გუშინ ნონა გაფრინდაშვილისა და კომპანია “Netflix”-ის სასამართლო დავას ახლო წარსულში ცნობილი მოჭადრაკე ანატოლი კარპოვი გამოეხმაურა. რუსულ მასმედიასთან გაკეთებულ განცხადებაში კარპოვმა ნონა გაფრინდაშვილის მხარე დაიჭირა.
“არ ვიცი, კასპაროვს ასეთი შეცდომა როგორ გაეპარა _ ის ხომ ფილმის კონსულტანტი იყო. შეიძლება, ყველა ეპიზოდი არ უნახავს ან ყველაფერს არ ეუბნებოდნენ, თორემ მან ხომ ძალიან კარგად იცის, რომ ნონა გაფრინდაშვილი დიდოსტატი გახდა, როგორც ქალებში, ასევე _ კაცებში. ის კაცებში დიდოსტატის წოდებას ვერაფრით მიიღებდა, კაცების ტურნირებში რომ არ ეთამაშა. ასე რომ, ამ ამბავში ნონა სრულიად მართალია.
ამასთან, ცხადია, რომ მისთვის უბრალოდ “საბჭოთა მოჭადრაკე” უნდა ეწოდებინათ და ამ შემთხვევაში კითხვები არ იქნებოდა, “რუსი მოჭადრაკე” კი უკვე კონკრეტული ეროვნული კუთვნილებაა.
ნონა გაფრინდაშვილი საქართველოში დაიბადა, ქართველია და ამით ამაყობს. საერთოდაც, მის რუს მოჭადრაკედ მოხსენიება გაუგებარია და ადრე ასე არც არავის მოუხსენიებია. ეძახდნენ “საბჭოთა კავშირის წარმომადგენელს”, “საბჭოთა მოჭადრაკეს”, უფრო ხშირად კი, “საქართველოს წარმომადგენელს” ან “ქართველ მოჭადრაკე ნონა გაფრინდაშვილს”, _ განაცხადა ანატოლი კარპოვმა.
გუშინვე ამ თემას გამოეხმაურა ციგურაობაში ოლიმპიური ჩემპიონი და რუსეთის დუმის დეპუტატი სვეტლანა ჟუროვა:
“რა, ქართველებს სსრკ-ში ჩაგრავდნენ? როგორც ჩანს, გაფრინდაშვილს დიდი გეგმები აქვს. ახლა საქართველოში ცხოვრობს და ამიტომ დაიწყო ლაპარაკი სექსიზმსა და ჩაგვრაზე.
ჭადრაკის ქართული სკოლა საბჭოთა კავშირში ძალიან ძლიერი იყო. რაც შეეხება ნონა გაფრინდაშვილს, მისი რეიტინგი კაცებს შორის ძალიან მაღალი გახლდათ. მას სსრკ-ში აფასებდნენ და გაფრინდაშვილის ეროვნებისთვის ყურადღება არასდროს მიუქცევიათ. მიმაჩნია, რომ მხატვრულ ფილმში მითითებული ფაქტები მის გადაღებამდე უნდა შეთანხმდეს. ამიტომ, თუ “Netflix”-მა გაფრინდაშვილთან ეს არ შეათანხმა, მაშინ ისინი ძალიან არასწორად მოიქცნენ”, _ თქვა ჟუროვამ.
რაც მთავარია, სერიალი “ლაზიერის გამბიტის” მთავარ კონსულტანტს გარი კასპაროვს, ჯერჯერობით, დუმილი არ დაურღვევია. იმედია, უახლოეს მომავალში მის მოსაზრებასაც მოვისმენთ.
