შეაკეთეს თუ არა გაფუჭებული ნაგავმზიდი ავტომობილის შეკეთება ჩოხატაურში, რა გახდა დღეისთვის არსებული სურათის გამომწვევი მიზეზი და სად არის საჭირო ნაგავშემკრები კონტეინერების დამატება_ ამ კითხვებზე პასუხის მისაღებად ა(ა)იპ “სხივის” დირექტორ მერაბ დოლიძესთან მთელი დღის განმავლობაში ცდილობდა.
არაერთი სატელეფონო ზარის შემდეგ მერაბ დოლიძე გამოგვეხმაურა და როგორც გვითხრა, დაზიანებული ავტომობილი ამ დროისთვის შეკეთებულია, ნაგვის კონტეინერები კი დაცლილი.
დოლიძემ ასევე განმარტა თუ რა იწვევს ორშაბათობით მუნიციპალიტეტში ნაგვის ნარჩენების დიდი რაოდენობით დაგროვებას.
„რისორი იყო დაზიანებული, რთულია მაგის შოვნა, მაგრამ ვიშოვნეთ, ნაწილი დავსვარკეთ. აღდგენილია, მანქანა მუშაობს. ამ წუთას ბახმაროშია მუშა პროცესში. ამ დროისთვის ნაგვის კონტეინერები დაცლილია.
ორშაბათი არის მძიმე დღე ჩოხატაურში, იმიტომ რომ კვირა დღეს არის ბაზარი, უამრავი ხალხი იყრის თავს და გროვდება უამრავი ნაგავიც, როგორც რაიონის ასევე სოფლების მასშტაბით. ორშაბათი არის რთული სამუშაო დღე ნაგვის გატანის მხრივ“,_ გვპასუხობს დოლიძე.
მისაღებად ა(ა)იპ “სხივის” დირექტორის თქმით, სანაგვე კონტეინერების სწრაფი გავსება თხილის სეზონსაც უკავშირდება, რადგან მოსახლეობის ნაწილი თხილის ჩენჩოს ყრის, რაც მიუღებელია.
„ეს პერიოდი რთულია იმის გამო რომ ხალხი რომელიც თხილს მოიპოვებს ეზოში, ჩენჩოს რომ გამოიღებენ იმით ავსებენ ნაგვის ურნას. როგორ შეიძლება იმის ჩაყრა ნაგვის ურნაში? სამი-ოთხი ტომარა რომ ჩაყარო მეტი კი არ ეტევა იმ ურნაში. ბუკისციხეში, გოგოლესუბანში, ნახევარზე მეტი ყრია თხილის ჩენჩო. არასოდეს ხდებოდა ასეთი რამ. ხალხს რა აგიტაცია ჩავუტაროთ რომ არ ჩაყარონ შიგნით ვერ ვხვდები. კარგია, რომ თხილის მოსავლით ხალხი შემოსავალს მიიღებს, მაგრამ ჩენჩო ურნაში არ უნდა ჩაიყაროს. მსგავსი რამ არ გამიგია ჯერ და არც მომხდარა.
ეს ჩენჩოები ეზოს ბოლოში რომ დაყარონ გადაიქცევა ნეშომპალად და ნაკელია, სავალდებულო კი არაა დაიწვას და ჰაერში წავიდეს. ამის აგიტაცია როგორ გავწიო ჩოხატაურში არ ვიცი“,_ ამბობს დოლიძე.
მისივე თქმით, გუბერნიიდან მუნიციპალიტეტი 150-მდე სანაგვე კონტეინერს ელოდება, რასაც ისეთ სოფლებში გადაანაწილებენ, სადაც ერთი ურნა საკმარისი არ არის.
„გუბერნიიდან დამირეკეს და გვითხრეს, რამდენი ურნა გჭირდებათო. ჩვენ ვუთხარით 150 ცალი. ადრე იყო 110 ურნა ჩოხატაურში, ახლა არის 270 ურნამდე და იმ 110 ურნით ვმუშაობდით. ხალხმა ისწავლა, რომ ნაგავი არ ჩაყაროს მდინარეში, ეზოს ბოლოში არ დაყაროს და ეს მოითხოვს დამატებით ურნებს. თუ მოგვცემდნენ 150 ურნას 30-ს დავუმატებდით ბახმაროს სეზონზე, შემდეგ წამოვიღებდით და განვალაგებდით დამატებით როგორც დაბის ასევე სხვადასხვა სოფლებში. დღესაც შეიძლება დაგვირეკონ და გვითხრან მობრძანდით, წაიღეთ. ნაგავშემკრები ურნების დამატება შექმნილ მდგომარეობას შეამსუბუქებს. არის ადგილები, სადაც ერთი ურნა გვყოფნის და არის ადგილები სადაც არ ყოფნის, და ასეთ ადგილებში ორი ურნა უფრო იმუშავებს“,_ გვითხრა დოლიძემ.
ცნობისთვის, „გურია ნიუსი“ რამდენიმე დღის წინ წერდა, რომ ჩოხატაურის მუნიციპალიტეტის სოფელ ხიდისთავში ურნები ნაგავს ვეღარ იტევს, მსგავსი სიტუაცია კი დღეს დაბლაციხე ბუკისციხის მიმართულებით დაბამდე იდგა.
