ამერიკის შეერთებული შტატების ელჩის მოვალეობის შემსრულებელი ელიზაბეტ რუდი დღეს ლანჩხუთს სტუმრობდა. ელჩმა მუნიციპლიტეტისა და ლანჩხუთის საგანმანათლებლო რესურსცენტრის ხელმძღვანელობასთან ერთად ჯერ ნიგვზიანის საჯარო სკოლაში მიმდინარე სამშენებლო სამუშაოები მოინახულა, შემდეგ ჩიბათის საჯარო სკოლას ეწვია.
ჩიბათში ელიზაბეტ რუდს მასპინძლობა მასწავლებლის ეროვნული ჯილდოს მფლობელმა, სამოქალაქო განათლების პედაგოგმა ლადო აფხაზავამ გაუწია, რომელიც აშშ საერთაშორისო განვითარების საგენტოს მიერ დაფინანსებული სამოქალაქო განათლების პროგრამების მონაწილეა და მას პროფესიულ განვითარებაში დაეხმარა.
სანამ ჩიბათში დაგეგმილი შეხვედრა ოფიციალურ სახეს მიიღებდა, მანამ სკოლის ეზოში სახელდახელოდ მოწყობილ შემოდგომის კუთხესთან ელჩმა საკუთარი ხელით ჩურჩხელაც კი ამოავლო. შეხვედრის ოფიციალურ ნაწილში უცხოელმა სტუმარს ბავშვებმა იმ პროექტების შესახებ მიაწოდეს ინფორმაცია, რომელიც საზოგადოების საკეთილდღეოდ მოსწავლეთა აქტივობით განხორციელდა.
„ელიზაბეტ რუდს პირადად მივწერე წერილი და იმ აქტივობებისა და პროექტების შესახებ მოვუყევი, რაც ჩვენს სკოლაში გახორციელდა USAID-ის მხარდაჭერით. ისიც დაინტერესდა და აი, ის დღეს ჩვენი სტუმარია. დღეს ჩვენ მიერ შექმნილი პატარა სახელმწიფო _ ჩიბათის საჯარო სკოლა, დიდი სახელმწიფოს მასპინძელია და ეს ძალიან ბევრს ნიშნავს“, _ ამბობს ლადო აფხაზავა.
ჩიბათის სკოლის შემდეგ ელიზაბეთ რუდი ლანჩხუთის ოკუპაციის მუზეუმსაც ეწვია, სადაც მასსა და ლანჩხუთის სკოლების მოსწავლეებს შორის კითხვა-პასუხის სესია გაიმართა.
„ჩვენი სახელმწიფო შესაძლებლობის ფარგლებში ქართველ პარტნიორებთან ერთად ყველაფერს აკეთებს ოკუპაციის შესაჩერებლად. თუმცა სანამ რუსეთში პოლიტიკური ხელმძღვანელობა არ შეიცვლება, მანამდე სრულ დეოკუპაციაზე საუბარი რთულია. სანამ ეს მოხდება, მანამდე ვცდილობთ საქართველოს დახმარება გავუწიოთ, როგორც პოლიტიკურ, ისე ეკონომიკურ განვითარებაში. როცა დადგება დრო სრული დეოკუპაციის, ჩვენ მზად უნდა ვიყოთ საიმისოდ, რომ ისე თავისუფლად და განვითარებულად ვიგრძნოთ თავი, როგორც თავისუფალ სივრცეში მოცურავე კალმახმა“, _ აღნიშნა ელჩმა ერთ-ერთი მოსწავლის კითხვის საპასუხოდ.
მან აღნიშნა, რომ ის საქართველოსთან 2004 წლიდან მოყოლებული თანამშრომლობს, რამდენჯერმე ოკუპირებულ ტერიტორიაბზეც არის ნამყოფი და კარგად იცნობს იქაურ პრობლემებს.
