პარტია “ხალხისთვის“ ლიდერი და დამფუძნებელი ანა დოლიძე სამი დღის განმავლობაში გურიაში იმყოფებოდა.
ანა დოლიძის თქმით, გურიის სამივე მუნიციპალიტეტში მისი პარტიიდან იბრძოლებენ ადგილობრივი თვითმმართველობის არჩევნებზე.
“ამ ეტაპზე ვიბრძოლებთ საკრებულოში მოხვდნენ ჩვენი პარტიის წარმომადგენლები და აქტიურად მოხდეს ხალხის პრობლემების გაჟღერება სხდომებზე. ასევე ვიმუშავებთ მოხდეს ეფექტურად ამ პრობლემების მოგვარება“, _ აღნიშნა „გურია ნიუსთან“ საუბრის დროს ანა დოლიძემ.
მან, ასევე, ისაუბრა სამდღიანი შეხვედრის შესახებ.
“მე ყოველთვის ვაწყობ “მოსმენის ტურს“ და ამ ეტაპზე ვიმყოფებით დასავლეთ საქართველოში. სამი დღის განმავლობაში ვიყავი ოზურგეთის, ჩოხატაურის და ლანხუთის მუნიციპალიტეტებში.
ვესაუბრები მოსახლეობას და ვეცნობი მათ პრობლემებს. მინდა ვთქვა, რომ ხიდი ჩატეხილია მოსახლეობას, რეალურ ცხოვრებასა, სატელევიზიო და პოლიტიკურ ცხოვრებას შორის. რეალობა არის სხვა. სხვა გამოწვევები აქვს ხალხს: უმთავრესი პრობლემა არის დასაქმება.
მაგალითად, ჩოხატაურში გაგიჭირდებათ ახალგაზრდის ნახვა, რადგან ისინი სამუშაოდ სხვადასხვა ქალაქებში არიან წასული ან კიდევ ვინც ადგილზე იმყოფებიან, სხვაგან წასვლაზე ფიქრობენ. ჩვენს ხელისუფლებას არანაირი სურვილი არ აქვს, რომ სიცოცხლე ჩაასხას რეგიონებში და რაც შეიძლება მეტი სამუშაო ადგილები შექმნან“.
“გურია ნიუსის“ კითხვაზე ხელისუფლებაში მოსვლის შემთხვევაში, რა გეგმები აქვს ანა დოლიძეს და როგორ აპირებს თუნდაც მის მიერ ჩამოთვლილი პრობლემების გადაჭრას, ანა დოლიძემ გვიპასუხა, რომ აუცილებლად მოსაგვარებელია დასაქმების პრობლემები და ამ კუთხით ყველაზე მეტს იმუშავებენ.
„ნახეთ, რა მოხდა “ქართული ოცნების“ დროს _ ეს ხელისუფლება იღებს საგარეო ვალებს. იმის მაგივრად, რომ ხელისუფლება იზიდავდეს ინვესტიციებს, ხსნიდეს ქარხნებს, საწარმოებს, ყველა კარგად ვხედავთ, რაც ხდება ამ ქვეყანაში. ამის გაკეთება შესაძლებელია _ პირველი, უნდა გაასწორონ ის საკითხები სასამართლოში, რაც აუცილებლად გასასწორებელია; ადამიანებს უნდა გაუჩნდეს გრძნობა, რომ საქართველოში ფულს ჩადებენ, იყვნენ მშვიდად, რომ არავინ წაართმევთ.
და მეორე, აუცილებელია აქტიური საერთაშორისო კონტაქტები. ელჩები უნდა ჩამოგვყავდეს რეგიონებში და ვაცნობდეთ დეტალურად, რა განძის მფობელები ვართ და როგორ შეიძლება დავეხმაროთ ადამიანებს.
რა პოტენციალი აქვს გურიას _ ამის შესახებ დეტალურად უნდა ვაცნობდეთ ინფორმაციას ელჩებს, მაგრამ ხელისუფლებას ნაკლებად აინტერესებს ქვეყნის განვითარება“, _ გვითხრა ანა დოლიძემ.
ავტორი: გიორგი გირკელიძე
