ბოლო პერიოდის მოვლენებიდან გამომდინარე, გთავაზობთ ლუგარის ლაბორატორიის შესახებ მოკლე განმარტებებს.
რას წარმოადგენს ლუგარის ლაბორატორია?
ლუგარის კვლევითი ცენტრი ქვეყნის ლაბორატორიული ქსელის უმაღლესი დონის დაწესებულებაა, რომელიც წარმოადგენს საქართველოს საზოგადოებრივი ჯანდაცვის სისტემის რეფერალურ ლაბორატორიას.
ლუგარის კვლევით ცენტრში განლაგებულია თანამედროვე დონეზე აღჭურვილი ბიოუსაფრთხოების მე–2 და მე–3 დონის ლაბორატორიები, რომელთა მიზანია ადამიანისა და ცხოველთა საშიშ დაავადებათა გამომწვევი პათოგენების დროული აღმოჩენა და იდენტიფიკაცია „ერთიანი ჯანმრთელობის“ პრინციპით.
მითია თუ რეალობა _ ინახება თუ არა აქ საშიში ვირუსები და ბაქტერიები?
კვლევით ცენტრში განლაგებულია პათოგენების ეროვნული საცავი, სადაც დაცულია ადამიანისა და ცხოველის დაავადებების გამომწვევი განსაკუთრებით საშიში პათოგენები.
აღნიშნული საცავი იმყოფება განსაკუთრებული დაცვის ქვეშ.
გარდა ამისა, კვლევით ცენტრში ფუნქციონირებს ჯანმრთელობის მსოფლიო ორგანიზაციის მიერ აკრედიტებული 3 ვირუსოლოგიური ლაბორატორია.
რა როლს ასრულებს ბიოუსაფრთხოების თვალსაზრისით აშშ-ს დაფინანსებით შექმნილი ლუგარის ლაბორატორია?
კორონავირუსის პანდემიამ რეალურ მაგალითზე აჩვენა, თუ რა მნიშვნელობა აქვს ლაბორატორიას საზოგადოებრივი ჯანდაცვის უსაფრთხოებისთვის რადგანაც
ამ ლაბორატორიის არსებობამ საქართველოს ბევრი უპირატესობა მისცა კორონავირუსის პანდემიის წინააღმდეგ ბრძოლაში
უპირველესად:
წინასწარი მზადყოფნა
საქართველოში COVID-19-ის პირველი შემთხვევა დაფიქსირდა 26 თებერვალს. დაფიქსირებამდე 22 დღით ადრე, ლუგარის ცენტრში უკვე არსებობდა ვირუსის დიაგნოსტირების შესაძლებლობა.
შექმნიდან 20 დღეში ვირუსის ლაბორატორიული დადასტურებისათვის აუცილებელი რეაგენტი ლაბორატორიას მოწოდებული ჰქონდა.
ლუგარის ლაბორატორიის ტექნოლოგიური აღჭურვილობისა და წლების განმავლობაში იქ დაგროვებული სამეცნიერო ცოდნის გამო, საქართველო აღმოჩნდა ერთ–ერთი პირველი ქვეყანა ევროპაში, რომელსაც COVID-19-ის დიაგნოსტირების საშუალება ჰქონდა.
ოპერატიულობა და მაღალი დატვირთვა
კორონავირუსის ეპიდემიის აფეთქებიდან დღემდე ლაბორატორია 24-საათიან რეჟიმში მუშაობს. დღე-ღამის განმავლობაში ლუგარის ცენტრის თანამშრომლები სამ ცვლაში, ასობით ნიმუშის აღებასა და დამუშავებას ახერხებენ. პასუხის მიღებას კი მხოლოდ 4-5 საათი სჭირდება.
ტესტირების ჩატარების სიზუსტე
ლუგარის ლაბორატორიაში მიმდინარეობს უზუსტესი ლაბორატორიული კვლევები და ტესტირებები. ამავე დროს გამორიცხულია ნებისმიერი საფრთხე სამეცნიერო პერსონალისთვის.
მკაცრად რეგულირდება მთელი პროცესი – დაწყებული ნიმუშის აღებიდან, მისი ტრანსპორტირებითა და ლაბორატორიაში შეტანით დამთავრებული.
უსაფრთხოება
ლუგარის ლაბორატორიას აქვს მესამე დონის დაცვა, რაც იძლევა იმის საშუალებას, რომ იმუშაონ ყველაფერზე, რაც არა მხოლოდ ქვეყნის შიგნით, არამედ მსოფლიო მაშტაბით ხდება, მოხდეს ყველა საეჭვო შემთხვევის კვლევა და დიაგნოსტირება.
ლაბორატორია საშუალებას იძლევა, რომ უმცირესი გენეტიკური განსხვავებები დაიჭირონ მიკროორგანიზმებს შორის და განასხვავონ ისინი.,
სპეციალისტებს, ცენტრში არსებული მასალის გამოყენებით, ორ ათეულზე მეტი სახეობის გრიპისა და გრიპის მაგვარი დაავადების დადგენა შეუძლიათ.
სამეცნიერო ცოდნისა და გამოცდილების დაგროვება
პანდემიის ბოლო ტალღის ჩათავების შემდეგ ლუგარის ლაბორატორია ტესტირებიდან კვლევაზე გადავა და გაანალიზებს ვირუსთან ბრძოლის დაგროვილ პრაქტიკულ გამოცდილებას
საქართველოში COVID-19-ზე ასეულ ათასობით ტესტია ჩატარებული, კორონავირუსის პანდემია ლუგარის ლაბორატორიისთვის აღმოჩნდა „ცოცხალი“ ტესტი, რომელმაც ამ ერთდროულად სამეცნიერო, სამედიცინო და სტრატეგიული მნიშვნელობის ცენტრის შესაძლებლობა რეალურად წარმოაჩინა და პანდემიის პირობებში უდიდესი წვლილი შეიტანა დაავადების დროულად დიაგნოსტირების საქმეში, აგრეთვე ახალი შტამების აღმოჩენასა და კვლევაში.
