ანასეულის სკოლის მშენებლობა ჯერ კიდევ 2022 წლის სექტემბერში დაანონსდა. ამ ინფორმაციიდან მალე ანასეულის სკოლის მოსწავლეებმა და მასწავლებლებმა სასწავლო პროცესი ლიხაურის საჯარო სკოლაში მეორე ცვლაში გააგრძელეს.
სკოლის შენობის დემონტაჟი 2023 წლის თებერვალში დაიწყო და დემონტაჟის დროს მუშა დაიღუპა.
პროექტის გახორციელება კომპანია “ჯავას” აქვს ჩაბარებული. როგორც ჩვენთვის გახდა ცნობილი “ჯავამ”, ჯერჯერობით, მხოლოდ ნანგრევების გატანა მოახერხა და ამ ეტაპისთვის სხვა სამუშაოები არ არის დაწყებული.
სსიპ მუნიციპალური განვითარების ფონდის მიერ 29 სექტემბერს მოწერილ წერილში ანასეულის სკოლის მშენებლობასთან დაკავშირებით, აღნიშნულია: “რაც შეეხება ანასეულის საჯარო სკოლის სამშენებლო პროექტს, ამ დროისთვის ფონდის მიერ დამტკიცებულ პროექტებში არ არის გათვალისწინებული მისი გახორციელება.”
ჩვენ, ამჯერად, “მუნიციპალური განვითარების ფონდის” პრესსამსახურს მივწერეთ, ხომ არ არის რამე ცვლილება ანასეულის საჯარო სკოლის მშენებლობასთან დაკავშირებით.
მუნიციპალური განვითარების ფონდის მიერ გამოგზავნილი შეტყობინებიდან ვიგებთ: „არ გვაქვს დაგეგმილებში ამ ეტაპზე“.
ანასეულის სკოლის დირექტორის ქეთევან ქადეიშვილის თქმით, ამ ეტაპზე, მშენებლობასთან დაკავშირებით კონკრეტულ ინფორმაციას არ ფლობს.
“გურია ნიუსი” ამ თემასთან დაკავშირებით აგრძელებს მუშაობას და დამატებით ინფორმაციას მოპოვებისთანავე შემოგთავაზებთ.
ავტორი
