ოზურგეთში დღემდე არსებობს მოსკოვის ქუჩა, რომლის სახელის გადარქმევის მოთხოვნით, ქუჩის მცხოვრებლებმა ჯერ კიდევ 2019 წელს მიმართეს პეტიციით ოზურგეთის საკრებულოს. პეტიციის ავტორები ითხოვდნენ ქუჩისთვის მიენიჭებინათ გურიის რესპუბლიკის ლიდერის, ბენიამინ ჩხიკვიშვილის სახელი.
“სრულებით შესაძლებელია, რომ ჩვენს ქალაქში სხვა უამრავი, უფრო სერიოზული საკითხი არსებობდეს განსახილველი, თუმცა, ურიგო არ იქნებოდა, ყურადღება გაგვემახვილებინა ერთ საინტერესო და ვფიქრობთ, მნიშვნელოვან ფაქტზე, რომლის გადაჭრაც ერთობლივი ძალისხმევით შესაძლებელია.
ქალაქებში ქუჩათა სახელდების პროცესი ყველა ეპოქაში ხორციელდება და ეს ქალაქის ცხოვრების ნაწილია. ხშირ შემთხვევაში, ქუჩებისთვის სახელის მინიჭება, აღდგენა და გადარქმევა სხვადასხვა სუბიექტური მიზეზებით ხორციელდება. ვფიქრობთ, ძალიან ბევრი ობიექტური გარემოება არსებობს იმისთვის, რომ ქალაქ ოზურგეთში მოსკოვის ქუჩას სახელწოდება შეეცვალოს.
უკანასკნელი საუკუნეების განმავლობაში, უამრავი გეოპოლიტიკური მოვლენების გადაფასების და გადააზრების შემდეგ, შესაძლებელია, გარკვეული დასკვნების გაკეთება. მიუხედავად პატივისცემისა, იმ ქვეყნის ნეიტრალური და არაიმპერიალისტური აზროვნების მქონე ადამიანთა მიმართ, რომლის დედაქალაქის სახელსაც ატარებს ჩვენი ქალაქის ერთ-ერთი პატარა ქუჩა, მიზანშეწონილია, მოხდეს მისთვის სახელწოდების ცვლილება და დაერქვას ის სახელი, რომელიც ჭეშმარიტად გამოხატავს კონკრეტულ ტერიტორიაზე მომხდარი მოვლენების ანარეკლს”, _ ნათქვამი იყო პეტიციაში.
_ ოჰო, ქართული ხასიათის უცნაურობანი! ძალიანაც ვაფასებ წარსულს და ბენიამინ ჩხიკვიშვილს ნამდვილად ჰქონდა თავისი შარმი. წარმოიდგინეთ, რომ მისი შვილიშვილიც კი მოვძებნე და ვესაუბრე. მაგრამ ამ კაცმა გურიისგან რომ რესპუბლიკა შექმნა, ანუ რეალურად გურია საქართველოს გარეთ მოიაზრა და თავი მის პრეზიდენტად გამოაცხადა, ეს არაფერი? სადაა საქართველოს ერთიანობა?! გურიაში კაცი დაილია, რომ ქუჩას მის სახელი დაერქვას? მე თავად ვცხოვრობ ამ ქუჩაზე და სულ არა მინდა ე. წ. “გურიის რესპუბლიკის პრეზიდენტის” სახელი დაერქვას! მაპატიეთ, მაგრამ თუ თავად ვერ მოიფიქრეს, ისტორიული წყაროები არსებობს და იქ წაიკითხონ გურული მამულიშვილების შესახებ, _ განაცხადა მაშინ ჟურნალისტმა ეთერ ერაძემ და ის დღესაც იმავე აზრზეა.
