გუშინდელი სათამაშო დღის პირველ დაპირისპირებაში, ამასწინათ, საქართველოს მძლეველი მაროკოსა და ხორვატიის ნაკრებების მატჩი უგოლო ფრით დასრულდა – 0:0.
მეორე შეხვედრაში კიდევ ერთი სენსაცია მოხდა. იაპონიის ნაკრებმა გერმანიას მოუგო – 2:1. ერთი შეხედვით უცნაური შედეგი არ არის. გახსოვთ ალბათ, ოთხი წლის წინ, რუსეთში მიმდინარე მსოფლიოს პირველობაზე სამხრეთ კორეელთა მიერ გერმანელთა ძლევის ამბავი.
გერმანელთა „გმირობის“ შემდეგ ესპანეთის ნაკრებმა მუნდიალის ერთ–ერთი ფავორიტი გუნდის ღირსება „ზეგეგმით“ დაამტკივა და კოსტა–რიკა მიწასთან გაასწორა – 7:0.
გუშინდელი დღის დასკვნით შეხვედრაში ბელგიამ კანადას მოუგო – 1:0.
არგენტინა – საუდის არაბეთის სენსაციური შეხვედრის დასრულებიდან გარკვეული დრო გავიდა. ამის მიუხედავად სრულიად საფეხბურთო მსოფლიო კვლავ „შოკურ“ მდგომარეობაში იმყოფება.
რასაკვირველია საუდის არაბეთში დიდი ზეიმია, ქვეყანაში 23 ნოემბერი დასვენების დღედ გამოცხადდა, საუდის არაბეთის მეფე სალმან იბნ აბდულ–აზიზ ალ საუდმა კი ფეხბურთელებსა და მწვრთნელებს მეფური საჩუქარი გაუკეთა – თითოეული მათგანი პრემიის სახით 2.5 მილიონ ევროს მიიღებს.
სოციალურ ქსელებში გავრცელდა ინფორმაციაც რომ ერთ–ერთმა არაბმა გულშემატკივარმა გამარჯვების შემდეგ სიხარულისგან სახლის კარი ჩამოიღო.
სამაგიეროდ სრულიად არგენტინა უსაზღვრო გლოვამ მოიცვა. შოკშია. იქაური მასმედია უდიდეს სირცხვილზე წერს.
TyC Sports: „არგენტინამ დიდი დარტყმა მიიღო. ჩვენმა გუნდმა ზედმეტად რთული ფეხბურთი ითამაშა და ცივი შხაპიც მიიღო. ბევრი შანსი იყო, მაგრამ ცოტა რეალური მომენტი და შედეგად მქუხარე მარცხი მივიღეთ“.
Olé: „დარტყმა. ნაღდი დარტყმა, რომელმაც ჩვენი ნაკრები დააგდო. საუდის არაბეთის ეს გამარჯვება მსოფლიოს ჩემპიონატის პირველი სერიოზული შოკია. პირველ ტაიმში ყველაფერი კარგად იყო, მერე კი საუდის არაბეთმა თამაში შეატრიალა. დაუჯერებელია“.
Diario Popular: „აბსოლუტური მოულოდნელობა! არგენტინის ნაკრებმა სამარცხვინოდ ითამაშა და ახლა მეტი შეცდომის დაშვების უფლება აღარ აქვს“.
Crónica: „არ შეიძლება, ეს სინამდვილე იყოს! არგენტინა მეორე ტაიმში მოედანზე ჩაძინებული გავიდა და საუდის არაბეთმა ეს გამოიყენა. აუტსაიდერთან დაშვებული შეცდომები მექსიკასთან და პოლონეთთან უნდა გამოსწორდეს“.
Clárin: „მძიმე დარტყმა არგენტინას. საუდის არაბეთმა მოგვიგო და მთელი მსოფლიო გაოცა“.
La Natión: „კრიტიკული სცენარი. არგენტინის ნაკრებს ქვიშის ქარიშხალმა გადაუარა. არადა, გუნდი ძალიან ახლოს იყო ისტორიულ მიღწევასთან – ზედიზედ 37-ე წაუგებელ მატჩთან. პრობლემები ისევ გამოჩნდა და ამ პრობლემებზე სკალონის მეორე ტაიმში პასუხი არ ჰქონდა“.
არგენტინის ეროვნული გუნდის მარცხს გამოეხმაურა დიეგო მარადონას ვაჟიშვილიც. იტალიურ რადიოსთან საუბარში ლეგენდარული მოთამაშის ვაჟმა შემდეგი განცხადება გააკეთა:
„არგენტინის მარცხით განადგურებული ვარ. მიჭირს იმის დაჯერება, რომ ეს ყველაფერი მართლაც მოხდა. საუდის არაბეთთან წაგება სიგიჟეა. მესისა და მამაჩემს შორის შედარებას ვინც აკეთებს ის ფეხბურთს არც უყურებს და არც ესმის. ჩვენ ორ სხვადასხვა პლანეტაზე ვსაუბრობთ, თუმცა არ მინდა ჯოხი მთლიანად ლეოზე გადავტეხო“,_ განაცხადა დიეგო მარადონა ჯუნიორმა.