რუსეთის საფეხბურთო პირველობის მორიგ ტურში ყაზანის “რუბინმა” სანკტ-პეტერბურგის “ზენიტს” უმასპინძლა და დამარცხდა _ 1:3. ხვიჩა კვარაცხელია “რუბინის” ძირითად შემადგენლობაში იყო, მაგრამ მთავარმა მწვრთნელმა ლეონიდ სლუცკიმ ის შეხვედრის 73-ე წუთზე შეცვალა, ამისი მიზეზი კი შემდეგნაირად ახსნა:
“თუ თქვენ ჩამოთვლით, რამდენჯერ არ დააფიქსირა მსაჯმა ჯარიმა, ხელზე თითები არ გეყოფათ. ზოგადად მსაჯები მთელი მსოფლიოს მასშტაბით ტექნიკურ და შემტევ ფეხბურთელებს იცავენ. ჩვენ გვყავს კვარაცხელია, რომელიც ახლა ყინულის აბაზანებს იღებს და ფეხზე უამრავი ჰემატომა (სისხლჩაქცევა) აქვს. მის წინააღმდეგ საშინლად უხეშობდნენ და ამას არბიტრი არაფრად აგდებდა. ხმამაღლა ვიტყვი, რომ ივანოვი არაკომპეტენტური მსაჯია.”
“ზენიტთან” მატჩის შემდეგ ქართულ სოციალურ ქსელებში არაერთი ყურადსაღები მოსაზრება გამოითქვა, რომელსაც ძნელია რომ არ დაეთანხმო:
“როგორც ანანიძემ გაატარა მთელი მისი მოღვაწეობა ტრავმებში, ისე მოუწევს ამასაც, თუ დროზე არ გაეცლება რუსეთს”.
“დაღუპავენ ამ ბიჭს. ვინმემ გონიერება გამოიჩინეთ, სანამ დროა”.
“წამოდი ხვიჩა რუბინიდან! მანდ ფეხბურთს არ თამაშობენ!”
ესპანურმა გამოცემამ “Marca” ერთ-ერთ წერილში “ვალენსიას” კარის დარაჯი გიორგი მამარდაშვილი კიდევ ერთხელ მოიხსენია:
“5 დღე” _ ბრწყინვალე სათაური ხოსე ბორდალასისთვის! მამარდაშვილმა ნდობა მოიპოვა. მისმა არსებობამ ფურორი მოახდინა. ის თითქმის არსაიდან გაჩნდა. ახალგაზრდა ტალანტები ყოველთვის დელიკატურ მომენტებს ქმნიან. ეს ყველაფერი კი მომავალს ემსახურება. 20 წლის მეკარე ამ სიტუაციას განიცდის. დაშვებული ორი შეცდომა მას გაზრდაში უნდა დაეხმაროს.
ქართველი მეკარე სიჩუმეში შემოიჭრა და “ღამურების” შავ-თეთრი ფორმა მოირგო. მან გუნდში შექმნილი სიტუაციით ისარგებლა და ყველაფერი სათავისოდ გამოიყენა. გიორგის შესანიშნავი მონაცემები აქვს, თუმცა, ორი დაშვებული შეცდომის გამო საფასური უნდა გადაიხადოს. მან უნდა შეძლოს და ეს სიტუაცია გადალახოს”.
ამასობაში ინგლისური ფეხბურთის ლეგენდის დევიდ ბექჰემის შვილს ოფიციალური დებიუტი ჰქონდა _ რამდენიმე დღის წინ რომეო ბექჰემმა “ფორტ ლაუდერდეილის” შემადგენლობაში ითამაშა, რომელიც “ინტერ მაიამის” მფლობელობაშია, “ინტერ მაიამი” კი დევიდ ბექჰემს ეკუთვნის. 19 წლის რომეომ ძირითად შემადგენლობაში ითამაშა და მინდორზე 79 წუთი დაჰყო. მისი გუნდი USL ლიგაში გამოდის.
ლეგენდარული დევიდის შვილმა მარჯვენა შემტევი ნახევარმცველის პოზიციაზე იასპარეზა. 57-ე წუთზე რომეოს ყველაზე რეალური მომენტი ჰქონდა, თუმცა, მისი დარტყმული კარის ხარიხას მოხვდა, შეხვედრა კი ფრედ _ 2:2 დასრულდა.
[sexy_author_bio]
