ამერიკელმა კონგრესმენებმა სახელმწიფო მდივანს, მარკო რუბიოს ორპარტიული წერილით მიმართეს, სადაც ადმინისტრაციას მოუწოდებენ, დაიცვას აშშ-ის ყოფილი თანამშრომლები საქართველოში.
“გწერთ, რომ მოგიწოდოთ, გამოიყენოთ თქვენს განკარგულებაში არსებული ინსტრუმენტები და დაიცვათ აშშ-ის ყოფილი თანამშრომლები, რომლებიც უსამართლოდ იყვნენ მიზანში ამოღებულნი ქართველი ჩინოვნიკების მიერ ანტიამერიკული აქტივობების ბოლო ტალღის დროს. საქართველოს ხელისუფლებამ, „ქართული ოცნების“ ხელმძღვანელობით, არაერთხელ გამოაცხადა შეერთებულ შტატებთან ორმხრივი ურთიერთობების აღდგენის სურვილი, მაგრამ მათი ქმედებები და განცხადებები საპირისპიროზე მიუთითებს. მოგიწოდებთ, მოითხოვოთ საქართველოს მთავრობისგან გარანტიები, რომ აშშ-ის საერთაშორისო განვითარების სააგენტოს (USAID) ყოფილი საგარეო სამსახურის მოქალაქეები (FSN) და შეერთებული შტატების მიერ დასაქმებული სხვა პერსონალი არ იქნება მიზანში ამოღებული.
1 ოქტომბერს მედიაში გავრცელდა ინფორმაცია, რომ საქართველოს სახელმწიფო უსაფრთხოების სამსახურის უფროსმა მამუკა მდინარაძემ აშშ-ის მთავრობა რევოლუციის წაქეზებაში დაადანაშაულა უსაფრთხოების სამსახურის თანამშრომლებისთვის „გადახდების“ გაცემით – რაც სინამდვილეში აშშ-ის პერსონალის გათავისუფლების შემდეგ საქართველოს კანონმდებლობით გათვალისწინებული (პენსიის) გადახდები იყო. მის კომენტარებს „ქართული ოცნების“ პოლიტიკოსებიც იზიარებენ. ეს არასწორი დახასიათება უსაფრთხოების სამსახურის წევრებს საფრთხეში აყენებს. ეს განცხადებები ასევე მნიშვნელოვან მონაცემებს წარმოადგენს: „ქართულმა ოცნებამ“ არ გამოავლინა სერიოზული განზრახვა შეერთებულ შტატებთან ორმხრივი ურთიერთობების გაუმჯობესების ძიების შესახებ.
ჩვენ მივესალმებით სახელმწიფო დეპარტამენტის 6 ოქტომბერს მიღებულ გადაწყვეტილებას, რომ ამ საკითხის განსახილველად შეხვედრა მოეთხოვა აშშ-ში საქართველოს ელჩთან, თამარ ტალიაშვილთან. ასევე, ჩვენ მოვითხოვთ, რომ სახელმწიფო დეპარტამენტმა მოუწოდოს „ქართულ ოცნებას“, ოფიციალურად და საჯაროდ უარყოს ეს სახიფათო განცხადებები. მნიშვნელოვანია, რომ ტრამპის ადმინისტრაციამ განიხილოს ეს ნარატივები, რომელიც საფრთხეს უქმნის საქართველოში მყოფ აშშ-ის პერსონალს და ქმნის შემაშფოთებელ პრეცედენტს სხვა უცხო ქვეყნების მთავრობებისთვის. „ქართულ ოცნებაზეა“ დამოკიდებული პროდუქტიული ორმხრივი ურთიერთობების დამყარება, მაგრამ უსაფრთხოების სამსახურის თანამშრომლები და ყოფილი აშშ-ის პარტნიორები არ უნდა იქნენ პოლიტიკურ პაიკებად გამოყენებული.
ამერიკის შეერთებული შტატების მთავრობა დამოკიდებულია ადგილობრივ პერსონალზე, რათა შეასრულონ სამუშაო აშშ-ის დეპარტამენტებისა და სააგენტოების მითითებებით. თუ ჩვენ არ დავიცავთ პერსონალს უცხო ქვეყნის მთავრობის თავდასხმებისგან, ეს შეზღუდავს ჩვენს შესაძლებლობას, დავასაქმოთ პერსონალი და განვახორციელოთ აშშ-ის პოლიტიკა მთელ მსოფლიოში. ჩვენ მოგიწოდებთ, დაგმოთ ეს თავდასხმები და უზრუნველყოთ, რომ სახელმწიფო დეპარტამენტი ენერგიულად უპასუხებს შეერთებული შტატების სახელით მომუშავე პერსონალის მიზანში ამოღებას, სადაც არ უნდა მოხდეს ეს”,_ წერებ სენატორები.
