ორი დღის წინ ამერიკული გამოცემა „GSPN“ კლუბი „მილუოკის“ ქართველ მოთამაშე სანდრო მამუკელაშვილს ესაუბრა. ინტერვიუს მიმდინარეობისას ეროვნული საკალათბურთო ასოციაციის პირველობის დებიუტანტმა ამჟამინდელი გუნდი და იქ შექმნილი მდგომარეობა დადებითად დაახასიათა.
„ეს, უბრალოდ, საოცარი შეგრძნებაა. დიდებულ გუნდში ვარ, საოცარ, გამოცდილ ვარსკვლავებთან ერთად. ვგრძნობ, რომ მეგობრულად არიან განწყობილები, როგორც ოჯახის წევრს ისე მიყურებენ და ბევრს მასწავლიან. როცა გასახდელში ყველა ერთმანეთის მეგობარია, ეს გუნდზეც აისახება. არ აქვს მნიშვნელობა როგორ ვთამაშობ, ისინი ყოველთვის ცდილობენ, დამეხმარონ, ამიხსნან ნიუანსები. იანისთან ერთად თამაში საოცრებაა, ჩემი აზრით, ის ახლა ასოციაციის საუკეთესო მოთამაშეა. გასული სეზონის ფინალის მატჩები დაკვირვებით ვნახე, როგორ თამაშობდა მაშინ ანტეტოკუნმპო. უბრალოდ ის ფაქტიც კი, რომ შემიძლია ვარჯიშზე მივიდე და რაღაც საკითხზე ვკითხო, პასუხი მივიღო, უკვე ფანტასტიკის სფეროა. ახლა მხოლოდ ერთი მსურს, ეს სწავლის და ზრდის პროცესი გაგრძელდეს, რომ უკეთესი მოთამაშე გავხდე. იმედი მაქვს, რომ მომავალში უფრო ხშირად მომიწევს იანისთან ერთად თამაში.
მწვრთნელები ბევრ რამეს მასწავლიან. დაცვაში მოსამატებელი მაქვს: მინდა, რომ ყველა შესაძლო ბურთის მოხსნა შევძლო ფარქვეშ. მსურს, ჩემი სროლა კიდევ უფრო კომფორტული გახდეს. მეტი ვესროლო თავდაჯერებით, ეს ძალიან მოსწონს გუნდის სამწვრთნელო შტაბს. ძალიან მომწონს ვისკონსინში ყოფნაც, აქ ყველას შეუძლია ლიდერის ფუნქციების შეთავსება, მომატება“. – განაცხადა სანდრო მამუკელაშვილმა.
ზემოთმოყვანილი ინტერვიუს გამოქვეყნებიდან მეორე დღეს ქართველმა შემტევმა „მილუოკის“ ფორმა მოირგო და ერთ-ერთი ღირთშესანიშნავი შეხვედრა ჩაატარა. „ტორონტო რეპტორსთან“ დაპირისპირებაში მამუკელაშვილმა თითქმის 22:40 წუთი ითამაშა და ორმაგ დუბლამდე ძალიან ცოტა, 2 ქულა დააკლდა. მან თამაში 8 ქულით, 10 მოხსნით (6 მეტოქის ფარზე) და 1 პასით დაასრულა. მამუკელაშვილმა 7-დან 4 ორქულიანი მოათავსა კალათში, 1 სამქულიანი კი არაზუსტად ისროლა. სამწუხაროდ მატჩი „ტორონტომ“ 97:93 მოიგო.
კალათბურთელი სანდრო მამუკელაშვილი ამერიკულ კალათბურთში ფეხს თანდათან იკიდებს, აი, ფეხბურთელი ჯანო ანანიძე კი მშობლიურ საქართველოში, თბილისის „დინამოდან“ ულამაზოდ და „ტელეფონით“ გაათავისუფლეს… ჯანო ანანიძემ ამასთან დაკავშირებით სპეციალური განცხადება გამოაქვეყნა.