არგენტინის ნაკრების ყოფილმა თავდამსხმელმა სერხიო აგუერომ თავისი ქვეყნის ფეხბურთის ასოციაცია გააკრიტიკა იმის გამო, რომ საუდის არაბეთთან მატჩის წინ მას ნაკრების საწვრთნელ ბაზაზე შესვლის უფლება არ მისცეს.
როგორც ირკვევა, 34 წლის აგუეროს სურდა, კატარის მსოფლიოს ჩემპიონატზე სტარტის წინ თავისი თანამემამულეებისთვის წარმატება პირადად ესურვა, მაგრამ უთხრეს, რომ ამას ვერ შეძლებდა აკრედატაციის უქონლობის გამო, რომლის მიღებას დრო სჭირდებოდა.
„არგენტინის ნაკრები აქამდე არ მომინახულებია. ვნახოთ, რა მოხდება, მაგრამ რაღაც უცნაურობა ხდება. როგორც ჩანს, შესასვლელად საშვია საჭირო. უცნაურია, რომ მის გაფორმებას სამი–ოთხი დღე სჭირდება. თუკი არ სურთ, რომ მივიდე, პრობლემა არაა, ოღონდ, სათქმელი პირში მითხრან. არასდროს არავინ გამინაწყენებია“, – განაცხადა განაწყენებულმა სერხიო აგუერომ.
2022 წლის მსოფლიო ჩემპიონატის ჯგუფური ეტაპის პირველ ტურში საფრანგეთმა ავსტრალიის ნაკრები 4:1 გაანადგურა.
ფრანგები მუნდიალის მოქმედი ჩემპიონები არიან და ბოლო 16 წელიწადში პირველად მოხდა, როდესაც თასის მფლობელმა სადებიუტო შეხვედრაში იმარჯვა. ბოლოს ეს 2006 წელს ბრაზილიამ შეძლო, როდესაც „სელესალომ“ ხორვატიას 1:0 მოუგო. 2010 წელს იტალიამ პარაგვაისთან 1:1 ითამაშა, 2014 წელს ესპანეთი ნიდერლანდებთან 1:5 განადგურდა, 2018 წელს კი გერმანიამ მექსიკასთან დაპირისპირება 0:1 დათმო.
ალბათ თანამემამულეების კარგი თამაშის შთაბეჭდილების ქვეშ იმყოფებოდა, როდესაც ლეგენდარულმა მწვრთნელმა არსენ ვენგერმა განაცხადა, რომ 2022 წლის მუნდიალის გამარჯვებული მისი ქვეყანა გახდება.
„მსოფლიო ჩემპიონატის ნომერ პირველ ფავორიტად საფრანგეთს მივიჩნევ, მაგრამ ამას იმიტომ არ ვამბობ, რომ მე ამ ქვეყნიდან ვარ. ვფიქრობ, ჩემს მშობლიურ ნაკრებს საუკეთესო შეტევითი ხაზი ჰყავს“.
2022 წლის მუნდიალის ორი მთავარი ფავორიტი დაასახელა „ბარსელონას“ ამჟამინდელმა თავკაცმა ხავიმაც.
„ბრაზილია და არგენტინა ევროპულ გუნდებზე ერთი ნაბიჯით წინ არიან. მესი და ნეიმარი შესანიშნავად გამოიყურებიან. მართალია პირველ შეხვედრაში არგენტინა მოულოდნელად დამარცხდა, მაგრამ ამ გუნდს უდიდესი პოტენციალი გააჩნია.
საფრანგეთს, ესპანეთს, ინგლისს, პორტუგალიას, გერმანიას, ბელგიასა და ხორვატიასაც კარგი შანსი აქვთ“, – განაცხადა ხავიმ.
ავსტრალიასთან სასტარტო მატჩში საფრანგეთის ნაკრებს მარცხენა მცველი ლუკას ერნანდესიც დაუშავდა.
ოფიციალური ინფორმაციით, 26 წლის ბაიერნელმა მუხლის ჯვარედინი მყესები დაიზიანა, რაც იმას ნიშნავს, რომ მისთვის მსოფლიოს ჩემპიონატი დასრულებულია.
შეგახსენებთ, რომ მსოფლიოს ჩემპიონატის დაწყებამდე საფრანგეთის ნაკრებს პრესნელ კიმპემბე, ნგოლო კანტე, პოლ პოგბა, კრისტოფერ ნკუნკუ და ქარიმ ბენზემა გამოაკლდნენ.
ჰარი კეინმა შეიძლება მსოფლიოს ჩემპიონატის მეორე ტურში ვერ ითამაშოს.
ინგლისელმა თავდამსხმელმა ირანის ნაკრებთან შეხვედრაში მორთეზა პურალიგანჯისთან კონტაქტის შედეგად კოჭი დაიზიანა და მისი თამაში საეჭვოა. ყველაფერი სამედიცინო შემოწმებამ უნდა გამოაჩინოს. ჯერჯერობით გადაწყვეტილი არაფერია.
