9 აპრილის ტრაგედიიდან 33 წლის შემდეგ რუსული ორიენტაციის მქონე ორგანიზაციის “ალტ-ინფოს” პარტიის “კონსერვატიული მოძრაობის” ოფისი ლანჩხუთში გახსნილად გამოაცხადეს.
პარტიის პრეზენტაცია ლანჩხუთში, დაახლოებით, ერთი თვის წინ შედგა, თუმცა, იქიდან მოყოლებული, ოფისის კარი გამოკეტილი იყო. 9 აპრილს კი, ბევრისთვის მოულოდნელად, ოფისში “ალტ-ინფოელებმა” ინვენტარი შეზიდეს და პარტიის ოფისი გახსნილადაც გამოაცხადეს.
ამ ფაქტს დღის ბოლოსთვის პრორუსული ორგანიზაციის პარტიის ოფისთან, პროტესტის ნიშნად, აქტივისტების მობილიზება მოჰყვა. ლანჩხუთში ჩამოვიდა “გურულ ფირალად” შერაცხული ირმა გორდელაძეც, რომლის თქმითაც, “ალტ-ინფოელთა” ლანჩხუთელმა ლიდერმა გია გოთუამ მათთან გასაუბრება არ ისურვა. “ვიყაი, არიყაი, საიყაი”, _ თქვა ირმამ გორდელაძემ და “ლაივშიც” დაურეკა გოთუას, თუმცა, ამაოდ.
“ლანჩხუთი ყველაფერში ორიგინალურია. როგორც გავიგე, დღეს 9 აპრილს, “ალტ-ინფოს” ოფისი მუშაობას შეუდგა. ამისთვის გაწირეს სიცოცხლე იმ მამულიშვილებმა 33 წლის წინ?! ასე დაუფასეთ დაღვრილი სისხლი?
ზოგიერთებისთვის ლუსტრაციის კანონის მიღება სულაც არ ყოფილა საჭირო _ თვითლუსტრირებას ამჯობინებენ”, _ დაწერა ფეისბუქზე ფაქტით შეშფოთებულმა ლანჩხუთელმა ოპოზიციონერმა ლადო ჩხაიძემ.
საგულისხმოა, რომ ანტიკორუფციული მოძრაობის კვლევის მიხედვით, გია გოთუა, რომელიც ცოტა ხნის წინ ლანჩხუთში “კონსერვატიული მოძრაობის” დამფუძნებლად მოგვევლინა, იმ მეწარმეთა ჩამონათვალშია, რომლებიც სახელმწიფო ტენდერებს იგებენ და პრორუსული ორგანიზაციისთვის შეწირულობებსაც აკეთებენ.
კვლევის მიხედვით, საქართველოში პრორუსული პარტია “კონსერვატიული მოძრაობის” შემომწირველთა რაოდენობა იზრდება. შემომწირველთა შორის არიან, როგორც ყოფილი საჯარო მოხელეები, ასევე, მეწარმეები, რომლებიც სახელმწიფო ტენდერებს იგებენ.
კვლევის მიხედვით, რომელიც “რადიო თავისუფლებამ” გაავრცელა, პრორუსული პარტიის დამფინანსებელთა ჩამონათვალშია მეწარმე გია გოთუაც.
გავრცელებული ინფორმაციის მიხედვით, გოთუამ “კონსერვატიულ მოძრაობას” 750 ლარი 17 მარტს შესწირა. გოთუა საჯარო რეესტრის მიხედვით, სამ კომპანიასთან არის დაკავშირებული. ის არის შპს “ივერია 7”-ისა და “ივერია 77”-ის დირექტორი და მეწილე, ასევე, ლანჩხუთის საზოგადოებრივი დარბაზის დირექტორი.
“გია გოთუას კომპანიებს 2012 წლიდან დღემდე, 10 მილიონ ლარზე მეტის სახელმწიფო ტენდერები აქვს მოგებული. მისი კომპანიის, “ივერია 7”-ის კონტრაქტორები არიან სამხარაულის ექსპერტიზის ეროვნული ბიურო, სახელმწიფო უსაფრთხოების სამსახური, გაზის ტრანსპორტირების კომპანია, საქართველოს ფოსტა, საგანმანათლებლო და სამეცნიერო ინფრასტრუქტურის სააგენტო და სხვადასხვა მუნიციპალიტეტის მერიები.
პრორუსული “კონსერვატიული მოძრაობის” შემომწირველს სახელმწიფო უსაფრთხოების სამსახურის ისეთ ტენდერში აქვს მონაწილეობა მიღებული, რომელთანაც სუს-ი გრიფით საიდუმლო კონტრაქტს აფორმებს და რომელსაც თან უნდა ახლდეს სახელმწიფო საიდუმლოებასთან დაკავშირებული საქმიანობის ნებართვა. ტენდერის გამარჯვებული, სუს-ის ერთ-ერთ შენობაში სარემონტო სამუშაოების შესრულების უფლებას იღებს.
საიდუმლო საქმიანობასთან დაკავშირებული ნებართვის ქონაა კიდევ ერთი სახელმწიფო შესყიდვის მოთხოვნა მონაწილეებისთვის, რომლის მოგებითაც, ასევე, დაინტერესებული იყო “ივერია 7″ _ ესაა 2017 წელს სასჯელაღსრულებისა და პრობაციის სამინისტროს თითქმის ერთ მილიონიანი ღირებულების ტენდერი. ამავე უწყების იმავე პირობების მქონე სხვა ტენდერში გია გოთუას კომპანია ერთადერთი მონაწილე იყო 2017 წელს”, _ წერია “რადიო თავისუფლების” მიერ გამოქვეყნებულ წერილში.
