“ანგრევენ, აფუჭებენ გზას, გვართმევენ ლუკმა- პურს“ _ მოსახლეობა ყურადღებას ითხოვს

ოზურგეთის მუნიციპალიტეტის სამი სოფლის _ ჯუმათის, ბაილეთისა და სილაურის მოსახლეობამ, ოზურგეთთან და ლანჩხუთთან დამაკავშირებელი ცენტრალური გზა გადაკეტა და ქვიშა-ხრეშით დატვირთულ დიდ მანქანებს გადაადგილების საშუალება არ მისცა.

ადგილობრიბთა თქმით, ოზურგეთიდან ლანჩხუთამდე დამაკავშირებელი ცენტრალური გზა ბეტონის საფარით რამდენიმე წელია, რაც დაიგო და უკვე ჩაშვავებულია. მდინარე ბჟუჟიდან ყოველდღიურად რამდენიმე ათასი ტონა ქვიშა-ხრეში ამოაქვთ და მწიმეწონიან მანქანებს ლანჩხუთში, კონკრეტულად კი სუფსაში გააქვთ. აქვე მდინარის მიმდებარე ტერიტორიებზე სამივე სოფლის მოსახლეობას საყანე ფართობები აქვთ, რომლის უმეტესი ნაწილი აქ მცხოვრებლების თქმით, უკვე მდინარეს წაღებული აქვს.

კაკო გაგუა, ბიძინა დარჩია, ციალა დარჩია, ნონა ყაჭეიშვილი, ტარიელ ნაჭყებია, ნატო დარჩია „გურია ნიუსთან“ საუბარში ამბობენ, მათ საკუთრებაში არსებულ საყანე ფართობების სავარგულები მდინარემ უკვე წაიღო, რადგან მას კალაპოტი შეცვლილი აქვს. ცენტრალურ გზაზე მცხოვრებ მოსახლეობას საცხოვრებელ სახლებსაც შეექმნათ უკვე პრობლემა, მეტიც, სოფელ ბაილეთის ცენტრში მდებარე ეკლესიას საძირკველს საფრთხე აქვს შექმნილი:

 “ხომ გამოიარეთ ოზურგეთიდან ეს გზა?  60-ტონიანი 30 მანქანა რომ გაივლის დღეში, ყოველ 10 წუთში, ეს გზა გაუძლებს ამდენს? შეგხვდებოდათ გზის ის მონაკვეთი, რომელიც ჩავარდნილია და შეიძლება სულ მალე მიწამ დაბლა ჩაიტანოს და უბედურება მოხდეს. გაფუჭდა ეს სიმწრით გაკეთებული გზა, მთელი ცხოვრება უგზოობა გვაწუხებს, ძლივს გააკეთეს რამდენიმე წლის წინ და ახლა ისევ უნდა განადგურდეს, ვინღა გაგვიკეთებს ისევ გზას? ეკლესიის კედელი გაიხსნა, მიწები დაბზარულია, სახლებს საძირკველი გამოეშლება, კიდევ ორი წელი უნდა გაგრძელდესო. გამორიცხულია, არავინ დაანებებს ამას! ბჟუჟიდან იღებენ ქვიშას, მდინარეს კალაპოტი შეუცვალეს. წაიღო ჩვენი საყანე ფართობები უკვე, მაგრამ მოსახლეობა არავის აინტერესებს. ყველა თავის საქმეს იკეთებს.

 მოგვშორდნენ აქედან, დაცალონ ეს მანქანები, ამ ხალხს ნუ აცდენენ, არ გავუშვებთ გამორიცხულია. ანგრევენ, გვიფუჭებენ გზებს, წავლენ დაიხურავენ ქუდს და ჩვენ დავრჩები გზის გარეშე. მარტო გზა ხომ არაა, სავარგულები წაგვართვა, აღარ იარსებებს საყანე ფართობები მალე, როგორ უნდა ვიცხოვროთ, თუ ყანები არ გვექნება? ვერ მიხვდები ვისი კარიერია, ვინ იღებს, კანონიერად თუ აკეთებს, არ უნდა იკითხონ ამბავი? ჩავარდება ის ცენტრალური გზაც ორ დღეში, ჩვენ ერთ ურემ სილას ვერ გავიტანთ, სასაფლაოზე დასაყრელ ხრეშს არ მოგცემენ, უნდა იყიდოო, ამათ მიაქვთ მთელი მდინარე, წავიდნენ აქედან“, _ ამბობდა აქციაზე შეკრებილი მოსახლეობა.

მოსახლეობასა და ქვია-ხრეშით დატვირთულ მანქანებზე პასუხისმგებელ პირს ლევან სანაიას შორის სიტყვიერი დაპირისპირება და ხმამაღალი საუბარი რამდენიმე საათის განმავლობაში გაგრძელდა.

ლევან სანაიამ “გურია ნიუსთან“ კომენტარი არ გააკეთა და მოსახლეობას უთხრა, მათი უფროსი დავით კოზმანაშვილი აუცილებლად ჩამოვიდოდა და მათ გაესაუბრებოდა.

აქციაზე იმყოფებოდა სოფელ ბაილეთში გამგებლის წარმომადგენელი სპარტაკ მამულაშვილი და სოფელ ჯუმათის მაჟორიტარი დეპუტატი მერაბ ბერიძე. ორივე მათგანი “გურია ნიუსთან“ ამბობს, რომ აქციაზე შეკრებილი მოსახელობის მოთხოვნა სამართლიანია.

“რა თქმა უნდა, ვეთანხმებით მოსახლეობის მოთხოვნებს. მდინარის კალაპოტის შეცვლის გამო, სავარგულები წაღებულია, მოსახლეობას წაართვა საყანე ფართობები, გზაც დაზიანებულია“.