სააკაშვილს, რომ რამე დაემართოს, ვისი პასუხისმგებლობა იქნება ?_ ამ შეკითხვას უპასუხა ფრაქცია “ქართული ოცნების” თავმჯდომარე მამუკა მდინარაძემ გადაცემა “ღამის კურიერში”.
_ყველა ქვეყანაში არსებობენ პატიმრები, რომლებიც სამწუხაროდ თვითდაზიანებებით არიან დაკავებულები და მიხეილ სააკაშვილი არ არის პირველი და არც ბოლო იქნება. სულ იყო, არის და იქნება თვითდაზიანებებით თავის დახსნის მცდელობები. ამიტომ სახელმწიფო ყოველთვის ცდილობს აქედან გამომდინარე, რომ რისკები შეამციროს. რა თქმა უნდა სახელმწიფოს პასუხისმგებლობა ყველა პატიმარზე ვრცელდება, მაგრამ ამ პასუხისმგებლობასაც აქვს თავისი ჩარჩო.
ძალიან მკაფიოდ რომ ვთქვათ, ყველა ობიექტურად მოაზროვნე ადამიანმა რატი ბრეგაძის განცხადება ასე, ანუ სწორად აღიქვა, რომ სახელმწიფოს თავისი პასუხისმგებლობის ფარგლებში აქვს ვალდებულება ყველაფერი გააკეთოს იმისთვის, რომ დაიცვას პატიმრის სიცოცხლე, ჯანმრთელობა, უსაფრთხოება, უფლებები და ა.შ. რაც ხორციელდება ამ ქვეყანაში ზედმიწევნით სწორად. მაგრამ მეორე საკითხია, როდესაც თვითდაზიანებას ეწევა პატიმარი, ამაზე პასუხისმგებლობა არის ყოველთვის თვითდამზიანებელზე. არ არსებობს მსოფლიოში ქვეყანა, რომელიც თვითდაზიანებაზე აიღებს პასუხისმგებლობას.
თუკი პატიმარს ეხვეწება პენიტენციური სისტემა, სამედიცინო პერსონალი, რომ მან მიიღოს გარკვეული საკვები, გარკვეული წამალი, გადასხმა და ა.შ. და ის ამას არ აკეთებს, მაშინ რთულია პასუხისმგებლობის აღება,_ განაცხადა მდინარაძემ.
რომ დადგეს მძიმე შედეგი, ვის მოსთხოვს საზოგადოება პასუხს? როგორ ფიქრობთ, სახელმწიფო იქნება პასუხისმგებელი თუ არა?
_ კიდევ ერთხელ გავიმეორებ. რამე რომ მოუვიდეს რის შედეგად? თუ სახელმწიფო გააკეთებს ყველაფერს მისი ჯანმრთელობის უზრუნველსაყოფად, მაგრამ არცერთ მითითებას ის არ დაემორჩილება, არ შეჭამს იმას, რასაც ეტყვიან.
რაც არ უნდა გამაოგნებელი იყოს, შესაბამისი კალორაჟით არ მიაქვს მასთან საკვები ოჯახს. ანუ, თვითდაზიანების პროცესში ყველა ჩართულია და რისკავენ ფაქტია. რეალურად ყველა ამის მომსწრეა, რომ სჭირდება პირობითად 1000 კალორია, მიაქვთ 600-700. შეუძლია ჭამოს და არ ჭამს.
ულტიმატუმებს აყენებს – თუ გადამიყვანთ რეანიმაციაში გავაკეთებ იმას, რასაც მეუბნებითო. და რატომ? – ნიუსი სჭირდებათ, რომ რაც შეიძლება მაღალი თანამდებობის პირმა გააკეთოს განცხადება, სააკაშვილი კიდევ უფრო დამძიმდა და რეანიმაციაში გადაიყვანესო. ასეთი მარაზმული რეალობის წინაშე ვდგავართ. არც ერთი სახელმწიფო არანაირი თვითდაზიანების პირობებში არ მიჰყვება ამ ულტიმატუმს, რომ თვითდაზიანება შეიძლება გახდეს გათავისუფლების საფუძველი. ეს პრეცედენტი რომ დაუშვას რომელიმე ქვეყანამ, ეს დომინოს პრინციპით, ძალიან საშიშ პრეცედენტად შეიძლება იქცეს,”- განაცხადა მამუკა მდინარაძემ.