პეტიციის საკრებულოში შეტანის შემდეგ, გრძელდებოდა დავა და მალე აზრი კვლავ ორად გაიყო და გადასძალა კიდეც იმ ადამიანთა რიცხვმა, რომლებიც სახელის გადარქმევის წინააღმდეგნი იყვნენ. უმეტესად კი, აცხადებდნენ, რომ თუ გადარქმევა მოხდებოდა, მაინცდამაინც ბენია ჩხიკვიშვილის სახელის მინიჭებას არ ემხრობოდნენ და ახალგაზრდებს უნდა ეფიქრათ კონკრეტული გურული მამულიშვილის სახელის შერჩევაზე.
რას ფიქრობენ დღეს ამ ქუჩის მცხოვრებლები? “გურია ნიუსი” მათ გაესაუბრა.
_ არ გამაგონოთ მოსკოვი. წაიღონ და მიაკრან პუტინს უკან, ვისაც ასე ძალიან უყვარს! ამ ქუჩაზე ვცხოვრობ და მოვითხოვ, გადაერქვას და არ გამაგონონ ამაზე მეტი საუბარი. არ მჭირდება აქ იმპერიის დედაქალაქის სახელი, _ გაბრაზებული, კატეგორიული ტონით საუბრობს ოზურგეთელი გოჩა მიროტაძე, რომელიც მოსკოვის ქუჩაზე ცხოვრობს.
_ პუტინი არაა, ბატონო, მოსკოვი. სახელმა რა დაგვიშავა?! არ გვინდა გადარქმევა. დარჩეს ასე. მეც ამ ქუჩის მცხოვრები ვარ და ვითხოვ, არ გადაერქვას, _ გვითხრა მარინა გოგიბერიძემ, რომელიც ამ ქუჩის მცხოვრებად გაგვეცნო. თქვა ისიც, რომ ოჯახის წევრებიც, რომლებიც მის გვერდით იდგნენ, ყველა წინააღმდეგია სახელის გადარქმევის.
მოსკოვის ქუჩაზე დროებით მცხოვრებმა ერთ-ერთმა მამაკაცმა, რომელმაც ვინაობის დასახელებისგან თავი შეიკავა, უფრო სწორად, გვთხოვა არ დაგვესახელებინა, კომენტარი გააკეთა:
_ ნატანებელი კაცი ვარ. ახლა აქ დროებით ვმუშაობ და ვათევ ოჯახში ღამეს. რა არის, იცით? 30-ტონიანი მანდარინის ბაღი მაქვს. ერთი ცალი არ მრჩებოდა გაუყიდელი. დაინგრა ის წყობა და დასრულდა ყველაფერი. რომ ჰკითხო, გეტყვიან, რუსეთი გენატრებათო. რომ ანგრევ, 30 წელიწადში უკეთესს თუ ვერ შექმნი, ცოტათი მაინც ხომ უნდა შეუმსუბუქო ყოფა გლეხკაცს? რას ჰგავს დღევანდელი მდგომარეობა. მოგწონთ, ხალხის გასაჭირი? _ ჩვენგან ცდილობდა კითხვაზე პასუხის მიღებას.
_ მე ნიკა დონაძე ვარ, 30 წლის. ამ ქუჩაზე ვცხოვრობ. შეუცვალონ, ბატონო, მე არაფერზე არ მაქვს პრეტენზია, მაგრამ ვიღაც ბენია ჩხიკვიშვილის სახელი დავარქვათო და სხვა არავინაა, უფრო დამსახურებული და ცნობილი? რამდენ ქალაქშია მოსკოვის ქუჩა და მაინცდამაინც ოზურგეთში არ უნდა იყოს?
_ ბენია ჩხიკვიშვილი ვიღაცაა?
_ ჰო, აბა, რა ვიცი, ვინაა! _ გვითხრა დონაძემ.
ლია კიღურაძე, მოსკოვის ქუჩის მცხოვრები: “იყო საუბარი ჩვენი ქუჩის სახელის შეცვლაზე. ჩვენ წავედით წინააღმდეგ. არანაირად ხელს არ მიშლის მე ეს სახელი. მოსკოვში მყოფი მთავრობა, იქნებ, კი გვიშავებს და უკრაინაზე მეტიც დაგვიშავა, იქნებ, მაგრამ სახელი რა შუაშია? მერე საჭირო გახდება საბუთების შეცვლა, წვალება, სირბილი… ახლა ეგ გვაკლია! მეტი საქმე არაფერი აქვთ? მეტი საფიქრალი დაილია?”
