“ვაკის პარკში“ შადრევანში ჩასულ 3 ბავშვს დენი დაარტყა, მათგან ერთი გარდაიცვალა.
„ვაკის პარკში მიმდინარეობს რეკონსტრუქცია. ბავშვები თამაშობენ, ჩაუვარდათ ბურთი. ალბათ, არასრულწლოვანი იყო ეს ბავშვი და არასრულწლოვან ბავშვს ხომ უნდა ჰყავდეს მეთვალყურე, რომ არ მოხდეს იმ ადგილას მისი ჩასვლა, სადაც მიმდინარეობს რეკონსტრურქცია?
ბუნებრივია, შეიძლება რაღაცა ტექნიკური შეფერხებები იყოს და ადამიანის ჯანმრთელობის დაზიანება გამოიწვიოს, არა მხოლოდ ბავშვის, არამედ ნებისმიერი მოზარდის. ამაზე ახლა რამე პასუხისმგებლობას ითხოვ? ვის? და ამას მეკითხებით სერიოზულად? რომ ბავშვს ბურთი ჩაუვარდა და…”, _ ასეთი კომეტარით შემოიფარგლა ჟურნალისტებთან საუბრის დროს საქართველოს პარლამენტის განათლების და კულტურის კომიტეტის თავმჯდომარე, გიორგი ამილახვარი დღეს, ვაკის პარკში მომხდარ ტრაგედიასთან დაკავშირებით.
გიორგი ამილახვარის ამ განცხადებას სოციალურ ქსელში დიდი გამოხმაურება მოყვა. _ სოციალური ქსელის მომხმარებლების ერთი ნაწილი მას გადადგომისა და მანდატის დატოვებისკენ მოუწოდებდნენ.
მოგვიანებით გიორგი ამილახვარმა ბოდიში მოიხადა: „მინდა, მივუსამძიმრო საზოგადოებას და განსაკუთრებით ოჯახს მცირეწლოვანი ბავშვის ასე ტრაგიკულად გარდაცვალების გამო.
ჩვენ ყველა მოზიარე ვართ ამ საშინელი ამბის. ბოდიში მინდა მოვიხადო და მოვუხადო პირველ რიგში გარდაცვლილის სულს, მის ოჯახს და მთლიანად საზოგადოებას.
არ აქვს ახლა იმის ახსნას აზრი, თუ რა კონტექსტით გავაკეთე მე ის განცხადება, რაც გავაკეთე. ეს ჩემთვის არის ცხოვრებისეული კრედო, მსგავსი არასდროს არაფერი მიფიქრია, არათუ პოლიტიკაში ყოფნის დროს, მთლიანად ჩემი ცხოვრების განმავლობაში. და ბუნებრივია, ჩემთვისაც ამ კონტექსტში ის განცხადება, რომელიც გავაკეთე, არის სრულიად მიუღებელი, და გულწრფელად. არ მგონია, რომ ოჯახს იქით ვინმე ისე განიცდიდეს ამ ამბავს, ვიდრე მე.
ვინაიდან სრულიად გაუთვითცნობიერებლად სულ სხვა კონტექსტში, ასე იყო კითხვაც დასმული, იქნა ჩემ მიერ გაცემული პასუხი. სამწუხაროდ, ამ ფაქტთან დაკავშირებით, და საერთოდ რეკონსტრუქციასთან დაკავშირებით და ამ გახსნილ შადრევანთან დაკავშირებით, ჩემდა სამწუხაროდ არანაირი ინფორმაცია არ მქონდა. მიუხედავად ამისა, მე ინფორმაცია მქონდა თუ არ მქონდა, თავად ვგრძნობ პასუხისმგებლობას ამ განცხადებაზე და კიდევ ერთხელ, ოჯახსა და საზოგადოებას ბოდიშს ვუხდი და სრულიად თანამოზიარე ვარ ამ დიდი ტრაგედიის”.
შსს-ს ცნობით, მომხდარზე გამოძიება სისხლის სამართლის კოდექსი 240-ე პრიმა მუხლითაა დაწყებული, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.
ავტორი