მედიასაშუალებებში გაჟღერებულ ამ ინფორმაციის მოგვიანებით თავად გია გოთუას პასუხიც გავრცელდა.
“სამწუხაროდ, მედიასაშუალებების აბსოლუტური უმრავლესობა გადართულია “ნაციონალური მოძრაობის” დღის წესრიგზე, რომლის მიზანი საზოგადოების დეზორიენტაციაა და განსხვავებულ პოზიციას “პრორუსულად” და “მოღალატეობრივად” შეფუთვას ტენიან მოსახლეობის ისედაც ათასი პრობლემით გადაჭედილ თავებს.
ჩემი კომპანია “ივერია 7” ფაქტობრივად, გაუსაძლის, გაუკუღმართებული კონკურენციისა და კორუფციის პირობებში 15 წელია, შეუწყვეტლივ ფუნქციონირებს. არ დამითვლია ჯამში რა მოცულობის სამუშაოების შესრულება შეძლო, მაგრამ ყველა კონტაქტი, გამონაკლისის გარეშე, მიღებული აქვს კონკურენციის პირობებში. კომპანია “ივერია 7”-ს 300-მდე სახელმწიფო ელექტრონულ ტენდერში აქვს მიღებული მონაწილეობა და მათ შორის არც ერთი სახელმწიფოს მფარველობით და “ვინმესგან დალაგებული”. სისტემური შევიწროებისა და არაობიექტური დამოკიდებულების ქვეშ მყოფი “ივერია 7” ასეთ პირობებშიც ახერხებს პირნათლად შეასრულოს ყველა ვალდებულება.
პირადად ჩემი ინიციატივით, “სახალხო ბანკთან” (ლიბერთი ბანკი) ერთად შეიქმნა ქვეყანაში პირველად მოსახლეობის გაზიფიცირების განვადებით მომსახურების პროექტი, ჩვენ ჩავდექით მოსახლეობასა და ბანკს შორის გარანტად. ოჯახი არ დაგვიტოვებია გაზიფიცირებისა და გამათბობლების (ვისაც სურვილი ჰქონდა) გარეშე… და როცა საქართველოს მთავრობამ 2008 წელს გამოაცხადა კონკურსი ინტერესთა გამოხატვაზე ქვეყნის გაზის მთლიან ინფრასტრუქტურაზე, განაცხადი გააკეთა ორმა კომპანიამ _ “ივერია 7”-მა და “სოკარმა”. ჩვენ მხოლოდ ერთ ლოტზე, გურიის სამ მუნიციპალიტეტზე და ქალაქ ფოთზე გავაკეთეთ განაცხადი, მაგრამ, როგორც აღმოჩნდა, სახელმწიფო მნიშვნელობის ინვესტორის “სოკარისა” და ქვეყნის ინტერესებში იყო თორმეტივე ლოტი ერთ მფლობელის ხელში ყოფილიყო და ჩვენ ხელი არ შეგვიშლია. მით უმეტეს, იყო წინადადება “სოკარის” ხელმძღვანელობიდან, რომ როგორც კი შემოვიდოდნენ საქართველოში, პირველ რიგში “ივერია 7”-თან ითანამშრომლებდნენ გაზიფიცირების სფეროში… მაგრამ არავითარი თანამშრომლობა! პირიქით, არავინ აგვინაზღაურა ქალაქ ლანჩხუთის ცენტრალური უბნების მოსახლეობისთვის ჩვენ მიერ აშენებული გაზსადენების ღირებულება და “ნაციონალურმა” ხელისუფლება კატეგორიულად მომთხოვა შემეჩერებინა გაზიფიცირების სამუშაოები და ურჩობის შემთხვევაში, დამიჭერდნენ. დღეს “სოკარის” დაფრთიანებული გაზის სამშენებლო კომპანიები კონკურენციაში პრივილეგირებული მდგომარეობით ოპერირებენ და მიდის ყოველმხრივი შევიწროება “ივერია7”-ის მსგავსი უპატრონო კომპანიების ჩამოსაცილებლად.
15 წელიწადში 12 მილიონის სამუშაოების შესრულება საშუალო დონის კომპანიისთვის ბევრი ნამდვილად არ არის, მაგრამ “ივერია 7”-სთვის, რომელსაც 100-ზე მეტ სოფელსა და ლოკაციაზე აქვს შესრულებული სამუშაოები, შეიძლება საამაყოც იყოს, რადგან ჩვენ ამას ვახერხებთ ღმერთის შეწევნით, ურთულეს პირობებში, დამოუკიდებლად და დიდი პასუხისმგებლობით, ყოველგვარი პატრონისა და “კრიშის” გარეშე. სუს-თან არათუ მოქმედი პროექტი, ამ 15 წელიწადში ერთი ხელშეკრულებაც არა მაქვს გაფორმებული.
რაც შეეხება “კონსერვატიული მოძრაობის” დამფინანსებლებში ჩემს მოხსენიებას, გადაჭარბებულია. მე მხოლოდ სიმბოლური თანხით გამოვხატე ჩემი მხარდაჭერა და პატივისცემა პარტია “კონსერვატიული მოძრაობის” მიმართ, როგორც წევრმა და ლანჩხუთის ოფისის ხელმძღვანელმა”, _ განმარტავს გოთუა მედიასაშუალებებში გაჟღერებული ინფორმაციის პასუხად.
ავტორი