_ კი, აქ ვცხოვრობ, თუ არ გამასახლეს ამისთვის, _ ხუმრობით იწყებს საუბარს მოსკოვის ქუჩის მცხოვრები ზაზა შარაშიძე, _ რა მნიშვნელობა აქვს სახელს? მოსკოვი პუტინს ნიშნავს? მილიონობით ადამიანი ცხოვრობს მანდ. ქართველი რამდენია მათ შორის? დედაქალაქის სახელმა რა დააშავა? მე ასე მესმის, ბატონო.
მოსკოვის ქუჩაზე მცხოვრები გურულები ხუმრობასაც არ იშურებენ:
_ აგერ, ხომ ხედავ, მდინარე მოსკოვივით, ეს მდინარე ნაბჟუარაც შუაში მიუყვება ქუჩას. აბა, რაა, მდებარეობითაც ჰგვანან ერთმანეთს, _ მიუთითებენ ქუჩის კვეთაზე მდებარე პატარა მდინარეზე და მასზე არსებულ ხიდზე.
ოზურგეთულ მოსკოვის ქუჩაზე ორიგინალურად გაფორმებული, ხვიარა მცენარეების მწვანე საფარში ჩაფლული სახლიც ვნახეთ და ასევე მრავალი ყვავილნარით დამშვენებული კარმიდამო.
ერთი გასაუბრებით რაც გამოიკვეთა, უმეტესობა მაინც ქუჩისთვის სახელის შეცვლის წინააღმდეგია. ნაწილი კი ამბობს, რომ რატომ უნდა ეწოდოს ბენია ჩხიკვიშვილის სახელი, რადგან მათგან ეს ინიციატივა არ წამოსულა.
2019 წლის მარტში, ოზურგეთის საკრებულოს სხდომაზე, საკრებულოს წევრმა შოთა გოგიბერიძემ ამ საკითხის ირგვლივ ასე ისაუბრა:
“დამოუკიდებლობის მოპოვების შემდეგ, საქართველოში ყველაფერს მერაბ კოსტავას და ექვთიმე თაყაიშვილის სახელი ეწოდა.
კი, ბატონო, ღმერთმა გაანათლოს მათი სულები, დიდი ერისკაცები იყვნენ, მაგრამ სხვებმა რა დააშავეს? ბენიამინ ჩხიკვიშვილის მსგავსი პიროვნება და ერისკაცი ბევრი გვყავს? რატომ არ უნდა ერქვას აქამდე მისი სახელი რომელიმე ქუჩას? ეს მოსკოვის ქუჩა რომ ყოფილა, ახლა გავიგე. ცხოვრობს, ალბათ, 16 ოჯახი და რატომ ვკარნახობთ ჩვენ სახელის შეცვლას? იქნებ, არ სურთ? ბენიამინ ჩხიკვიშვილი, რომელიც თბილისის ქალაქის თავად იყო წოდებული, უზადო განათლების მქონე პატრიოტი ქართველი… რომელი ღირსება უნდა ჩამოვთვალოთ მისი? არ იმსახურებს ის, აქამდე დარქმეოდა მისი სახელი რომელიმე ქუჩას? ახლა, რომელიღაც არასამთავრობო ორგანიზაციას მოუნდა მოსკოვის ქუჩისთვის სახელის შეცვლა და ასე სურთ გადაწყვეტა? სახელის შეცვლა თუ სურთ, პირველ რიგში, ქუჩის მცხოვრებლებმა დასვან საკითხი. ბენია ჩხიკვიშვილის სახელი კი, ოზურგეთში თავისუფლად არის შესაძლებელი, ეწოდოს რომელიმე ქუჩას”, _ თქვა მაშინ გოგიბერიძემ, რასაც დეპუტატების ტაში მოჰყვა.
ავტორი
