ბუდაპეშტში, ევროპის პოლიტიკური გაერთიანების მეხუტე სამიტი ტარდება, სადაც საუბარი იქნება 26 ოქტომბრის გაყალბებულ არჩევნებზე, რომელსაც შესაძლოა საქართველოს პრეზიდენტი, სალომე ზურაბიშვილი დაესწროს, რასაც „ერთიანობა ნაციონალური მოძრაობის“ ლიდერი, ანა წითლიძე გამოეხმაურა.
“ნებისმიერი საერთაშორისო ტრიბუნა, სადაც საუბარი იქნება 26 ოქტომბრის მიტაცებულ არჩევნებზე, არის ძალიან მნიშვნელოვანი და ძალიან მნიშვნელოვანია ამ პროცესში საქართველოს პრეზიდენტის როლი, რომელმაც თქვა არაერთხელ, რომ ამ ქვეყანაში არჩევნები არის მიტაცებული. ჩვენ ყველა საერთაშორისო ფრონტზე ვაგრძელებთ იმ საქმიანობას, რასაც ჰქვია მტკიცებულებების შეგროვება და ჩვენი საერთაშორისო პარტნიორებისთვის მიწოდება. დღითი-დღე კიდევ უფრო ნათელი ხდება ის სპეცოპერაცია, რომელიც 26 ოქტომბერს ჩაატარა ივანიშვილმა და „ქართულმა ოცნებამ“ საქართველოს მოქალაქეების წინააღმდეგ, ამიტომაც ეს პროცესი ჩვენს საერთაშორისო პარტნიორებთან ურთიერთობის, არჩევნების გაყალბების სქემებზე მუშაობის, ამ სქემების გამოვლენის პროცესი იქნება კიდევ უფრო მკაფიო, კიდევ უფრო აქტიური და განსაკუთრებით აქტიური იქნება ეს ყველაფერი საერთაშორისო დონეზე, რადგან ბრძოლის ერთ-ერთი მთავარი კომპონენტი არის სწორედ საერთაშორისო ასპარეზი,“- განაცხადა ანა წითლიძემ.
