,,დღეს სამმა მოსამართლემ საქართველოს მოქალაქეების თვალწინ ჩაიდინეს სისხლის სამართლის დანაშაული და წაგვართვეს ის მომავალიც, რომელიც ჩვენ ყველას გვაერთიანებს. ამიტომ არ გვაქვს მორალური უფლება, სახლებში წავიდეთ და ჩვენს ემოციებთან დავრჩეთ. დღეს სათქმელი უნდა ითქვას აქ, ამ ეზოში და არა სადმე სხვაგან. ამიტომ გთხოვთ, არ დავიშალოთ, ყველა ჩვენს სათქმელს ვამბობთ აქ. შეგნებული გვაქვს ის ,,რომ სასამართლოს ეზოში არ შეიძლება მიტინგის გამართვა, მაგრამ ისიც შეგნებული გვაქვს, რომ არ შეიძლება სასამართლომ უკანონო განაჩენები გამოიტანოს“, – ასე გამოეხმაურა ოპოზიციონერი პოლიტიკოსი გედევან ფოფხაძე, სააპელაციო სასამართლოს მიერ “მთავარი არხის” გენერალური დირექტორის და დამფუძნებლის, ნიკა გვარამიას განაჩენის გამოცხადებას.
მან სასამართლოს ეზოში შეკრებილ ნიკა გვარამიას მხარდამჭერებს მოუწოდა, გააპროტესტონ უსამართლო განაჩენი.
ფოფხაძემ ასევე აღნიშნა, რომ სასამართლოს ეზო, რუსთაველის გამზირი და სხვა ადგილებიც უნდა გახდეს პროტესტის გამოხატვის ადგილი.
“ეს უნდა იყოს ჩვენთვის ათვლის წერტილი და ათვლის დღე. დარწმუნებული ვარ, რომ აქ მყოფ ადამიანებს გვაქვს ის რესურსი, რომ თუ დავორგანიზდებით, შევძლებთ, პროტესტის სერიოზული ტალღის წამოწყებას. ეს იქნება ტალღა, რომელიც ამათ წალეკავს. 5-7 თვეს ვაძლევ “ქართულ ოცნებას”. ისტორიამ ისინი გასწირა. ჩვენ არ გვაქვს უფლება, დავიშალოთ, მაშინ როცა ნიკა, თავგანწირვის ასეთ მაგალითს გვაძლევს. სასამართლოს ეზოც პროტესტის ადგილი უნდა გახდეს, რუსთაველის გამზირიც და ყველა სხვა ადგილი. არანაირი ინდივიდუალური პროტესტები, ერთად დავდგეთ და ერთად გავაპროტესტოთ,“- თქვა ფოფხაძემ.
ცნობისთვის, თბილისის სააპელაციო სასამართლოს, მოსამართლეთა კოლეგიამ, ნიკა გვარამია პატიმრობაში დატოვა.
თბილისის საქალაქო სასამართლომ, ნიკა გვარამიას, 2022 წლის 16 მაისს 3 წლითა და 6 თვით პატიმრობა შეუფარდა. მას პროკურატურა ედავება “რუსთავი 2″-ის დირექტორობის დროს, სამაუწყებლო კომპანიის “კანონიერი ინტერესების საწინააღმდეგოდ უფლებამოსილების ბოროტად გამოყენებას.
ავტორი
