გუშინ ახლო წარსულში პოპულარული უკრაინელი თავდამსხმელი ანდრეი შევჩენკო გამოცემა „Football Italia“- ს ესაუბრა და უკრაინაში მიმდინარე მოვლენებზე ისაუბრა.
„ვამაყობ, რომ უკრაინელი ვარ. ძალიან რთული მომენტია ქვეყნისთვის, ხალხისთვის, ჩემი ოჯახისთვის. როგორმე უნდა გადავიტანოთ ეს ომი. დედაჩემი და და კიევში დარჩნენ. ისინი, როგორც იქ მაცხოვრებელთა უმრავლესობა, უარს ამბობენ ქალაქის დატოვებაზე. ჩვენ ერთიანი ხალხი და ქვეყანა ვართ. მოქალაქეები ჯარისკაცებს საკვებს აწვდიან. ეს ალბათ ერთ-ერთი ყველაზე რთული პერიოდია უკრაინის ისტორიაში. მაგრამ ჩვენ დავიცავთ საკუთარ სახლებს. უკვე ლტოლვილებიც გვყავს. მოსახლეობას ჰუმანიტარული და სამედიცინო დახმარება სჭირდება. ბედნიერი ვარ, რომ ამ საქმეში მცირედი წვლილის შეტანა მეც შემიძლია“.
გუშინ ცნობილი გახდა რომ ფეხბურთის საერთაშორისო ფედერაცია – ფიფა, რუსეთის ჩემპიონატში მოასპარეზე ლეგიონერებს კლუბებთან კონტრაქტების ცალმხრივად გაწყვეტის უფლებას მისცემს. ასეთი სიჩქარე იმითაა გამოწვეული, რომ ფეხბურთელებმა ჯერ კიდევ გახსნილი ავიარეისებით სტამბულიდან და ბელგრადიდან გაფრენა შეძლონ.
კონტრაქტგაწყვეტილ მოთამაშეს მსოფლიოს ნებისმიერ კლუბში შეეძლება გადასვლა მიუხედავად იმისა, რომ რიგ ქვეყნებში სატრანსფერო ფანჯარა დახურულია. ფიფა და უეფა ამ მხრივ გამონაკლისს დაუშვებენ.
საინტერესოა რას მოიმოქმედებენ რუსულ გუნდებში მოასპარეზე ქართველი მოთამაშეები, განსაკუთრებით ხვიჩა კვარაცხელია, რომელმაც ყაზანის „რუბინიდან“ თავი ჯერჯერობით ვერ გამოაღწია.
გუშინ ოფიციალურად დადასტურდა, რომ ევროპის მომავალ საკალათბურთო ჩემპიონატში რუსეთის ნაკრები ვერ ითამაშებს. შეგახსენებთ რომ ერთ-ერთი ჯგუფის მატჩები თბილისში არის დანიშნული და რუსებსაც ჩვენი ქვეყნის დედაქალაქში უნდა ეასპარეზათ. განცხადება ფიბა-მ გაავრცელა:
„ფიბა შეშფოთებულია უკრაინაში განვითარებული ბოლო მოვლენებით და ღრმა თანაგრძნობას გამოთქვამს დაზარალებულთა მიმართ.
საერთაშორისო ოლიმპიური კომიტეტის აღმასრულებელი საბჭოს რეზოლუციისა და მისი მიზეზების შესაბამისად, ფიბა-მ დღეს გამოაცხადა, რომ რუსეთის გუნდებს და ოფიციალურ პირებს არ ექნებათ უფლება, მონაწილეობა მიიღონ ფიბა-ს მიერ ორგანიზებულ საკალათბურთო და 3×3 კალათბურთის შეჯიბრებებში შემდგომ გაფრთხილებამდე.“
გუშინ ცნობილმა ბელარუსმა ჩოგბურთელმა ვიქტორია აზარენკამ უკრაინაში მიმდინარე ომზე ისაუბრა:
„ღრმად იმედგაცრუებული ვარ იმ ქმედებებით, რომლებიც ბოლო დღეების განმავლობაში უკრაინის წინააღმდეგ განხორციელდა. სამწუხაროა იმის ხილვა, რამდენი უდანაშაულო ადამიანი იტანჯება ამ ძალადობის გამო. ბავშვობიდან მოყოლებული იმას ვხედავდი, უკრაინელ და ბელარუს ხალხს შორის როგორი მეგობრობა იყო. ამდენად, ძალიან მძიმეა ამ ძალადობრივი დაყოფის ხილვა, რაც ახლა ხდება, იმის მაგივრად, რომ ერთმანეთის გვერდით ვიდგეთ. ჩემი გული მათთან ერთადაა, ვინც პირდაპირ ან ირიბად დაზარალდა ამ ომით, რომელიც ტკივილს ბევრს აყენებს. იმედი მაქვს, ის მალე დასრულდება“.
რამდენიმე დღის წინ 36 წლის უკრაინელი ჩოგბურთელი სერგეი სტახოვსკი საკუთარი ქვეყნის არმიაში ჩაეწერა დღეს რუსული აგრესიის წინააღმდეგ იბრძვის.
გუშინ სტახოვსკი ბრიტანულ „ITV“-ს ესაუბრა. მიმოიხილა უკრაინაში არსებული მდგომარეობა, შეეხო კოლეგა ჩოგბურთელების რეაქციას უკრაინაში მიმდინარე საბრძოლო მოქმედებების შესახებ და მსუბუქად გააკრიტიკა რაფაელ ნადალი და როჯერ ფედერერი.
„ჯოკოვიჩმა გამამხნევებელი შეტყობინება გამომიგზავნა, ცოტა ვილაპარაკეთ კიდეც. ვცდილობდი, ფედერერსა და ნადალსაც დავკავშირებოდი. სამწუხაროა, რომ მათ სიჩუმე არჩიეს. როგორც სჩანს, ეს მათი ომი არაა. ჩვენ არაერთი ცნობილი ადამიანი გვიჭერს მხარს და იმედი მაქვს მომავალშიც ასე იქნება. მედვედევი და რუბლიოვი კარგი ბიჭები არიან. მათ კარგად ესმით, რა მძიმე მდგომარეობაა. ყოველ შემთხვევაში, ისინი რამის გაკეთებას მაინც ცდილობენ, სხვები კი – არა. მთელი მსოფლიოდან ჩოგბურთელებისგან ასობით შეტყობინება მივიღე. ისინი მომხდარით შეძრწუნებულები არიან. ეს ნამდვილად გვეხმარება, ნიშნავს, რომ ხვდებიან – ყველაფერი, რასაც პუტინი უკრაინელ ნაცისტებზე ყვება, ტყუილია”.
[sexy_author_bio]
