით და ყველაფრით. პროექტი მზადაა, ტენდერზე დევს და ველოდებით გამარჯვებულ კომპანიას სამუშაოების დასაწყებად.
ავტორი
