სახელმწიფო პროგრამის _ “განახლებული რეგიონების” ფარგლებში ლანჩხუთში, ქალაქის ცენტრში, ნოე ჟორდანიას ქუჩაზე, გარე ფასადების განახლება და ტროტუარების მოწყობა აქტიურ ფაზაშია შესული. ეს კი მოსახლეობაში არაერთგვაროვან შეფასებას იწვევს, იმიტომ, რომ კოსმეტიკური სილამაზის უკან მრავალბინიანი სახლების პრობლემები მძლავრობს. არაერთგვაროვნება იმაში გამოიხატება, რომ ლანჩხუთში მოსახლეობის ერთი ნაწილი კმაყოფილია იმით, რომ სახელმწიფომ აღდგენის არეალში მყოფი ბინების ფანჯრებიც კი შეცვალა და შენობების ფასადები მოაწესრიგა.
“როცა სამსახურში მოვდივარ და ვუყურებ ამ სილამაზეს, ამ კეთებას, ამ მშენებლობას, ოპტიმიზმის მეუფლება. სულს მიხუთავდა ის ჩამოძენძილი ფასადები. თვალს მაინც გავახარებთ!” _ ასე ამბობს ზემოთ ნახსენები პროექტის მიმდინარეობით კმაყოფილ ლანჩხუთელთა ერთი ნაწილი.
მოსახლეობის მეორე ნაწილი კი, ვერ ხსნის, რატომ უნდა გაიღოს სახელმწიფომ თანხები კერძო მესაკუთრისთვის, განსაკუთრებით, კომერციული ფართებისთვის, კარ-ფანჯრებისა თუ სახურავის შესაცვლელად. მით უმეტეს, იმ ფონზე, როცა მრავალბინიანი საცხოვრებელი სახლის მობინადრეებს გაცილებით მძლავრი პრობლემა აწუხებთ, ვიდრე კარ-ფანჯრის შეცვლაა.
ჟორდანიას 114-ში მდებარე მრავალბინიანი საცხოვრებელი სახლი ერთ-ერთია, რომლის იერსახეც ცენტრალური ქუჩის მხრიდან გაალამაზეს და მოაწესრიგეს, თუმცა, არავინ დაინტერესებული კორპუსის შიდა მხარის მდგომარეობით. არადა, სამსართულიანი სახლის საყრდენი ბოძები დაზიანებულია და დროულ მიხედვას საჭიროებს.
“კარგია გარე ფასადი, ტროტუარები, ცივილური სახე მიიღო ყველაფერმა, მაგრამ რად გინდა ეს ყველაფერი, თუ სახლის ერთი ნაწილი ჩამოგვენგრა?! ფაქტია, რომ ბოძები ავარიულ მდგომარეობაში და მიხედვას საჭიროებს, თორემ ერთ დღეს, არაა გამორიცხული, გალამაზებული ფასადის ფონზე ეს სახლი შიდა ეზოს მხრიდან ჩამოინგრეს და ბათუმში მომხდარი ტრაგედიის მსგავსი დატრიალდეს”, _ ამბობენ ამ კორპუსის ის მობინადრეები, რომელთაც დახმარების თხოვნით “გურია ნიუსს” მომართეს.
მას შემდეგ, რაც პრობლემით “გურია ნიუსი” დაინტერესდა. ადგილზე მდგომარეობის შესაფასებლად ლანჩხუთის მერიის შესაბამისი სამსახურის თანამშრომელიც მოვიდა. იგი მოსახლეობის საწუხარს გაეცნო, პრობლემები მოისმინა და შესაბამის რეაგირებასაც დაგვპირდა.
[sexy_author_bio]