პორტუგალიელი კრიშტიანო რონალდო კვლავ საყოველთაო ყურადღების ცენტრშია. „მანჩესტერ იუნაიტედიდან“ წამოსულმა შემტევმა გუშინ კატარში სპეციალური პრესკონფერენცია ჩაატარა.
პორტუგალიელ ვარსკვლავს ჟურნალისტები დაეკითხნენ, თუ ვინ არიან, მისი აზრით, 2022 წლის მუნდიალის ფავორიტები.
37 წლის ფეხბურთელმა ასეთებად ბრაზილია, არგენტინა, საფრანგეთი, ესპანეთი და გერმანია მიიჩნია, თუმცა აღნიშნა, რომ პორტუგალიაც საკმაოდ ძლიერია და 2016 წელს ყველას აჩვენა, თუ რა შესაძლებლობები აქვს“.
პორტუგალიის ნაკრების კაპიტანი კატარის მსოფლიოს ჩემპიონატს განსაკუთრებული მოტივაციით ხვდება. მას ერთდროულად ხუთი რეკორდის დამყარება შეუძლია.
1. თუკი თუნდაც ერთ გოლს გაიტანს კატარში, გახდება ერთადერთი ფეხბურთელი, ვისაც მსოფლიოს ხუთ ჩემპიონატზე ექნება გატანილი გოლი. აქამდე მის გარდა ოთხ ტურნირზე შეძლეს გოლების გატანა ბრაზილიელმა პელემ და გერმანელებმა – უვე ზეელერმა და მიროსლავ კლოზემ.
2. ყველაზე მეტი გოლი პორტუგალიის ნაკრებში. კრიშტიანო რონალდოს ორი გოლი სჭირდება იმისთვის, რომ დაეწიოს მსოფლიოს ჩემპიონატებზე პორტუგალიის ნაკრების საუკეთესო ბომბარდირს ეუსებიოს. ამ უკანასკნელმა 1966 წლის ჩემპიონატზე 9 ბურთი შეაგდო. რონალდოს ანგარიშზე ოთხ ჩემპიონატში 7 გოლია.
3. ყველაზე მეტი მატჩი კაპიტნის რანგში. რეკორდსმენია არგენტინელი ლეგენდა დიეგო მარადონა – 16 მატჩი ფინალურ ეტაპებზე კაპიტნის სამკლაურით. კრიშტიანო რონალდოს ამ სტატუსით 11 მატჩი აქვს ჩატარებული. ასე რომ, თუ პორტუგალია კატარში მეოთხედფინალამდე მიაღწევს, რონალდო დაეწევა მარადონას, ნახევარფინალში გასვლის შემთხვევაში კი თავად გახდება რეკორდის მფლობელი.
4. ყველაზე მეტი საგოლე პასი პორტუგალიის ნაკრებში. ლეგენდარულ ლუიშ ფიგუს მსოფლიოს ჩემპიონატებზე ხუთი შედეგიანი გადაცემა დაუგროვდა. რონალდოს ანგარიშზე ორი საგოლე გადაცემაა და აქვს შანსი, მინიმუმ გაიმეოროს ფიგუს რეკორდი.
5. ყველაზე მეტი გოლი ერთ ტურნირზე პორტუგალიის ნაკრებში. ამ რეკორდის გამეორება ძალიან რთული იქნება, რადგან 1966 წელს ეუსებიომ ცხრა გოლი გაიტანა. კრიშტიანომ ძალიან უნდა მოინდომოს, ლეგენდარულ თანამემამულეს გვერდით ამოუდგეს.
საინტერესოა რომ რონალდომ ერთი რეკორდი უკვე გაიმეორა, როცა პორტუგალიის ნაკრების განაცხადში მოხვდა. შესაბამისად, ის მსოფლიოს მეხუთე ჩემპიონატში მიიღებს მონაწილეობას, რითაც გაუთანაბრდება მექსიკელებს – ანტონიო კარვახალსა და რაფაელ მარკესსს, აგრეთვე გერმანელ ლოთარ მათეუსს.
ესპანეთის ნაკრების მთავარმა მწვრთნელმა ლუის ენრიკემ კი მსოფლიოს ჩემპიონატზე ევროპის მოქმედი ჩემპიონის, იტალიის ნაკრების არყოფნას უსამართლობა უწოდა.
„იტალიის არყოფნა? ძალიან ვწუხვარ, რომ იტალია მსოფლიოს ჩემპიონატზე ვერ გავიდა. ეს უსამართლობაა. როგორ შეიძლება ევროპის ჩემპიონი მსოფლიოს ჩემპიონატზე არ იყოს? თუმცა, ეს აჩვენებს, რომ საკვალიფიკაციო ეტაპის გავლა ადვილი არ არის“, – განაცხადა ლუის ენრიკემ.
ავტორი
