“არ შეიძლება, სხდომის ჩაშლაზე ხელი ოპოზიციას შეახოცოთ”,-ასე პასუხობს სოციალურ ქსელში სენაკის საკრებულოს თავმჯდომარეს, საბა ოდიშარიას ოპოზიციონერი დეპუტატი მაია ფირცხალავა.
“ბატონო საბა, დიდხანს ვიკავებდი თავს, გამეცა თუ არა თქვენთვის პასუხი. მივხვდი პასუხის გაუცემლობა ნიშნავს, რომ რაღაც დავაშავეთ, ჩვენ თანაქალაქელებს შევუქმენით დისკომფორტი.
სინამდვილეში აი რა ხდება: ქვეყანაში შექმნილი ღრმა და მძიმე პოლიტიკური კრიზისიდან გამომდინარე, რაც გამოწვეულია პარტია “ქართული ოცნების” მიერ 2024 წლის 26 ოქტომბრის საპარლამენტო არჩევნების ტოტალური გაყალბებით, არჩევნებს არ აღიარებს არც ერთი ადგილობრივი და საერთაშორისო სადამკვირვებლო ორგანიზაცია. ეუთო /ოდირის დასკვნაში ცალსახად წერია, რომ არჩევნების დღეს და არჩევნებამდე, ამომრჩეველზე მიმდინარეობდა არნახული ზეწოლა,შანტაჟი, მუქარა, მოსყიდვა, დაშინება, ხდებოდა ადმინისტრაციული რესურსების გამოყენება. არჩევნების გაყალბებაში ჩართული იყო სახელმწიფოს ყველა ინსტიტუცია.
ამიტომაც, ქუჩაში გამოვიდა ათასობით ადამიანი თავისუფალი, სამართლიანი არჩევნების მოთხოვნით, რასაც ე.წ. ხელისუფლებამ დაუპირისპირა მომიტინგეებზე ძალადობა, ცემა, წამება, არაადამიანური მოპყრობა, ძარცვა, უკანონო დაპატიმრებები.
აქციის დასაშლელად გამოიყენეს დღემდე დაუდგენელი მხუთავი გაზი, წყლის ჭავლი, დასარბევად გამოიყვანეს გდდ-ეს სპეც რაზმი, რობოკოპები, ტიტუშკები.
ყოველივე ამის მიუხედავად, უკვე ერთი თვეა უწყვეტად მიმდინარეობს აქციები თბილისსა და სხვა ქალაქებში.
სწორედ ამ ფონზე სენაკის საკრებულოს ფრაქცია “ერთიანმა ნაციონალურმა” მოძრაობამ დეკემბრის დასაწყისში ოფიციალურად გამოაცხადა ბოიკოტის შესახებ და არ ესწრება საკრებულოს სხდომებს, თუმცა განაგრძობს ყოველდღიურ მუშაობას.
2025 წლის ბიუჯეტის პროექტის განხილვაში საკრებულოს ორივე ოპოზიციური პარტია (ერთიანი ნაციონალური მოძრაობა და გახარია _საქართველოსთვის) აქტიურად მონაწილეობდა, ესწრებოდა კომისიურ და საკრებულოს სხდომას.
ჩვენი მხრიდან გამოითქვა ბევრი შენიშვნა და ოფიციალურად მოგაწოდეთ ბიუჯეტში გასათვალისწინებელი ინიციატივები, რაც როგორც მოსალოდნელი იყო, ბიუჯეტში არ გაითვალისწინეთ.
რაც შეეხება 27 დეკემბრის საკრებულოს სხდომას, თქვენ და თქვენმა გუნდმა იცოდა, რომ ერთიანი ნაციონალური მოძრაობა იყო ბოიკოტის რეჟიმში. პირადად მე , როგორც საკრებულოს ერთი წევრი, თქვენი სტატუსით ვიგებ თქვენი გუნდის და ჩვენი კოლეგის ჯანმრთელობის მდგომარეობის გაუარესებას – გამოჯანმრთელება მას. თქვენ ამ სტატუსით, რომელიც მხოლოდ ოპოზიციური პარტიების დისკრედიტაციას ემსახურება, მაიძულეთ გაგახსენოთ 9 თვე, როდესაც კანონის ყველა ნორმის დარღვევით “ქართული ოცნება” ბოიკოტს უცხადებდა საკრებულოს, მხოლოდ იმიტომ, რომ თანამდებობები მიეღო.
რატომღაც იმ დროს სენაკელი თანაქალაქელები არ გაგხსენებიათ .აქვე შეგახსენებთ, საკრებულოს სხდომას, სადაც ქვორუმი არ გქონდათ და ოპოზიციას პრობლემა არ შეუქმნია. ჩემი აზრია: არ შეიძლება სხდომის ჩაშლაზე ხელი ოპოზიციას შეახოცოთ . პრობლემა თქვენში ეძებეთ”, _ დაწერა მაია ფირცხალავამ.
შეგახსენებთ , 27 დეკემბერს სენაკის მუნიციპალიტეტის საკრებულოში სხდომის ჩაშლის და ქალაქისთვის 2025 წლის ბიუჯეტის ვერ დამტკიცების თაობაზე, სენაკის საკრებულოს თავმჯდომარემ ვრცელი განმარტება დღეს გააკეთა. როგორც საბა ოდიშარია სოციალურ ქსელში წერს, “მათი გუნდის ერთ-ერთი წევრი ჯანმრთელობის მდგომარეობის გაუარესების გამო, ვერ ესწრებოდა საკრებულოს სხდომას, ხოლო ოპოზიციის წარმომადგენლები მიუხედავად იმისა, რომ აქტიურად მონაწილეობდნენ წინასაბიუჯეტო განხილვაში, არ გამოცხადდნენ სხდომაზე და შესაბამისად, კვორუმის არ არსებობის გამო, ვერ დამტკიცდა ქალაქის 2025 წლის ბიუჯეტი”.
შეგახსენებთ, სენაკის საკრებულოში სულ 33 წევრი ირიცხება, აქედან 17 – “ქართული ოცნება”, 12- “ერთიანი ნაციონალური მოძრაობა” , 4 კი – პარტია “საქართველოსთვის”.
ავტორი