„მოგესალმებით… საკმაოდ დიდხანს ვფიქრობდი, დამეწერა თუ არა ეს წერილი. გადავწყვიტე, რომ ჩემი გულშემატკივრებისთვის „დინამოდან“ წამოსვლის მიზეზსა და ფორმაზე მესაუბრა. საქმე ისაა, რომ ბევრის აზრით, „დინამოდან“ წამოსვლის მთავარი მიზეზი ფინანსური უკმაყოფილება გახდა, ეს არის მცდარი ინფორმაცია და ჩემმა გულშემატკივარმა მინდა სიმართლე იცოდეს.
მინდა გითხრათ, რომ ეს იყო კლუბის გადაწყვეტილება, რომელიც ჩემდა გასაკვირად ტელეფონით მაცნობეს და არა შეხვედრის დროს, პირად საუბარში. ჩემთვის ისიც გასაკვირი იყო, „დინამოს“ ერთ-ერთმა ახალმა ხელმძღვანელმა დამირეკა და არა გუნდის მთავარმა მწვრთნელმა, რომელთანაც ძალიან კარგი ურთიერთობა მაქვს და არც პრეზიდენტმა, რომელსაც ახლოს ვიცნობ.
გულწრფელად ვიტყვი, გული იმაზე დამწყდა, რომ ეს თავად იმ ადამიანმა არ მითხრა, ვისაც აქამდე დიდ პატივს ვცემდი. მიმაჩნია, რომ არც მწვრთნელისგან და არც კლუბისგან ასეთ დამოკიდებულებას არ ვიმსახურებდი, რადგან მის ნათქვამს უფრო მეტი წონა ექნებოდა, ვიდრე ნებისმიერი ხელმძღვანელისას.
კლუბის ერთ-ერთმა ხელმძღვანელმა მითხრა, რომ ჩემთან თანამშრომლობას ვერ გარისკავდა. საქმე ისაა, რომ ამხელა პაუზის შემდეგ, თავი ასე კარგად არასდროს მიგრძვნია. კლუბში მითხრეს, რომ შეკრებაზე ჩემი ხარჯით წავსულიყავი, თუ ფორმას დავიბრუნებდი, ამის შემდეგ ვისაუბრებდით ახალ კონტრაქტზე.
ნურავინ ეცდება, რომ ეს ამბავი ფინანსურ მხარეს მიაწეროს. ზოგადად ვიტყვი, რომ კლუბების ხელმძღვანელთა და მენეჯმენტის მხრიდან, რომელიც მეტწილად ნამდვილად არ გამოირჩევა დიდი საფეხბურთო ცოდნით, გემოვნებითა და მენეჯერული თვისებებით, ფეხბურთელებისადმი ასეთი დამოკიდებულებით ვერც რომელიმე კლუბსა და ვერც ქართულ ფეხბურთს განავითარებს.
სამწუხაროა, რომ ქართული კლუბების მენეჯმენტში ასეთი რეალობაა. რეალობა, რომელიც ნათლად მეტყველებს შედეგებზე. ეს აუცილებლად უნდა მეთქვა, რადგანაც განვითარებაზე საუბრისას ამოსავალი წერტილი საქმისადმი სწორი და პროფესიონალური დამოკიდებულება უნდა იყოს. ამას კი საფეხბურთო განათლება და განსაკუთრებული საფეხბურთო ინტელექტი სჭირდება“.
ქალაქ ტურინის პროკურატურა აპირებს დაკითხვაზე დაიბაროს „იუვენტუსის“ ყოფილი მოთამაშე კრიშტიანო რონალდო.
გამოცემა „La Gazzetta dello Sport“-ის მტკიცებით, გამოძიება 36 წლის პორტუგალიელისა და იტალიური კლუბის თანამშრომლობის გარკვეული დეტალებითაა დაინტერესებული. პროკურატურის ინტერესს ის თანხები წარმოადგენს, რომელიც რონალდოს ანგარიშზე ლოკდაუნის პერიოდში ჯდებოდა, თუმცა, „იუვენტუსს“ ფინანსურ ანგარიშში არ აქვს ასახული.
შეგახსენებთ, რომ არცთუ დიდი ხნის წინ პოლიციამ ტურინელთა შტაბ-ბინა გაჩხრიკა და გამოძიებისთვის საჭირო დოკუმენტაცია ამოიღო.
[sexy_author_bio]
