ფოლკლორის ცენტრის ინიციატივითა და ორგანიზებით ოზურგეთის მუნიციპალიტეტის სოფლებში _ ჭანიეთსა და შემოქმედში ყოველწლიური ფესტივალის, ,,ხალხური საღამოების“ ფარგლებში, ანსამბლ ,,დიდგორის“ კონცერტები გაიმართა.
“გურია ნიუსი“ სოფელ შემოქმედში დაესწრო “დიდგორის“ კონცერტს, რომელიც ცნობილი ლოტბარის, მომღერლის და კომპოზიტორის ვარლამ სიმონიშვილის სახლ-მუზეუმში გაიმართა.
კონცერტი ერთი საათის განმავლობაში გაგრძელდა. ანსამბლის წევრებმა შეასრულეს საქართველოს სხვადასხვა კუთხის ხალხური სიმღერები და მოწვეული სტუმრებისგან დიდი ოვაციები დაიმსახურეს.
“ამ ადგილას, სადაც ჩვენი კონცერტი იმართება, წლების წინ, ბატონი ვარლამ სიმონიშვილი მასპინძლობდა არაერთ ცნობილ მომღერალს. აქ, შემოქმედში ტარდებოდა ხალხური სიმღერების საღამოები. გვიხარია, რომ ეს ტრადიცია იბრუნებს თავის ადგილას და მადლობა ორგანიზატორებს ამ შესაძლებლობისთვის“, _ აღნიშნა კონცერტის დასაწყისში “დიდგორის“ წევრმა, მომღერალმა გივი აბესაძემ.
ფოლკლორის ცენტრის ორგანიზებით ფესტივალი “ხალხური საღამოები“ 3 წელია იმართება. 2021 წლის ,,ხალხურ საღამოებში“ მონაწილეობს 18 ფოლკლორული, 16 საოჯახო ანსამბლი და 3 ინდივიდუალური შემსრულებელი. მომდევნო, უახლოესი კონცერტები დაგეგმილია თბილისსა და წყალტუბოში. ფოლკლორის ცენტრის ინიციატივით და საქართველოს კულტურის, სპორტისა და ახალგაზრდობის სამინისტროს მხარდაჭერით, ფესტივალი აგვისტოს ბოლომდე გაგრძელდება.
მგალობელ-მომღერალთა გუნდი „დიდგორი“ 2004 წელს დაფუძნდა. მასში გაერთიანდნენ ქართული ხალხური სიმღერის ახალგაზრდა შემსრულებლები. ანსამბლის შემოქმედების პრინციპული მიმართულებაა ძველი ხალხური სიმღერების მოძიება და მისი საშემსრულებლო ხასიათის საფუძვლიანი შესწავლა. ამ საქმეში გუნდის წევრებს უდიდეს დახმარებას უწევს ძველი საარქივო ჩანაწერები.
ავტორი: გიორგი გირკელიძე
